Joshua 13

Kamba (MBIVILIA ŨVOO MŨSEO)

← Chapter 12 Jump to: Chapter 14 →

1Yosua aĩ anakũa mũno. Nĩvo ĩndĩ Mwĩai Ngai wamwĩie atĩĩ, “We yu wĩ mũkũũ mũno, ĩndĩ ve nthĩ nene ĩla andũ ma Ĩsilaeli matialĩtye kwosa mamesye.

2Nthĩ ĩla ĩtialĩte kwoswa nĩyo ĩno: Isio syonthe sya nthĩ ya Avilisiti na Angesuli.

3Isio isu nĩ kuma Ũsĩ wa Sioli ũla wĩ ngalĩko ya wumĩlonĩ wa syũa wa nthĩ ya Misili, kũthi kũvika kĩsionĩ kya Ekeloni kĩla kĩ ngalĩko ya ĩũlũ. Isio isu syonthe italawa kwĩthĩwa nthĩ ya Kanaani ila isumbĩkĩtwe nĩ asumbĩ atano ma Avilisiti ala masumbĩkaa me ndũanĩ ya Ngasa, Asitoti, Asikeloni, Ngathi na ya Ekeloni. O ta ũu kĩsio kya Aavi nĩkyaĩlĩte kũkwatwa.

4Isio sya ngalĩko ya ĩtheo ila itialĩte kũkwatwa nĩ nthĩ yonthe ya Akanaani kuma ndũanĩ ya Meala ya andũ ma Sitoni, kũthi kũvika Aveki kĩsio kya Aamoli,

5kĩsio kya Angevali na Levanoni yonthe kũthi kũvika ngalĩko ya wumĩlonĩ wa syũa, kuma Mbaali-ngandi ĩtheo wa Kĩĩma kya Elimoni kũthi kũvika Levo-amathi.

6Kĩsio kĩu nĩ vamwe na kĩsio kyonthe kya Asitoni ala matũaa nthĩ yĩ iĩma katĩ wa iĩma sya Levanoni, na ndũa ya Misilevothi-maimu. Nyie mwene ngalũngya andũ asu onthe yĩla andũ ma Ĩsilaeli meambĩĩa kũlika nthĩ ĩsu. We naku no nginya ũaany'e nthĩ ĩsu katĩ wa andũ ma Ĩsilaeli, kwĩanana na ũndũ ngwĩaĩĩte wĩke.

7Aany'a nthĩ ĩsu ĩtw'ĩke ng'ũndũ ya mbaĩ ila ingĩ kenda, na nyusu ya mbaĩ ya Manase.”

8Mbaĩ ya Lũveni na mbaĩ ya Ngandi na nyusu ya mbaĩ ya Manase maĩ manakwata nthĩ ĩla Mwose mũthũkũmi wa Mwĩai Ngai wamanengete; nthĩ ĩsu yaĩ ngalĩko ya wumĩlonĩ wa syũa ya Ũsĩ wa Yolotani.

9Kĩsio kĩu kyoo kyaendete kĩkavika ndũanĩ ya Aloeli, ĩla yĩ ũtee wa Mwanda wa Alinoni na ndũa ĩla yĩ mwandanĩ ũsu katĩ o vamwe na ũiĩ w'onthe ũla wumĩte ndũanĩ ya Meteva kũthi kũvika Ndivoni.

10Kĩsio kĩu kyaendete kũvika mũvakanĩ wa ndũa ya Amimoni na kyaĩ vamwe na ndũa syonthe ila syasumbĩkĩtwe nĩ Sioni mũsumbĩ wa Aamoli, ũla wasumbĩkĩte e Esivoni.

11O ta ũu nthĩ ĩsu yaĩ vamwe na ndũa ya Ngileati, isio sya Ngesuli na Maaka, kĩĩma kyonthe kya Elimoni, na ndũa ya Mbasani yonthe kũthi kũvika Saleka.

12O ta ũu nthĩ ĩsu yaĩ vamwe na kĩsio kya Mbasani kĩla kyasumbĩkĩtwe nĩ Oku, ũmwe wa ala andũ anene matialĩte meetawa Alevai. Oku asumbĩkĩte ayĩkala nyũmbanĩ syake sya kĩ-ũsumbĩ ila syaĩ ndũanĩ sya Asitalothi na Atilei. Mwose nĩwasindie andũ asu onthe kaũnĩ na amalũngya mauma nthĩ ĩsu.

13Ĩndĩ andũ ma Ĩsilaeli mayaalũngya andũ ma ndũa sya Ngesuli na Maaka, na mekalanasya namo kũvika o na ũmũnthĩ.

14Mwose ndaanenga Alivai kĩsio kya nthĩ kĩthĩwe ũtiĩwa woo. Ũtiĩwa wa Alivai ũla maaĩlĩte kũkwata waĩ nthembo ila syavĩvaw'a kĩthembeonĩ ithembewe Mwĩai Ngai, Ngai wa Ĩsilaeli o tondũ weeaĩĩte Mwose.

