Mark 13

Kamba (Mbivilia) 1956

← Chapter 12 Jump to: Chapter 14 →

1Na akyuma ĩkalũnĩ, ũmwe wa amanyĩw’a make amwĩa, Mũmanyĩsya, sisya, ũndũ mavia aa mailyĩ, na ũndũ myako ĩno ĩtilyĩ.

2Na Yesũ amwĩa, Nũkwona myako ĩno mĩnene? Vaa vaikatiwa ĩvia ĩũlũ wa yĩngĩ, yĩla yĩtakaombowa.

3Na ekalĩte kĩĩmanĩ kya Mĩthata kwelekela ĩkalũ, Vetelo na Yakovo na Yoana na Andalea mamũkũlya me nzama,

4Tũtavye, maũndũ asu makethĩwa ĩndĩĩ? Na wonan’yo nĩ wĩva yĩla maũndũ asu onthe makathengeea kwĩanĩw’a?

5Na Yesũ ambĩlĩlya kũmatavya, Ĩsũvĩei mũndũ ndakamwasye.

6Aingĩ makooka na syĩtwa yakwa, makyasya, Ninyie we; na makamasya aingĩ.

7Na yĩla mũkew’a ũvoo wa makaũ na mawetango ma makaũ, mũikaũũye: maũndũ asu mati ndĩi ya ũlea kwĩkĩka; ĩndĩ mũminũkĩlyo ndũnamba ũvika.

8Nũndũ mbaĩ ĩkookĩlĩla mbaĩ, na ũsumbĩ ũkookĩlĩla ũsumbĩ; kũkeethĩwa itetemo sya nthĩ kũũ na kũũ; na kũkeethĩwa mayũa; maũndũ asu nĩ wambĩlĩlyo wa woo.

9Ĩndĩ inyw’ĩ ĩsũvĩei: nũndũ makamũnengane nzamanĩ; na mũkakũnĩwa masinakokenĩ; na mũkaũngama mbee wa makavana na asumbĩ kwondũ wakwa, mwĩthĩwe ngũsĩ kwamo.

10Na ĩngĩ mũvaka ũvoo mũseo wambe ũtavanw’a mbaĩnĩ syonthe.

11Na yĩla memũtwaa na kũmũnengane mokonĩ ma andũ, mũikambe kũũũya ũndũ mwĩneena: ĩndĩ o ũla mwĩnengwa saa ũsu, ũneenei: nĩkwĩthĩwa ti ĩnyw’ĩ mwĩneena, ĩndĩ nĩ Veva Mũtheu.

12Na mũndũ akanengane mwana‐a‐inyia oawe, na ĩthe mwana wake; na syana ikamokĩlĩla ala maisyaie, na kũmoaĩthya.

13Na inyw’ĩ mũkamenwa nĩ andũ onthe kwondũ wa syĩtwa yakwa: ĩndĩ ũla wĩũmĩĩsya kũvika mũminũkĩlyo, ũsu akatangĩĩwa.

14Ĩndĩ yĩla mwĩona ũthatyo ũla wanangaa ũũngeme vandũ ũtaĩle kũũngama (ũla ũsomaa namanye), ĩvinda yĩu ala me Yutia makĩe mathi iĩmanĩ:

15na ũla wĩ ĩũlũ wa nyũmba ndakatheee, o na ndakavote nthĩnĩ, kumya kĩndũ o na kĩva kĩla kĩ nyũmbanĩ kwake:

16na ũla wĩ mũũndanĩ ndakasyoke ose ngũa yake ya ĩũlũ.

17Ĩndĩ woo nĩ wa ala aito na ala mekwongya mĩthenya ĩsu!

18Na voyai ũndũ ũsu ndũkethĩwe ĩvinda ya mbevo.

19Nũndũ matukũ asu kũkethĩwa thĩna ũndũ ũtaaĩthĩwa kuma mwambĩlĩlyo wa kũmbwa kwa syĩndũ ila Ngai wombie kũvika na yu, o na kũikethĩwa ũngĩ nongi.

20Na kethĩwa Ngai ndaakuvĩvya matukũ asu, kũivĩta mwĩĩ o na wĩva; ĩndĩ kwondũ wa anyuve, ala wanyuvie, akuvĩvya matukũ asu.

21Na ĩvinda yĩu ethĩwa mũndũ o na wĩva akamwĩa, Sisyai, Klĩsto e vaa; kana, Sisyaĩ, e vaya; mũiketĩkĩle;

22nũndũ makookĩla Maklĩsto ma ũvũngũ na athani ma ũvũngũ, na makoonan’ya syama na moseng’yo, nĩ kana masye o na anyuve, ethĩwa ũu nũtonyeka.

23Ĩndĩ inyw’ĩ ĩsũvĩei: sisyai, nĩnamũtavya maũndũ onthe mbee.

24Ĩndĩ matukũ asu, ĩtina wa ũla thĩna, syũa yĩkaya kĩvindu, na mwei ndũkaumya kyeni kyaw’o,

25na ndata ikethĩwa ikĩvalũkanga kuma ĩtunĩ, na mavinya ala me ĩtunĩ makathingithangwa.

26Na nĩvo meona Mwana wa mũndũ okĩte mathweonĩ na vinya mũnene na ũtheu mũtisu.

27Na nĩvo wĩtũma alaĩka momban’ye anyuve make kuma ngalĩ inya sya ĩseve, na kuma kĩtulu kya nthĩ kũvika kĩtulu kya ĩtu.

28Na ĩndĩ ĩmanyĩsyei ngelekan’yo ya mũkũyũ: mbonge syaw’o syololoa, na syathongoosya wenze, nĩmwĩsĩ kana mũniino nũthengeee;

29no ta ũu nenyu, mũkyona maũndũ asu makĩkĩka manyai kana e vakũvĩ, o ta mĩomonĩ.

30Nĩ w’o nĩngũmwĩa, Ũsyao ũũ ndũkavĩta, maũndũ asu onthe mateanĩw’e.

31Ĩtu na nthĩ nikavĩta: ĩndĩ ndeto syakwa itikavĩta.

32Ĩndĩ mũthenya ũsu na saa ũsu vai ũmwe wĩsĩ, o na alaĩka me ĩtunĩ, o na Mwana, ĩndĩ no Asa.

33Ĩsũvĩei, syaĩĩsyai, na voyai: nũndũ mũtyĩsĩ ĩvinda yĩu nĩ ĩndĩĩ.

34Nĩ ta mũndũ akĩthi kyalo nthĩ ĩngĩ, atiĩte nyũmba yake, ainengete ngombo syake ũkũmũ, na kĩla ĩmwe wĩa wayo, na aimwĩaĩa mũsũvĩi nasyaĩĩsye.

35Syaĩĩsyaĩ ĩndĩ; nũndũ mũtyĩsĩ yĩla mwene wa nyũmba wĩũka, ethĩwa nĩ wĩoo, kana ũtukũ katĩ, kana nzamba syasya, kana kĩoko;

36ndakese kũka na mĩtũkĩ mũtesĩ na aimwĩthĩa mũkomete.

37Na ũu ngũmũtavya inyw’ĩ, nĩmatavya onthe, Syaĩĩsyai.

← Chapter 12 Jump to: Chapter 14 →