1 Chronicles 26

Kamba (MBIVILIA ŨVOO MŨSEO)

← Chapter 25 Jump to: Chapter 27 →

1Alivai ala matethasya wĩa ta asikalĩ ma kũsunga mĩvĩa ya Ĩkalũ maanĩw'e wĩa ta ũũ: Kuma mũsyĩnĩ wa Kola vaĩ Meselemia mwana wa Kole, kuma nzyawanĩ sya Asavu.

2Meselemia aĩ na ana mũonza, na maandĩkĩtwe vaa kũatĩanĩa na ũkũũ woo: Nzekalia, Yetiaeli, Nzevatia, Yathinieli,

3Elamu, Yeoanani na Elioenai.

4O ta ũu vaĩ Oveti-etomu ũla waĩ na ana nyanya, na maandĩkĩtwe vaa kũatĩanĩa na ũkũũ woo: Semaia, Yeosavatu, Yoa, Sakali, Nethaneli,

5Amieli, Isakali na Veulethai.

6Semaia mwana ũla mũkũũ wa Oveti-etomu, o nake aĩ na ana. Ana asu maĩ atongoi mũsyĩnĩ wa ĩthe woo, nũndũ maĩ na ũtonyi mwingĩ wa kwĩka maũndũ.

7Ana asu nĩ: Othini, Levaeli, Oveti, na Elisavati. Eliu na Semakia ana-a-ĩthe ma Semaia maĩ ngũmbaũ.

8Asu onthe maĩ nzyawa sya Oveti-etomu. Onthe vamwe na ana moo na ana-a-ĩthe moo maĩ andũ mĩongo thanthatũ na elĩ. Maĩ na ũkũmbaũ na vinya wa kũsunga mĩvĩa ya Ĩkalũ.

9Mũsyĩnĩ wa Meselemia navo vaumĩte andũ ĩkũmi na nyanya ala maĩ na ũtonyi wa kwĩka maũndũ; asu maĩ ana make na ana-a-ĩthe make.

10Kuma mũsyĩnĩ wa Melali vaĩ Osa, ũla ana make maĩ ana: Simili (ũla watw'ĩkĩthiw'e mũtongoi nĩ ĩthe wake, o na vala ti we waĩ mwana ũla mũkũũ),

11Ilikia, Tevalia na Nzekalia ana ma Osa na ana-a-ĩthe make, ala masungaa mĩvĩa ya Ĩkalũ maĩ ĩkũmi na atatũ.

12Asikalĩ ma kũsunga mĩvĩa ya Ĩkalũ nĩmaanĩtw'e ikundi kwĩanana na atongoi moo, na nĩmaaĩwe mawĩa ma kũtethya Ĩkalũnĩ o ũndũ ana-a-ĩthe moo maaĩwe.

13Kĩla mũsyĩ, o na ethĩwa nĩ mũnene kana nĩ mũnini, nĩwakũnaa kula nĩ kana ũmanye waĩlĩte kũsunga mũvĩa wĩva.

14Kula ya kũsunga mũvĩa ũla wĩ wumĩlonĩ wa syũa yavalũkĩle Selemia, nake mwanae Nzekalia, mũndũ wanenganae ũtao mũseo mavinda onthe, avalũkĩlwa nĩ kula ya kũsunga mũvĩa ũla wĩ ngalĩkonĩ ya ĩũlũ.

15Kula ya kũsunga mũvĩa wa ngalĩko ya ĩtheo yavalũkĩle Oveti-etomu, nayo kula ya kũsunga nyũmba ya kwia syĩndũ yavalũkĩla ana make.

16Suvimu na Osa mavalũkĩlwe nĩ kula ya kũsunga mũvĩa ũla wĩ ngalĩko ya ũthũĩlonĩ wa syũa, na mũvĩa wa Salekethi ũla wĩ nzĩanĩ ĩla yĩ ĩũlũ. Asikalĩ nĩmatethasya wĩa wa kũsunga mayumanĩsya.

17Kĩla mũthenya, ngalĩko ya wumĩlonĩ wa syũa veethĩawa asikalĩ thanthatũ ma kũsunga, asikalĩ ana ngalĩko ya ĩũlũ, asikalĩ ana ngalĩko ya ĩtheo, na asikalĩ ana ma kũsunga nyũmba sya kwia syĩndũ; elĩ maisunga nyũmba ĩmwe, na angĩ elĩ maisunga ĩla ĩngĩ.

18Vakuvĩ na valanda ũla waĩ ũthũĩlonĩ wa syũa, veethĩawa asikalĩ ana ma kũsunga nzĩanĩ, na asikalĩ elĩ ma kũsunga valanda ũsu.

