Mark 12

Kamba (Mbivilia) 1956

← Chapter 11 Jump to: Chapter 13 →

1Na ambĩlĩlya kũneena nao na ngelekan’yo. Mũndũ avandie mũũnda wa mĩsavivũ, na oothyũlũlũkya wiio, na enza ĩima ya ũangĩa nzavivũ, na aaka mwako mũtũlu wa mũnyoolo, na oonenga aĩmi mamũĩmĩe, nake athi ũenĩ nthĩ ĩngĩ.

2Na ĩvinda yavĩka atũma ngombo kwa ala aĩmi nĩ kana yose kwa aĩmi mosyao amwe ma mũũnda wa mĩsavivũ.

3Na mamĩkwata, na mamĩkũna, na mamĩlũngya ĩte na kĩndũ.

4Na ĩngĩ atũma ngombo ĩngĩ kwoo; na ĩsũ mamĩuauĩkya mũtwe na mamĩsonokya.

5Na amĩtũma ĩngĩ; na ĩsu mamyũaa: na atũma ingĩ mbingĩ; na makĩkũna imwe, na makyũaa ingĩ.

6Na eethĩwa atialĩte na ũmwe, nake nĩ mwana ũla wendete: ũsu amũtũma kwamo ĩtina, akyasya, Makamũtaĩa mwana wakwa.

7Indĩ aĩmi asu masya ene kwa ene, Ũũ nĩwe mũtiĩwa; ũkai, tũmũae, na ũtiĩwa ũkeethĩwa witũ.

8Na mamũkwata, mamũaa, na mamwĩkya ũtee wa mũũnda wa mĩsavivũ.

9Na yu ĩndĩ ũla mwene wa mũũnda ũsu wa mĩsavivũ akeeka ata? Akooka na akaananga ala aĩmi, na akanenga angĩ mũũnda ũsu wa mĩsavivũ.

10O na mũtyaamba ũsoma ũandĩko ũũ: Ĩvia yĩla yaleilwe nĩ aki, Yĩu yatw’ikie yĩla ĩnene ya kĩkotonĩ;

11Ũu nĩwaumie kwa Mwĩaĩi, Naw’o nĩ ũseng’yo methonĩ maitũ?

12Na mamantha kũmũkwata; na makĩa ĩkomano; nũndũ nĩmamanyie kana ngelekan’yo ĩsu aneena ũndũ woo: na mamũeka, na mathi.

13Na matũma amwe ma Avalisi na ma Elote vala ũĩ, nĩ kana mamũtee ndetonĩ syake.

14Na mooka, mamwĩa, Mũmanyĩsya, nĩtwĩsĩ wĩ wa w’o, na ndũkĩaa mũndũ o na wĩva; nũndũ ndũsiasya ũthyũ wa mũndũ, ĩndĩ nũmanyĩasya w’o nzĩa ya Ngai: Nĩkwosana na ĩla mĩao kũnenga Kaisali koti, kana ti w’o?

15Tũmũnenge, kana tũikamũnenge? Ĩndĩ we, esĩ wangangan’yo woo, amea, Nĩkĩ mũũndata? Ndeteei silingi none.

16Na mamũetee. Na amakũlya, Mũvw’ano ũũ na ũandĩko ũũ nĩ waũ? Na mamwĩa, Nĩ wa Kaisali.

17Na Yesũ amea, Mũnengei Kaisali syĩndũ sya Kaisali, na Ngai syĩndũ sya Ngai. Na maseng’ie mũno nĩwe.

18Na Asatukai mooka vala ũĩ, ala maasya kana kũi ũthayũũkyo; na mamũkũlya, makyasya,

19Mũmanyĩsya, Mose nĩwatũandĩkĩe, atĩ ethĩwa mwana‐a‐inyia wa mũndũ nĩwakw’a, na atia mũka wake, na ndaatia kana, mwana‐a‐inyia wake namwose ũ mũndũ mũka, amũũngamĩsye mwana‐a‐inyia mbeũ.

20Kwaĩ aũme mũonza ma inyia ũmwe: na ũla wa mbee atwaa mũka, na akw’a atatiĩte mbeũ;

21na wa kelĩ nake amwosa, na akw’a atatiĩte mbeũ; na wa katatũ o ta ũu;

22na asu mũonza maiaatia mbeũ. Ĩtina wa onthe ũla mũndũ mũka nake akw’a.

23Ũthayũũkyonĩ ĩndĩ akethĩwa e mũka wa wĩva wa asu? Nũndũ onthe mũonza nĩmamũtwaĩte.

