Joshua 20

Kamba (MBIVILIA ŨVOO MŨSEO)

← Chapter 19 Jump to: Chapter 21 →

1Mwĩai Ngai nĩwaneenie na Yosua amwĩa atĩĩ,

2“Neena na andũ ma Ĩsilaeli ũmee nĩmanyuve ndũa sya wĩvitho kwĩanana na ũndũ nakwĩaĩe kwĩsĩla vala ve Mwose.

3Mũndũ ũla ũkoaa ũngĩ kwa mbanga nũtonya kũkĩa akathi kwĩvitha ndũanĩ isu, nĩ kana evithe mũndũ wa mũsyĩ wa mũndũ ũla ũnooaiwe ũla ũkũmũmantha eyĩĩvanĩsye.

4Mũndũ ũsu wũaanĩte kwa mbanga nũtonya kũthi kwĩvitha ndũanĩ ĩmwe ya isu. Avika mũvĩanĩ wa ndũa nĩaũngame vala andũ masilĩlawa na aielesya atongoi mayo ũndũ ũla wĩkĩkĩte. Nĩvo ĩndĩ atongoi asu memwĩtĩkĩlya ekale ndũanĩ ĩsu na maimũnenga vandũ va kũtũa ekalae vo.

5Ethĩwa mũndũ ũla ũkwenda kwĩyĩĩvanĩsya nĩwamũatĩĩa nginya ndũanĩ ĩsu, andũ ma ndũa ĩsu mayaĩlĩte kũmũnengane kũla ũĩ. No nginya masiĩĩe mũndũ ũsu nũndũ oaĩte mũtũi wake kwa mbanga na ndatwĩe e ũthũ nake.

6Mũndũ ũsu wũaanĩte kwa mbanga akekala ndũanĩ ĩsu nginya asilĩlwe mbee wa andũ onthe ma Ĩsilaeli, na o ta ũu ayĩkala vo nginya Mũthembi ũla Mũnene wa ĩvinda yĩu akw'e. Ĩtina wa ũu mũndũ ũsu nũtonya kũsyoka mũsyĩ kwake na ndũanĩ yake ĩla waumĩte akĩĩte.”

7Kwoou ngalĩko ya ũthũĩlonĩ wa syũa ya Ũsĩ wa Yolotani, nĩmanyuvie ndũa ya Katesi ĩla yĩ kĩsionĩ kya Kalilii, nthĩ yĩ iĩma ya Navutalĩ, ndũa ya Sekemu ĩla yĩ nthĩ yĩ iĩma ya Evalaimu na ndũa ya Kiliathi-aliva, ĩla kwa ĩsyĩtwa yĩngĩ yĩtawa Eviloni, ĩla yĩ nthĩ yĩ iĩma ya Yuta.

8Ngalĩko ya wumĩlonĩ wa syũa ya Ũsĩ wa Yolotani, weũnĩ ũla wĩ ũiĩnĩ wĩ ngalĩko ya wumĩlonĩ wa syũa ya ndũa ya Yeliko, nĩmanyuvie ndũa ya Mbeseli ĩla yĩ kĩsionĩ kya Lũveni, ndũa ya Lamothi ĩla yĩ Ngileati kĩsionĩ kya Ngandi, na ndũa ya Ngolani ĩla yĩ Mbasani kĩsionĩ kya Manase.

9Isu nĩsyo ndũa sya wĩvitho ila syanyuviwe kwondũ wa andũ onthe ma Ĩsilaeli na aeni ala mekalanasya namo. Mũndũ w'onthe ũla wooaa ũngĩ kwa mbanga nĩwakwataa wĩvitho vau nĩ kana ndakoawe nĩ mũndũ ũla ũkwenda kwĩyĩĩvanĩsya. Mũndũ ũsu ndaĩ atonya kũawa atambĩte kũsilĩlwa mbee wa andũ onthe.

← Chapter 19 Jump to: Chapter 21 →