Mark 4

Kamba (Mbivilia) 1956

← Chapter 3 Jump to: Chapter 5 →

1Na ambĩlĩlya ĩngĩ kũmanyĩsya e ũtee wa ũkanga. Na ĩkomano ĩnene mũno yamũmbanĩa, na ũndũ wa ũu alika ngalawanĩ, na ekala vu ũkanganĩ; na ĩkomano yonthe yekala nthĩ yĩ ũtee wa ũkanga.

2Na amamanyĩsya maũndũ maingi na ngelekan’yo, na ũmanyĩsyonĩ wake amea,

3Ĩthukĩĩsyei: mũvuĩi nĩwaendie kũvuĩa:

4na kweethĩwa akĩvuĩa, mbeke imwe syavalũka ũtee wa nzĩa, na nyũnyi syooka syaiya.

5Na ingĩ syavalũka mavianĩ, vala ve mũthanga mũnini; na oyu syamea, nĩkwĩthĩwa ityaĩ na mũthanga mũliku:

6na syũa yaaa, syavova; na nĩkwĩthĩwa ityaĩ na mĩi, syooma.

7Na ingĩ syavalũka mĩw’anĩ, na mĩw’a yeana na yainyita, na syaaa mũsyaĩe.

8Na ingĩ syavalũka mũthanganĩ mũseo, na syasyaa, ikĩmea na kwĩana; na syasyaa, imwe mĩongo ĩtatũ, na imwe mĩongo thanthatũ, na imwe ĩana.

9Na asya, Ũla wĩ matũ ma kwĩw’a, nĩew’e.

10Na yĩla waĩ weka, ala mamũthyũlũlũkĩte, vamwe na ala ĩkũmi na elĩ, mamũkũlya ũndũ wa ĩla ngelekan’yo.

11Na amea, Inyw’ĩ mũnengetwe kũmanya nzama ya ũsumbĩ wa Ngai: ĩndĩ kwa ala me ũtee, maũndũ onthe nĩmekawa na ngelekan’yo;

12kana kũsisya nĩmeũsisya, na matikwona, na kwĩw’a nĩmekwĩw’a, na matiũmanya; maikese kwĩalyũla, na makĩekewa.

13Na amakũlya, Mũtyĩsĩ ngelekan’yo ĩno? Mũkamanya ata ĩndĩ ngelekan’yo syonthe?

14Ũla mũvũĩi avuĩaa ndeto.

15Aa nĩo ala me ũtee wa nzĩa, vala ndeto yavuĩiwe; nao meew’a, oyu Satani akyũka na akyumya ĩla ndeto ĩvuĩiwe ngooni syoo.

16Na ala mavuĩiwe mavianĩ no ta ũu, ala, yĩla meew’a ĩla ndeto, nĩmeũmyosa oyu na ũtanu;

17na mati na mĩi nthĩnĩ woo, ĩndĩ mekala ĩvinda ĩnini; na ĩtina, yĩla thĩna kana ũnyamao wookĩla kwondũ wa ĩla ndeto, oyu mailulutĩka.

18Na angĩ ala mavuĩiwe mĩw’anĩ, nĩ ala meew’a ĩla ndeto,

19na mawĩmakĩo ma nthĩ, na ũkengani wa ũthwii, na ĩtomo ya syĩndũ ingĩ makĩlika, na kũnyita ĩla ndeto, na ĩilea ũsyaa.

20Na asu ala mavuĩiwe mũthanganĩ mũseo nĩ ala mekwĩw’a ĩla ndeto, na makimyosa, na makĩsyaa, amwe mĩongo ĩtatũ, na angĩ mĩongo thanthatũ, na angĩ ĩana.

21Na amakũlya, Taa nũetawe nĩ kana wiwe ungu wa ĩmisi, kana ungu wa ũkomo? Ti kana wiwe vala vatũlu?

22Nĩkwĩthĩwa kũti ũndũ ũvithe, ũtakavuanw’a; o na kũti kĩmbithĩ, kĩtakaumbũka ũtheinĩ.

23Ethĩwa ve mũndũ wĩ matũ ma kwĩw’a, nĩew’e.

24Na amea, Ĩsũvĩei ũndũ mũkwĩw’a: kĩthimo kĩla mũthimaa no kyo mũkathimĩwa; na nĩmũkongeleelwa.

25Nũndũ ũla wĩ na kĩndũ, ũsu akanengwa; na ũla ũtaĩ, ũsu akavenwa o na kĩla wĩ nakyo.

26Na amea, Ũsumbĩ wa Ngai nĩ ta ũũ, ta mũndũ wavandie mbeũ mũthanganĩ;

27na akĩkoma na akĩamũka, ũtukũ na mũthenya, na ila mbeũ ikamea na kwĩana ũndũ ũtesi.

28Nthĩ ĩsyaaa ũndũ wayo; mbee nĩ ĩtũ, na mũatĩĩa nĩ kĩia, na mũminũkĩlyo nĩ mbeke mbusũu kĩianĩ.

29Ĩndĩ lĩu wooma, oyu akyosa kavyũ, nũndũ ngetha nĩ mbiku.

30Nake asya, Twĩũvw’anan’ya na kyaũ ũsumbĩ wa Ngai? Kana twĩũelekan’ya na kĩ?

31Ũilyĩ ta mbeke ya kalatali ĩla yavandwa nthĩ, o na kau nĩ nini kwĩ mbeũ syonthe sya nthĩ,

32ĩndĩ yavandwa nĩyĩanaa, ĩkethĩwa nene mbee wa nyũnyi syonthe, na kũasavya mbonge nene; ũndũ nyũnyi sya yayaya itonya kwĩkala muunyĩnĩ wayo.

33Na amatavasya ĩla ndeto na ngelekan’yo nyingĩ ta isu, o tondũ maĩ matonya kũmĩw’a;

34na vate ngelekan’yo ndaaneena nao: ĩndĩ amamanyĩasya amanyĩw’a make maũndũ onthe me nzama.

35Na mũthenya ũsu, kwavika wĩoo, amea, Tũingei mũingo ũla ũngĩ.

36Na matia ĩkomano, athi nake, e o ngalawanĩ ĩsu. Na ngalawa ingĩ syaĩ vamwe nake.

37Na kwookĩla kĩuutani kĩnene kya kĩseve, na itulumo syakũnanga ngalawa, o na ngalawa yambĩlĩlya kusũa manzĩ.

38Nake mwene aĩ ĩtina akomete mũtonĩ: na mamũamũkya, mamwĩa, Mũmanyĩsya, ndwĩ na ũndũ tũkyaa?

39Na aamũka, na akan’ya kĩseve, na atavya ũkanga, Usya, kilya. Na kĩseve kyausya, na kwaya ũuu mũnene.

40Na amakũlya, Nĩkĩ mwĩ na w’ĩa? Mũtinamba kwĩthĩwa na mũĩkĩĩo?

41Na makwatwa nĩ w’ĩa mũnene, na maneenan’ya ene kwa ene, Ũũ nũũ ĩndĩ, ũndũ o na kĩseve na ũkanga niũmwĩw’a?

← Chapter 3 Jump to: Chapter 5 →