1 Chronicles 12

Kamba (MBIVILIA ŨVOO MŨSEO)

← Chapter 11 Jump to: Chapter 13 →

1Aa nĩmo aũme ala maendie kwĩkalany'a na Ndeviti e Nzikilaki, vala wekalaa ate na ũthasyo wa kũthi vala ũkwenda, nũndũ wa Mũsumbĩ Saũlo mwana wa Kisi. Andũ asu maĩ amwe ma asikalĩ ngũmbaũ na me vinya, ala matetheeasya Ndeviti kaũnĩ.

2Andũ asu maĩ ma mbaĩ ya Mbengyameni, ĩla noyo yaĩ mbaĩ ya Saũlo. Maĩ andũ ma kũtũmĩa ũta na maĩ na ũtonyi wa kũatha na maangi, na kwĩkya mavia na kĩkũtha maitũmĩa kw'oko kwa aũme kana kwa aka. Asikalĩ asu maĩ:

3Mũnene woo aĩ Aieseli na atetheeaw'a nĩ Yoasi. Asu elĩ maĩ ana ma Semaa kuma Ngivea. Yesieli na Veleti ana ma Asimavethi; Mbelaka na Yeũ kuma Anathothi,

4Isimaia kuma Ngiveoni ũla waĩ ũmwe katĩ wa ala “Asikalĩ Ngũmbaũ Mĩongo Ĩtatũ,” na mũtongoi woo. Ala angĩ maĩ Yelemia, Yaanzieli, Yoanani, Yosavati kuma Ngetela,

5Elusai, Yelimothi, Mbealia, Semalia, Sevatia kuma Aluvi,

6Elikana, Isia, Asaleli, Yoeseli, Yasoveamu kuma mũsyĩnĩ wa Kola,

7na Yoela na Nzevatia ana ma Yeloamu kuma Ngetoli.

8Andũ amwe ma mbaĩ ya Ngandi nĩmaendie vandũnĩ valũmu vala Ndeviti waĩ weũnĩ. Maĩ asikalĩ ngũmbaũ na meesĩ wĩa woo nesa. Nĩmeesĩ kũtũmĩa ngao na matumo nesa. Maĩ na mothyũ ma kũkĩwa ta ma mũnyambũ, na maĩ mĩtũkĩ ta nthwaia sya kĩĩmanĩ.

9Andũ asu maatĩanĩe ta ũũ kuma ũla mũnene kũvika ũla mũnini: Mũnene woo aĩ Eseli, wa kelĩ kwa ũnene aĩ Ovatia, wa katatũ Eliavu,

10wa kana Misimana, wa katano Yelemia,

11wa thanthatũ Atai, wa mũonza Elieli,

12wa nyanya Yoanani, wa kenda Elisavati,

13wa ĩkũmi Yelemia, na wa ĩkũmi na ũmwe Makivanai.

14Andũ asu ma mbaĩ ya Ngandi maĩ anene ma asikalĩ, ala anene maũngamĩe asikalĩ ngili, na ala me ĩtheo maũngamĩe asikalĩ ĩana.

15Asu nĩmo andũ ala maingie Ũsĩ wa Yolotani mweinĩ wa mbee, ĩvindanĩ yĩla ũsĩ ũsu wausũĩte kĩw'ũ kĩkakĩla. Nĩmalũngilye andũ onthe ala matwĩe myandanĩ, amwe makĩa melekele ngalĩko ya wumĩlonĩ wa syũa, na ala angĩ ngalĩko ya ũthũĩlonĩ wa syũa.

16Andũ amwe kuma mbaĩnĩ ya Mbengyameni na ya Yuta, nĩmaendie vandũnĩ valũmu vala Ndeviti waĩ.

17Ndeviti nĩwaumaalile amathaũe na amea atĩĩ, “Ethĩwa mũkĩte ta anyanyawa mũke mũndetheesye, nĩngũmũthokya na ngoo yakwa yonthe, ĩndĩ ethĩwa mũkĩte nĩ kana mũnthoosye kwa amaitha makwa, o na vala vai ĩvĩtyo nĩkĩte, Ngai wa aaũmae maitũ nĩone ũu na ayumya ũtw'ĩo.”

18Veva wa Mwĩai Ngai nĩwalikile nthĩnĩ wa Amasai, mũnene wa ala “Mĩongo Ĩtatũ” na asya atĩĩ, “Ndeviti mwana wa Yese, ithyĩ twĩ andũ maku, ithyĩ twĩ ngalĩko ila yaku! Mũuo nĩwĩthĩwe naku, na mũuo nĩwĩthĩwe na ala meũkũtetheesya! Nũndũ Ngai waku nĩwe ũkũtetheeasya.” Nĩvo ĩndĩ Ndeviti wamathokisye na amatw'ĩkĩthya amwe ma atongoi ma asikalĩ make ma kaũ.

19Amwe ma andũ ma mbaĩ ya Manase nĩmeetilile mathi ngalĩko ya Ndeviti, ĩvindanĩ yĩla Ndeviti waendie e na Avilisiti makokite Mũsumbĩ Saũlo. (Ndeviti kwa w'o ndaatetheesya Avilisiti, nũndũ asumbĩ moo nĩmakĩaa Ndeviti mayona ta ũtonya kũmavũnyanĩa kũla kwĩ Saũlo, ũla vau mbeenĩ waĩ mũnene wake. Kwondũ wa ũu nĩmalũngilye Ndeviti athi Nzikilaki.)

