Amos 2

Kamba (Mbivilia) 1956

← Chapter 1 Jump to: Chapter 3 →

1Ũũ nĩw’o Yeova ũnũkwasya: Nũndũ wa mavĩtyo atatũ ma Moavi, ĩĩ, nũndũ wa ana, ndikathyũũa ũsilĩlo wayo; nĩkwĩthĩwa avĩvisye mavĩndĩ ma mũsumbĩ wa Etomu matw’ĩka sokaa.

2Ĩndĩ ngaete mwaki ĩũlũ wa Moavi, na ũkamina nyũmba nene mbanakavye sya Keliothi; na Moavi ĩkakw’ĩa kĩtuunĩ, na mbu, na wasya wa soo;

3na ngaveta mũsili aume katĩ wayo, na kũaa anene onthe mayo me mbee ũsumbĩnĩ vamwe nake, easya ũu Yeova.

4Ũũ nĩw’o Yeova ũnũkwasya: Nũndũ wa mavĩtyo atatũ ma Yuta, ĩĩ, nũndũ wa ana, ndikathyũũa ũsilĩlo wayo; nĩkwĩthĩwa nĩmaleete mĩao ya Yeova, na matyaasũvĩa myamũlo yake, na movũngũ moo nĩmamavĩtĩthĩtye, ala aaĩthe moo maatĩĩe.

5Ĩndĩ ngaete mwaki ĩũlũ wa Yuta, na ũkamina nyũmba nene mbanakavye sya Yelusaleme.

6Ũũ nĩw’o Yeova ũnũkwasya: Nũndũ wa mavĩtyo atatũ ma Isilaeli, ĩĩ, nũndũ wa ana, ndikathyũũa ũsilĩlo wayo; nĩkwĩthĩwa nĩmathooetye ala alũngalu vetha, na nĩmathooetye athĩni iatũ ilĩ—

7o ala mendaa mũno kĩtoo kya nthĩ kĩthĩwe mĩtwenĩ ya ngya, na kwelelũkasya nzĩa ya ũla mũuu: na mũndũ na ĩthe makĩenda kwa mwĩĩtu ũmwe, mavukye syĩtwa yakwa ĩtheu:

8na nĩmekomasya nthĩ ũtee wa kĩla kĩthembeo ĩũlũ wa ngũa syaiiwe ngwatĩlĩlyo; na nyũmbanĩ ya Ngai woo manyusĩaa mbinyu ya asu maumĩtw’e vaini.

9Ĩndĩ nĩnaanangie Mũamoli mbee woo, ũla ũasa wake waĩ ta ũasa wa mĩtĩ ya mĩkũũ, na aĩ vinya ta mĩtĩ ya myaloni; ĩndĩ nĩnaanangie ũsyao wake kuma ĩũlũ, na mĩi yake kuma nthĩ.

10Ĩngĩ nĩnamwambatisye kumumya nthĩ ya Misili, na namũtongoesya myaka mĩongo ĩna weũnĩ, mũmesye nthĩ ya Mũamoli.

11Nakwa nookĩlilye athani ananĩ menyu, na Anasili anakenĩ menyu. Ti o ũu, inyw’ĩ ana ma Isilaeli? Ekũlya ũu Yeova.

12Ĩndĩ nĩmwanengie Anasili mbinyu manyw’e, na mweeaĩa athani, mũkĩmea, Mũikathane.

13Sisyai, ngamũvinyĩĩa vala mũĩ, o tondũ ĩkasya yĩvinyĩĩaa yusũĩtwe nĩ syove sya ngetha.

14Na kũsemba kũkaaa kwa mũsembi; na ũla wĩ vinya ndakeyongeleela vinya; o na ũla wĩ ũtonyi ndaketangĩĩa mwene;

15o na ũla wĩkalaa na ũta ndakaũngama; o na ũla wĩ maũũ mũno ndaketangĩĩa mwene; o na ũla ũtũlaa mbalasi ndaketangĩĩa mwene;

16na ũla wĩ ũkũmbaũ katĩ wa ala me ũtonyi akakĩa e mũthei mũthenya ũsu, easya ũu Yeova.

← Chapter 1 Jump to: Chapter 3 →