19Isu nĩsyo ikundi sya asikalĩ ma kũsunga mĩvĩa ya Ĩkalũnĩ, ala maĩ nzyawa sya Kola na sya Melali.

20Katĩ wa Alivai, Aiya nĩwe wanengetwe wĩa wa kũũngamĩa vala vaiawa ũthwii wa Ĩkalũ, na tũsũmba tũla twaiawa syĩndũ ila syavathĩwe Ngai.

21Latani, ũmwe wa nzyawa sya Ngelisoni, aĩ ũmae wa ikundi syĩana ũndũ mũna sya mĩsyĩ, vamwe na mũsyĩ wa Yeieli mwana wake.

22Ana elĩ ma Yeieli, ala nĩ Nzethamu na Yoeli, maũngamĩe vala vaiawa ũthwii wa Ĩkalũ.

23Nzyawa sya Amilamu, Isali, Eviloni na Usieli o nasyo nĩsyanengiwe wĩa.

24Sevueli, nzyawa ya Ngelisoni mwana wa Mwose, nĩwe waĩ mũũngamĩi mũnene wa vala vaiawa ũthwii wa Ĩkalũ.

25Kwĩsĩla vala ve Elieseli mwana-a-inyia wa Ngelisoni, Sevueli aĩ mwana-a-ĩthe wa Selomithi. Elieseli aĩ ĩthe wa Leavia, Leavia aĩ ĩthe wa Yesaia, Yesaia aĩ ĩthe wa Yolamu, Yolamu aĩ ĩthe wa Nzikili, Nzikili aĩ ĩthe wa Selomithi.

26Selomithi vamwe na andũ ma mũsyĩ wake, nĩmo maũngamĩe kũndũ kw'onthe kũla kwaiawa syĩndũ ila syaumĩtw'e nĩ Mũsumbĩ Ndeviti, na akaivatha syĩthĩwe mĩthĩnzĩo kwa Ngai. O ta ũu nĩmo maũngamĩe kũla kwaiawa syĩndũ ila syaumĩtw'e nĩ atongoi ma mĩsyĩ, anene ma asikalĩ ngili, atongoi ma asikalĩ ĩana, na atongoi ala angĩ na asikalĩ ma kaũ.

27Nĩmoosie syĩndũ imwe ila matavĩte me kaũnĩ, na maivatha itũmĩwe kũtũngĩĩa Ĩkalũ ya Mwĩai Ngai.

28Selomithi vamwe na andũ ma mũsyĩ wake nĩmo maũngamĩe syĩndũ ila syavathĩtwe nĩ mwathani Samũeli, Mũsumbĩ Saũlo mwana wa Kisi, Avineli mwana wa Neli na Yoavu mwana wa Nzeluia.

29Andũ kuma nzyawanĩ sya Isali, Kenania na ana make nĩmanengiwe wĩa ũte wa Ĩkalũnĩ. Nĩmo maandĩkaa na kwia maũndũ, na kũsilany'a makoani katĩ wa andũ ma Ĩsilaeli.

30Andũ kuma nzyawanĩ sya Eviloni, Asavia na ana-a-ĩthe make ngili ĩmwe na maana mũonza, maĩ andũ mena ũtonyi, na nĩmanengiwe wĩa wa kũũngamĩa maũndũ onthe ma kĩ-ũthaithi na wĩa wa mũsumbĩ, andũnĩ ma Ĩsilaeli ala matwĩe ngalĩko ya ũthũĩlonĩ wa syũa ya Ũsĩ wa Yolotani.

31Yelia nĩwe waĩ mũtongoi wa nzyawa sya Eviloni. Mwakanĩ wa mĩongo ĩna wa kũsumbĩka kwa Ndeviti, mĩsyĩnĩ ya nzyawa sya Eviloni, nĩkwamanthiwe na kwooneka asikalĩ me ũtonyi mekalaa Yaseli kĩsionĩ kya nthĩ kya Ngileati.

32Mũsumbĩ Ndeviti nĩwanyuvie andũ ngili ilĩ na maana mũonza, atongoi ma mĩsyĩ me ũtonyi, ala maĩ ana-a-ĩthe ma Yelia. Nĩwamanengie wĩa wa kũũngamĩa maũndũ ma kĩ-ũthaithi na mawĩa ma mũsumbĩ, kĩsionĩ kya nthĩ ya Ĩsilaeli kĩla kĩ ngalĩko ya wumĩlonĩ wa syũa ya Ũsĩ wa Yolotani: Isionĩ sya Lũveni, Ngandi na mbaĩ ya Manase ĩla yatwĩe wumĩlonĩ wa syũa.

← Chapter 25 Jump to: Chapter 27 →