20Ĩvindanĩ yĩla Ndeviti waendete Nzikilaki, andũ aa ma mbaĩ ya Manase nĩmeetilile mamũatĩĩa: Atina, Yosavati, Yetiaeli, Mikaeli, Yosavati, Eliu na Nzilethai. Kĩla ũmwe wa andũ asu, aĩ mũtongoi wa kĩkundi kya asikalĩ ngili ma mbaĩ ya Manase.

21Nĩmatetheeisye Ndeviti kũkita amaitha make, nũndũ onthe maĩ asikalĩ ngũmbaũ na maĩ anene ma asikalĩ ma Ndeviti.

22Kĩla ĩvinda andũ nĩmaendaa kũtetheesya Ndeviti, nginya esa kwĩthĩwa na nguthu nene ya asikalĩ, ta nguthu ya asikalĩ ma Mwĩai Ngai.

23Ũũ nĩw'o ũtalo wa ikundi sya asikalĩ me na mĩio ya kaũ, ala mookie kũtetheesya Ndeviti e Eviloni, nĩ kana maalyũle ũsumbĩ wa Saũlo ũtw'ĩke wa Ndeviti, o tondũ Mwĩai Ngai waneenete.

24Andũ ma mbaĩ ya Yuta ala makuĩte ngao na matumo, maĩ andũ ngili thanthatũ na maana nyanya meyũmbanĩtye kũkita.

25Andũ ma mbaĩ ya Simioni maĩ ngili mũonza na ĩana; maĩ asikalĩ ngũmbaũ.

26Andũ ma mbaĩ ya Livai maĩ ngili inya na maana thanthatũ.

27Asu maĩ vamwe na Yeoiata mũtongoi wa andũ ma mũsyĩ wa Alũni, na aĩ na andũ ngili itatũ na maana mũonza.

28O ta ũu vaĩ Nzatoki mwanake ũmwe mũsikalĩ ngũmbaũ, e na atongoi mĩongo ĩlĩ na elĩ kuma mũsyĩnĩ wake.

29Andũ ma mbaĩ ya Mbengyameni, ĩla nĩyo yaĩ mbaĩ ya Saũlo maĩ ngili itatũ. Aingĩ moo nĩmaendeeie kwĩthĩwa me aĩkĩĩku kwa Saũlo nginya ĩvinda yĩu.

30Andũ ma mbaĩ ya Evalaimu maĩ ngili mĩongo ĩlĩ na maana nyanya; maĩ asikalĩ ngũmbaũ na me nguma andũnĩ ma mĩsyĩ yoo.

31Andũ kuma nyusu ya mbaĩ ya Manase, ala manyuvĩtwe kwa masyĩtwa moke kũtw'ĩkĩthya Ndeviti mũsumbĩ, maĩ ngili ĩkũmi na nyanya.

32Andũ ma mbaĩ ya Isakali, ala mamanyaa ũndũ ĩvinda yĩilyĩ, na meesĩ ũndũ andũ ma Ĩsilaeli maĩlĩte kwĩka, maĩ anene maana elĩ, vamwe na andũ ma mĩsyĩ yoo ĩla matongoesye.

33Andũ ma mbaĩ ya Nzevuluni maĩ ngili mĩongo ĩtano. Maĩ asikalĩ mesĩ kaũ nesa na meyũmbanĩtye kũthi kaũnĩ, mena mĩio ya kaũ ya mĩthemba yonthe, matetheesye Ndeviti meyumĩtye vyũ.

34Andũ ma mbaĩ ya Navutalĩ maĩ atongoi ngili ĩmwe. Atongoi asu maĩ vamwe na andũ ngili mĩongo ĩtatũ na mũonza, ala makuĩte ngao na matumo.

35Andũ ma mbaĩ ya Ndani maĩ ngili mĩongo ĩlĩ na nyanya na maana thanthatũ meyũmbanĩtye kũthi kaũnĩ.

36Andũ ma mbaĩ ya Aseli maĩ ngili mĩongo ĩna mesĩ kaũ nesa na meyũmbanĩtye kũkita.

37Kuma ngalĩko ya wumĩlonĩ wa syũa ya Ũsĩ wa Yolotani, andũ kuma mbaĩnĩ ya Lũveni, ya Ngandi na nyusu ya mbaĩ ya Manase, maĩ ngili ĩana na mĩongo ĩlĩ, makuĩte mĩio ya kaũ ya kĩla mũthemba.

38Andũ asu onthe, ala maĩ asikalĩ ma kaũ meyũmbanĩtye kũkita, nĩmaendie Eviloni me na kĩeleelo kĩmwe kĩnene, kya kũtw'ĩkĩthya Ndeviti mũsumbĩ wa Ĩsilaeli yonthe. Andũ ala angĩ onthe ma Ĩsilaeli o namo maĩ na kĩeleelo o kyu kĩmwe kya kũtw'ĩkĩthya Ndeviti mũsumbĩ.

39Mekalile vau me na Ndeviti vandũ va mĩthenya ĩtatũ, maiya na kũnyw'a syĩndũ ila andũ ala angĩ ma Ĩsilaeli mamaeteete.

40O ta ũu andũ nĩmookie maumĩte kũndũ kũasa ta isionĩ sya nthĩ ya Isakali, Nzevuluni na Navutalĩ, maete lĩu maũkuĩte na mang'oi, ngamĩle, nyũmbũ na nzaũ. Nĩmaetie lĩu mwingĩ wa mũtu, tũkũmbwa twa matunda momũ ma makũyũ, nzavivũ mbovu, ndivai, mauta, ng'ombe na malondu maingĩ mũno. Lĩu ũsu w'onthe waetetwe nũndũ wa ũtanu ũla andũ ma Ĩsilaeli maĩ naw'o.

← Chapter 11 Jump to: Chapter 13 →