Joshua 16

Kamba (MBIVILIA ŨVOO MŨSEO)

← Chapter 15 Jump to: Chapter 17 →

1Mũvaka wa ngalĩko ya ĩtheo wa kĩsio kĩla kyanengiwe nzyawa sya Yosevu wambĩĩe vandũ ngalĩko ya wumĩlonĩ wa syũa ya tũlũsĩ tũla twaĩ Yeliko vakuvĩ na Ũsĩ wa Yolotani. Kuma vau mũvaka ũsu nĩwaendete ũkesĩla weũnĩ ũkathi kũlikĩla nthĩ yĩ iĩma kũthi kũvika Mbethi-eli.

2Kuma Mbethi-eli kũthi kũvika ndũanĩ ya Lusu, mũvaka ũsu wesĩlĩte ndũanĩ ya Atalothi, kĩsionĩ kĩla kyatwĩe Aaliki.

3Nĩwaendete ngalĩko ya ũthũĩlonĩ wa syũa ũkavika kĩsionĩ kya nthĩ kya Ayevileti, kũthi kũvika ngalĩko ya ĩtheo ya Mbethi-oloni. Kuma vau mũvaka ũsu nĩwaendete kũvika ndũanĩ ya Ngeseli na ũkathi kũtina Ũkanga wa Menditelenia.

4Nzyawa sya Yosevu ila nĩ mbaĩ ya andũ ma Evalaimu na nyusu ĩla ĩngĩ ya andũ ma mbaĩ ya Manase nĩmanengiwe kĩsio kĩu kya nthĩ kĩthĩwe ng'ũndũ yoo.

5Kĩĩ nĩkyo kĩsio kya nthĩ kĩla kyanengiwe andũ ma mbaĩ ya Evalaimu kwĩanana na mĩsyĩ yoo: Mũvaka wa ng'ũndũ yoo waĩ kuma ndũanĩ ya Atalothi-atali ĩla yĩ ngalĩko ya wumĩlonĩ wa syũa nginya ndũanĩ ya Mbethi-oloni ĩla yĩ ngalĩko ya ĩũlũ.

6Kuma vau mũvaka ũsu waendete nginya ũkatina Ũkanga wa Menditelenia. Ngalĩko ya ĩũlũ mũvaka ũsu wavikĩte ndũanĩ ya Mikimetha. Ngalĩko ya wumĩlonĩ wa syũa, mũvaka ũsu nĩwavĩndũkĩte ũkelekela Taanathi-silo na ũkavĩtĩla ndũanĩ ĩsu ũendete ngalĩko ya wumĩlonĩ wa syũa ũkathi kũvika ndũanĩ ya Yanoa.

7Kuma ndũanĩ ĩsu mũvaka ũsu nĩwaendete ũkesĩla ndũanĩ ya Atalothi, na ya Naala nginya ũkathi kũtina ndũa ya Yeliko na ũkathelela Ũsĩnĩ wa Yolotani.

8Kuma ndũanĩ ya Tavua, mũvaka ũsu waendete kwelekela ngalĩko ya ũthũĩlonĩ wa syũa nginya kalũsĩnĩ ketawa Kana, na ũkathi kũtina Ũkanga wa Menditelenia. Kĩu nĩkyo kĩsio kya nthĩ kĩla kyanengiwe andũ ma mbaĩ ya Evalaimu kwĩanana na mĩsyĩ yoo kĩthĩwe ng'ũndũ yoo.

9Kĩsio kĩu kyaĩ vamwe na ndũa na motũi amwe ala maĩ kĩsionĩ kya andũ ma mbaĩ ya Manase, ĩndĩ kyanengetwe andũ ma mbaĩ ya Evalaimu.

10Ĩndĩ andũ ma mbaĩ ya Evalaimu mayaĩ matonya kũlũngya andũ ma Kanaani ala matwĩe ndũanĩ ya Ngeseli. Kwoou Akanaani mekalanasya na andũ ma mbaĩ ya Evalaimu kũvika o na ũmũnthĩ, ĩndĩ nĩmatw'ĩkĩthisye Akanaani ngombo na mamathũkũmĩthya na vinya.

← Chapter 15 Jump to: Chapter 17 →