1 Chronicles 23

Kamba (MBIVILIA ŨVOO MŨSEO)

← Chapter 22 Jump to: Chapter 24 →

1Yĩla Ndeviti waĩ na ũkũũ wa myaka mingĩ, nĩwatw'ĩkĩthisye mwana wake Solomoni mũsumbĩ wa Ĩsilaeli.

2Mũsumbĩ Ndeviti nĩwoombanisye vamwe atongoi onthe ma Ĩsilaeli, athembi na Alivai.

3Nĩwatalile aũme onthe Alivai ala maĩ na ũkũũ wa myaka mĩongo ĩtatũ na mbee. Ũtalo woo waĩ ngili mĩongo ĩtatũ na nyanya.

4Ndeviti nĩwamaaĩie wĩa ta ũũ: Aũme ngili mĩongo ĩlĩ na inya nĩwamanengie wĩa wa kũthũkũma Ĩkalũnĩ, angĩ ngili thanthatũ wĩa wa kwia maũndũ ala maandĩke na kũtw'a makoani,

5angĩ ngili inya wĩa wa kũsunga, na angĩ ngili inya wĩa wa kũtaĩa Mwĩai Ngai, maitũmĩa mĩio ya mbathi ĩla yanenganĩtwe nĩ mũsumbĩ kwondũ wa wĩa ũsu.

6Ndeviti nĩwaanisye Alivai ikundi itatũ kwĩanana na ana ma Livai ala nĩ Ngelisoni, Koathi, na Melali.

7Ngelisoni aĩ na ana elĩ ala nĩ Latani na Simei.

8Latani aĩ na ana atatũ ala nĩ Yeieli ũla mũkũũ, Nzethamu na Yoeli.

9Ana atatũ ma Simei ala nĩ Selomothi, Aasieli na Aalani nĩmo maĩ atongoi ma mĩsyĩ ya Latani.

10Ana ma Simei maĩ ana: Yaathi, Nzina, Yeusi na Mbelia.

11Yaathi nĩwe waĩ wa mbee, na Nzina nĩwe waĩ wa kelĩ. Ĩndĩ Yeusi na Mbelia mayaĩ na ana aingĩ, na kwoou matalwa ta mũsyĩ ũmwe na manengwa wĩa wa mũthemba ũmwe.

12Ana ma Koathi maĩ ana: Amilamu, Isali, Eviloni, na Usieli.

13Amilamu mwana wake ũla mũkũũ nĩwe waĩ ĩthe wa Alũni na Mwose. (Alũni na nzyawa syake nĩmavathĩtwe tene na tene kwondũ wa wĩa wa syĩndũ ila ntheu, kũvĩvya ũvani ũthaithinĩ wa Mwĩai Ngai, kũmũthũkũma, na kũathimaa andũ ĩsyĩtwanĩ yake.

14Ana ma Mwose, mũndũ wa Ngai, matalĩtwe ta amwe ma mbaĩ ya Livai.)

15Ana ma Mwose maĩ elĩ: Ngelisoni na Elieseli.

16Mũtongoi wa ana ma Ngelisoni eetawa Sevueli.

17Elieseli aĩ na mwana o ũmwe weetawa Leavia, ĩndĩ Leavia aĩ na nzyawa mbingĩ.

18Mwana wa Koathi wa kelĩ ũla weetawa Isali aĩ na mwana weetawa Selomithi. Selomothi nĩwe waĩ mũtongoi wa mũsyĩ wa Koathi.

19Ana ma Eviloni mwana wa katatũ wa Koathi maĩ ana: Yelia ũla nĩwe waĩ mũkũũ, Amalia nĩwe waĩ wa kelĩ, Yaanzieli wa katatũ na Yekameamu wa kana.

20Usieli mwana wa kana wa Koathi aĩ na ana elĩ: Mika ũla waĩ mũkũũ, na Isia wa kelĩ.

21Melali aĩ na ana elĩ: Mali na Musi. Ana ma Mali maĩ Eleasali na Kisi.

22Ĩndĩ Eleasali akwie ate ana; aĩ na eĩtu oka. Eĩtu make matwaiwe nĩ ana ma Kisi, ala maĩ ana-a-ĩthe moo.

23Musi mwana wa kelĩ wa Melali aĩ na ana atatũ: Mali, Eteli na Yelemothi.

24Isu nĩsyo nzyawa sya Livai kwĩanana na mĩsyĩ ya aaũmae moo, na atongoi ma mĩsyĩ ya aaũmae moo, kwĩanana na masyĩtwa ma andũ ala matalilwe, ala maĩ na ũkũũ wa myaka mĩongo ĩlĩ na mbee. Onthe nĩmanengiwe wĩa wa kũthũkũma Ĩkalũnĩ ya Mwĩai Ngai.

25Ndeviti nĩwaneenie asya atĩĩ, “Mwĩai Ngai, Ngai wa Ĩsilaeli nũnengete andũ make mũuo, nake akekalaa Yelũsalemu tene na tene.

26Kwoou vai vata ĩngĩ wa Alivai kũkua Ĩeema ĩtheu ya kũkomanĩa na Mwĩai Ngai, na syĩndũ syayo ila itũmĩawa ũthaithinĩ.”

27Kumana na ndeto sya mũthya sya Ndeviti, Alivai ala maĩ na ũkũũ wa myaka mĩongo ĩlĩ na mbee nĩmatalilwe.

28Wĩa wa Alivai waĩ kũtetheesya nzyawa sya Alũni wĩanĩ wa Ĩkalũ ya Mwĩai Ngai: Kũsũvĩa iwanza, nyũmba ila syĩ ũtee, kũthesya syĩndũ syonthe ila ntheu, na kũtethya wĩa ũla ũngĩ waĩ Ĩkalũnĩ ya Mwĩai Ngai.

29O ta ũu nĩmaũngamĩe wĩa wa mũkate ũthembeetwe Mwĩai Ngai ũla waiawa mesanĩ, mũtu kwondũ wa nthembo ya ngetha ya mbaa mbeke, tũmĩkate tũvũthũ tũuĩtwe tũte mbota, wĩa wa kũua nthembo ya mũkate, kũvulany'a nthembo na mauta, na kũthima wingĩ na ũnene wa syĩndũ.

30Nĩmaũngamaa kĩla kwakya makataĩa Mwĩai Ngai, na kũmũtũngĩa mũvea. O ta ũu nĩmaaĩlĩte kwĩka ũu ĩa mawĩoo,

31mũthenyanĩ wa Savato, ĩvindanĩ ya Mboka ya Kũtisa kwa Mwei na ĩvindanĩ ya mboka ila ingĩ itw'ĩtwe, yĩla nthembo sya kũvĩvw'a ikũthembwa. Maaĩlĩte kũthũkũma kĩla ĩvinda mbee wa Mwĩai Ngai me ũtalo ũla wĩanĩe, na kwa nzĩa ĩla ĩvangĩtwe.

32Kwoou Alivai nĩmatethasya wĩa woo kwondũ wa Ĩeema ĩtheu ya kũkomanĩa na Mwĩai Ngai, na Vala Vandũ Vatheu. O ta ũu nĩmatetheeasya ana-a-ĩthe moo nzyawa sya Alũni, kwondũ wa wĩa wa Ĩkalũ ya Mwĩai Ngai.

← Chapter 22 Jump to: Chapter 24 →