24Yesũ amea, Kĩla kĩũtuma mũvĩtya, tĩ kwĩthĩwa mũtyĩsĩ ala maandĩko, o na vinya wa Ngai?

25Nũndũ yĩla makathayũũka kuma akw’ũnĩ, maikatwaana, o na maikatwaawa; ĩndĩ makethĩwa mailyĩ ta alaĩka ala me ĩtunĩ.

26Ĩndĩ ũndũ wa akw’ũ, kana makathayũũkw’a; mũiaasoma ĩvukunĩ ya Mose, vala vaandĩkĩtwe ũvoo wa kala Kakuthu, ũndũ Ngai waneenie nake, akyasya, Nyie nĩ Ngai wa Avalaamu, na Ngai wa Isaka, na Ngai wa Yakovo?

27We ti Ngai wa ala akw’ũ, indĩ nĩ wa ala me thayũ: nĩmũũvĩtya mũno.

28Na ũmwe wa aandĩki ooka, na eew’a maineenan’ya nake, na esĩ kana amasũngĩa nesa, amũkũlya, Nĩ mwĩao wĩva ũla wĩ mbee wa yonthe?

29Yesũ amũsũngĩa, Wa mbee nĩ ũũ, Ĩw’a Isilaeli; Mwĩaĩi Ngai waitũ nĩ Mwĩaĩi ũmwe:

30mwende Mwĩaĩi Ngai waku na ngoo yaku yonthe, na thayũ waku w’onthe, na kĩlĩko kyaku kyonthe, na vinya waku w’onthe.

31Na wa kelĩ nĩw’o ũũ, Mwende mũtũĩ waku o tondũ wĩyendete mwene. Vai mwĩao ũngĩ mũnene kwĩ ĩsu.

32Na ũla mũandĩki amwĩa, Nĩ w’o, Mũmanyĩsya, nĩwaneena w’o kana Ngai nĩ ũmwe; na vai ũngĩ ate o we:

33na kũmwenda na ngoo yonthe, na ũmanyi w’onthe, na vinya w’onthe, na kũmwenda mũndũ ũngĩ o tondũ wĩyendete mwene, nĩkũthonokete mũno nthembo nima syonthe sya ũvĩvw’a, o na nthembo sya kũtonywa.

34Na Yesũ oona kana asũngĩa na ũmanyi, amwĩa, We ndwĩ kũasa na ũsumbĩ wa Ngai. Na ĩtina wa ũu vai mũndũ waatata kũmũkũlya ũndũ ĩngĩ.

35Na Yesũ akĩmanyĩsya ĩkalũnĩ asũngĩa, asya, Aandĩki measya ata kana Klĩsto nĩ mwana wa Ndaviti?

36Ndaviti mwene e nthĩnĩ wa Veva Mũtheu aisye, Mwĩaĩi amwĩie Mwĩaĩi wakwa, Ĩkala nthĩ ngalĩ ya kw’oko kwakwa kwa aũme, Mũvaka nat’wa amaitha maku kavĩla ka nyaĩĩ syaku.

37Ndaviti mwene emwĩta Mwĩaĩi; na ĩndĩ nĩ mwana wake ata? Na yĩla ĩkomano ĩnene yamwĩthukĩĩsya na ũtanu.

38Na ũmanyĩsyonĩ wake asya, Ĩsũvĩei aandĩki, ala mendaa kũtambũka mekĩe ngũa ndasa, na kũkethw’a ing’ang’anĩ,

39na ivĩla sya mbee masinakokenĩ, na kũndũ kwa mbee mbokanĩ:

40ala maĩsaa nyũmba sya aka ndiwa, na nũndũ wa ũkengani nĩmaasavasya mboya; asu nĩmo ala makona ũsilĩlo mũnene mbee.

41Na ekala nthĩ elekele vala valekelaw’a nthembo, na oona ũndũ ĩkomano yĩũlekya mbesa vala valekelaw’a: na aingĩ ala maĩ athwii meekĩa nyingĩ.

42Na kwooka mũndũ mũka ndiwa ngya, eekĩa tũwela twĩlĩ, nat’wo nĩ ĩsendi yĩmwe.

43Na ameta amanyĩw’a make, amea, Nĩ w’o nĩngũmwĩa, Ndiwa ĩno ngya nĩyekĩa nyingĩ kwĩ onthe ala mekwĩkĩa vala valekelaw’a:

44nũndũ aa onthe meekĩa nũndũ wa kwingĩvĩwa kwoo; ĩndĩ ũũ kuma ũkyanĩ wake eekĩa syonthe ila wĩ nasyo, nĩsyo wĩkwatyo wake w’onthe wa thayũ.

← Chapter 11 Jump to: Chapter 13 →