1 Chronicles 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Ii nĩsyo nzyawa sya Lũveni mwana ũla mũkũũ wa Yakovo. (O na vala Lũveni nĩwe waĩ mwana ũla mũkũũ, kĩla kyamwaĩlĩte ta we mwana ũla mũkũũ nĩkyanengiwe ana ma Yosevu mwana-a-ĩthe, nũndũ Lũveni nĩwamanyanie kĩ-mwĩĩ na kĩveti mũthũkũmi kya ĩthe wake. Nũndũ wa ũu, Lũveni ndaandĩkĩtwe mosyaanĩonĩ ma ana ma Yakovo, kwĩanana na vala wasyaĩlwe ta we mwana ũla mũkũũ.

2O na vala mbaĩ ya Yuta nĩyo yaĩ nguma mbee wa ila ingĩ, na mũsumbĩ wa andũ ma Ĩsilaeli aumĩte mbaĩnĩ ĩsu, kĩndũ kĩla kyaaĩlĩte kũnengwa mwana ũla mũkũũ kyaĩ kya Yosevu.)

3Ana ma Lũveni mwana ũla mũkũũ wa Yakovo maĩ Anoki, Valu, Esiloni na Kalimi.

4Yoeli aĩ na mwana weetawa Semaia. Semaia aĩ ĩthe wa Ngoki, Ngoki aĩ ĩthe wa Simei,

5Simei aĩ ĩthe wa Mika, nake Mika aĩ ĩthe wa Leaia. Leaia aĩ ĩthe wa Mbaali,

6nake Mbaali aĩ ĩthe wa Mbeela. Mbeela ũla wakwatiwe nĩ Tikilathi-vileseli mũsumbĩ wa Asuli amũtwaa nthĩ ya ũeninĩ, aĩ mũtongoi wa mbaĩ ya Lũveni.

7Aa nĩmo ana-a-ĩthe moo kũatĩĩa mĩsyĩ yoo yĩla mosyaanĩo ma nzyawa syoo matalilwe: Yeieli ũla waĩ mũnene woo, Nzekalia,

8Mbela mwana wa Asasi, Asasi mwana wa Seema, Seema mwana wa Yoeli. Asu matũie kĩsionĩ kya nthĩ kĩla kyumĩte Aloeli nginya Nevo na Mbaali-meoni.

9Maĩ na ndĩthya nene sya indo me nthĩ ya Ngileati, na kwoou matũie kĩsionĩ kĩnene kya nthĩ kĩla kyaendete nginya wumĩlonĩ wa syũa, weũnĩ ũla ũendete nginya Ũsĩnĩ wa Euvalati.

10Ĩvindanĩ yĩla Saũlo wasumbĩkĩte, mbaĩ ya Lũveni nĩyavithũkĩie Aakali, mokita namo na mamoaa na matũa maeemanĩ moo, kĩsionĩ kyonthe kya ngalĩko ya wumĩlonĩ wa syũa ya Ngileati.

11Mbaĩ ya Ngandi yatwĩe ngalĩko ya ĩũlũ ya mbaĩ ya Lũveni, kĩsionĩ kya nthĩ ya Mbasani kũthi kũvika Saleka.

12Yoeli nĩwe waĩ mũtongoi woo, akaatĩĩwa nĩ Savamu, na ĩndĩ Yaanai na Savati.

13Andũ ala angĩ ma mbaĩ ya Ngandi maumĩte mĩsyĩnĩ ĩno mũonza; Mikaeli, Mesulamu, Sieva, Yoali, Yakoni, Nzia na Eeveli.

14Asu maĩ nzyawa sya Aviaili mwana wa Uuli, Uuli mwana wa Yaloa, Yaloa mwana wa Ngileati, Ngileati mwana wa Mikaeli, Mikaeli mwana wa Yeisai, Yeisai mwana wa Yato, nake Yato mwana wa Mbusi.

15Mũtongoi wa mĩsyĩ ĩsu aĩ Aai mwana wa Avitieli na ũmae wake eetawa Nguni.

16Andũ asu matwĩe kĩsionĩ kya nthĩ kya Mbasani na kya Ngileati. Matwĩe ndũanĩ ila syaĩ kũu, na isesinĩ sya kũĩthĩsya indo ila syaĩ Saloni.

17Andũ asu onthe matalilwe kwĩanana na mosyaanĩo moo, ĩvindanĩ yĩla Yothamu waĩ mũsumbĩ wa Yuta, na ĩvindanĩ yĩla Yelovoamu waĩ mũsumbĩ wa Ĩsilaeli.

18Mbaĩ ya Lũveni, ya Ngandi, na nyusu ya mbaĩ ya Manase maĩ na aũme ngili mĩongo ĩna na inya, maana mũonza na mĩongo thanthatũ ala meeyũmbanĩtye kũthi kaũnĩ. Maĩ andũ me na vinya matonya kũtũmĩa ngao, ũvyũ, na ũta. Maĩ amanyĩsye nesa.

19Nĩmaendie kũkita na andũ ma mbaĩ sya Aakali, Yetuli, Navisi na Notavu.

20Aũme asu nĩmamwĩkwatisye Ngai na mamũvoya amatetheesye; Ngai nĩwasũngĩie mboya yoo na atuma masinda Aakali, o vamwe na andũ ala maĩ na ngwatanĩo namo.

21Nĩmatavie indo syoo: Ngamĩle ngili mĩongo ĩtano, malondu ngili maana elĩ na mĩongo ĩtano, mang'oi ngili ilĩ, na o ta ũu matwaa andũ ngili ĩana yĩmwe me ove.

22Nĩmooaie amaitha moo aingĩ kaũnĩ ũsu, nũndũ Ngai nĩwe wendie masinde. Nĩmaendeeie kwĩkala kĩsionĩ kĩu kya nthĩ, nginya ĩvindanĩ yĩla mesie kũtwawa nthĩ ya ũeninĩ me ove.

23Andũ ma nyusu ya mbaĩ ya Manase ma wumĩlonĩ wa syũa maĩ aingĩ. Nĩmatũie kĩsionĩ kya nthĩ ĩla yĩ kuma Mbasani kũthi kũvika Mbaali-elimoni, Senili na Kĩĩma kya Elimoni.

24Aa nĩmo maĩ atongoi ma mĩsyĩ yoo: Eveli, Isi, Elieli, Anzilieli, Yelemia, Otavia, na Yatieli. Asu onthe maĩ asikalĩ ngũmbaũ na atongoi me nguma ma mbaĩ syoo.

25Andũ ma nyusu ya mbaĩ ya Manase ala matwĩe wumĩlonĩ wa syũa nĩmeethĩiwe mate aĩkĩĩku kũla kwĩ Ngai wa aaũmae moo. Nĩmamũtiie na mambĩĩa kũthaitha ngai sya andũ ala Ngai walũngĩtye kuma nthĩ ĩla matwĩe.

26Nũndũ wa ũu, Ngai nĩwatumie mũsumbĩ Vulu wa Asuli (Ũla kwa ĩsyĩtwa yĩngĩ weetawa Tikilathi-vileseli) avithũkĩa nthĩ yoo. Nĩwakwatie mbaĩ sya Lũveni, Ngandi na nyusu ya mbaĩ ya Manase amaumya nthĩ ĩsu na amatwaa makatũe Aalaa, Avoli, Aala na ũtee wa Ũsĩ wa Ngosani; o na ũmũnthĩ matwĩe kw'o.

← Chapter 4 Jump to: Chapter 6 →