15Mwose nĩwanengie andũ ma mbaĩ ya Lũveni kĩlungu kya nthĩ kĩthĩwe ng'ũndũ yoo. Amanengie kwĩanana na mĩsyĩ yoo.

16Kwoou kĩsio kya nthĩ yoo kyaumĩte Aloeli ĩla yaĩ ũtee wa Mwanda wa Alinoni na ndũa ĩla yĩ mwandanĩ ũsu katĩ wa ũiĩ w'onthe ũla waĩ Meteva.

17O ta ũu kĩsio kĩu kya nthĩ kyaĩ vamwe na ndũa ya Esivoni, na ndũa syonthe ila syaĩ ũiĩnĩ ila nĩ Ndivoni, Mbamothi-mbaali, Mbethi-Mbaali-Meoni.

18Yaasa, Ketemothi, Mevaathi,

19Kiliathaimu, Sivima, Nzelethi-saali ĩla yĩ kĩĩmanĩ kĩla kĩ mwandanĩ ũsu,

20Mbethi-veoli, ivaũũko sya Kĩĩma kya Visika, na Mbethi-yesimothi.

21Kĩsio kĩu kyaĩ vamwe na ndũa syonthe ila syaĩ ũiĩnĩ ũsu, na ndũa syonthe ila syasumbĩkĩtwe nĩ Sioni mũsumbĩ wa Aamoli, ũla wasumbĩkaa e Esivoni. Mwose nĩwamũsindie na o ta ũu asinda asumbĩ ma Mitiani ala nĩ Evi, Lekemu, Nzuli, Uulu, na Leva. Asu onthe maĩ atetheesya ma Sioni.

22Katĩ wa andũ ala andũ ma Ĩsilaeli mooaie, Mbalaamu mwana wa Mbeoli, ũla wathanaa maũndũ aĩ ũmwe wamo.

23Mũvaka wa andũ ma mbaĩ ya Lũveni waĩ ũsĩ wa Yolotani. Kĩsio kĩu nĩkyo kyaĩ ng'ũndũ ya andũ ma mbaĩ ya Lũveni vamwe na mĩsyĩ, ndũa, na motũi moo.

24Mwose nĩwanengie andũ ma mbaĩ ya Ngandi vamwe na mĩsyĩ yoo kĩlungu kya nthĩ kĩthĩwe ng'ũndũ yoo.

25Kĩsio kĩu kyoo kyaĩ vamwe na Yoseli, na ndũa syonthe sya Ngileati na nyusu ya kĩsio kya nthĩ kya Amimoni kĩla kyaendete nginya ndũanĩ ya Aloeli ĩla yĩ ngalĩko ya wumĩlonĩ wa syũa ya ndũa ya Lava.

26Kĩsio kya nthĩ ĩsu yoo kyaumĩte Esivoni kũthi kũvika Lamathi-misive na Mbetonimu na kuma Maanaimu kũthi kũvika mũvakanĩ wa Ndevili.

27Mwandanĩ wa Yolotani kĩsio kĩu kyaĩ vamwe na Mbethi-alamu, Mbethi-nimila, Sukothi, Nzavoni, na kĩsio kya ũsumbĩ wa Esivoni kĩla kyatialĩte. Mũvaka wa kĩsio kĩu waĩ Ũsĩ wa Yolotani kwambata kũthi kũvika ngalĩko ya ĩũlũ ya Ĩia ya Kalilii.

28Isu nĩsyo ndũa na motũi ala manengiwe andũ ma mbaĩ ya Ngandi syĩthĩwe ng'ũndũ yoo kwĩanana na mĩsyĩ yoo.

29Mwose nĩwanengie nyusu ya andũ ma mbaĩ ya Manase kĩsio kya nthĩ kĩthĩwe ng'ũndũ yoo kwĩanana na mĩsyĩ yoo.

30Kĩsio kĩu kyoo kyaumĩte Maanaimu kwĩsĩla Mbasani yonthe, na kyaĩ vamwe na ũsumbĩ w'onthe wa Oku mũsumbĩ wa Mbasani, ndũa syonthe mĩongo thanthatũ sya Yaili ila syaĩ Mbasani.

31O ta ũu Kĩsio kĩu kyaĩ vamwe na nyusu ya Ngileati, Asitelothi, na Atilei ĩla nĩ mĩsyĩ mĩnene ya Oku mũsumbĩ wa Mbasani. Isio isu syonthe syanengiwe nyusu ya mĩsyĩ ya nzyawa sya Makili mwana wa Manase.

32Ũu nĩw'o Mwose waanisye kĩsio kya nthĩ kĩla kĩ ngalĩko ya wumĩlonĩ wa syũa ya Yeliko na Ũsĩ wa Yolotani yĩla waĩ ũiĩnĩ wa Moavi.

33Ĩndĩ Mwose ndaanenga Alivai kĩlungu kya nthĩ kĩthĩwe ng'ũndũ yoo. Nĩwameie kana ũtiĩwa woo waĩ kĩlungu kya nthembo ila syavĩvĩaw'a kĩthembeonĩ, ithembewe Mwĩai Ngai, Ngai wa Ĩsilaeli.

← Chapter 12 Jump to: Chapter 14 →