Joshua 22

Kamba (MBIVILIA ŨVOO MŨSEO)

← Chapter 21 Jump to: Chapter 23 →

1Yosua nĩweetie andũ ma mbaĩ ya Lũveni, ya Ngandi na nyusu ya andũ ma mbaĩ ya Manase mombane vamwe.

2Nĩwaneenie namo amea atĩĩ, “Nĩmwĩkĩte maũndũ onthe ala Mwose mũthũkũmi wa Mwĩai Ngai weeaie, na o ta ũu nĩmwĩthĩĩtwe mwĩ ewi kũla nĩĩ maũndũnĩ onthe ala namwĩaĩie.

3Vandũ va ĩvinda ĩasa o na kũvika ũmũnthĩ mũyaaĩtĩkĩla kũtia ana-a-ĩthe menyu, ĩndĩ nĩmwaendeeie kũtethya wĩa ũla Mwĩai Ngai, Ngai wenyu wamwĩaĩĩte.

4Mwĩai Ngai, Ngai wenyu nũminĩte kũnenga ana-a-ĩthe menyu mũuo o tondũ wathanie, kwoou syokai kwenyu nthĩ ĩla Mwose mũthũkũmi wa Mwĩai Ngai wamũnengie yĩthĩwe ng'ũndũ yenyu ĩla yĩ ngalĩko ya wumĩlonĩ wa syũa ya Ũsĩ wa Yolotani.

5Ĩsũvĩaei mũno mwĩkae ũndũ Mĩao ĩla Mwose mũthũkũmi wa Mwĩai Ngai wamwĩaĩe ĩkwasya. Mwendei Mwĩai Ngai, Ngai wenyu, ĩkaai kwenda kwake, ĩanĩsyai mĩao yake, ĩthĩwai mwĩ aĩkĩĩku kwake, na kũmũthũkũma na ngoo na thayũ wenyu w'onthe.”

6Kwoou Yosua nĩwamaathimie na ataanĩsya namo. Nĩmaumie vau menũka.

7Mwose nĩwanengete andũ ma nyusu ya mbaĩ ya Manase kĩsio kya nthĩ kĩla kĩ Mbasani, ĩndĩ Yosua nĩwanengie nyusu ĩla ĩngĩ ya mbaĩ ĩsu vamwe na ana-a-ĩthe moo kĩsio kya nthĩ kĩla kĩ ngalĩko ya ũthũĩlonĩ wa syũa ya Ũsĩ wa Yolotani. Yosua atanamba kũtaanĩsya namo nĩwamaathimie

8ayasya atĩĩ, “Mwĩsyoka kwenyu mwĩ na ũthwii mwingĩ; indo, silĩva, thaavu, mbulonzi, kyũma na ngũa mbingĩ. Aanai na ana-a-ĩthe menyu syĩndũ ila mwavenie amaitha menyu.”

9Kwoou andũ ma mbaĩ ya Lũveni, ya Ngandi na nyusu ya andũ ma mbaĩ ya Manase nĩmasyokie mũsyĩ. Nĩmatiie andũ ala angĩ ma mbaĩ ya Ĩsilaeli Silo nthĩ ya Kanaani, na mambĩĩa kyalo kya kũsyoka kwoo Ngileati. Ngileati yaĩ nthĩ ĩla makwatĩte kwĩanana na ũndũ Mwĩai Ngai weeaĩte kwĩsĩla kũla kwĩ Mwose.

10Yĩla andũ ma mbaĩ ya Lũveni, Ngandi na nyusu ya andũ ma mbaĩ ya Manase mavikie ndũanĩ ya Ngelilothi ĩla yĩ nthĩ ya Kanaani vakuvĩ na Ũsĩ wa Yolotani, nĩmaakie kĩthembeo kĩnene na kyanake vakuvĩ na ũsĩ ũsu.

11Andũ ala angĩ ma Ĩsilaeli meew'a kana andũ asu nĩmakĩte kĩthembeo mũvakanĩ wa Kanaani ndũanĩ ya Ngelilothi ngalĩko ĩla yoo vakuvĩ na Ũsĩ wa Yolotani,

12onthe nĩmoombanĩie Silo nĩ kana makokite andũ ma mbaĩ ya Lũveni, ya Ngandi na nyusu ya andũ ma mbaĩ ya Manase.

13Nĩvo ĩndĩ andũ ma Ĩsilaeli matũmie Vineasi mwana wa mũthembi Eleasali athi Ngileati kũla kwĩ andũ ma mbaĩ ya Lũveni, Ngandi, na nyusu ya andũ ma mbaĩ ya Manase.

14Vineasi atũmanĩiw'e vamwe na atongoi ĩkũmi, ũmwe kuma kĩla mbaĩnĩ ya andũ ma Ĩsilaeli, na e mũtongoi wa ũmwe wa mĩsyĩ ya mbaĩ isu.

15Nĩmaendie mavika Ngileati kũla kwĩ andũ ma mbaĩ sya Lũveni, Ngandi, na nyusu ya andũ ma mbaĩ ya Manase. Nĩmaneenie namo mamea atĩĩ,

16“Wũmbano w'onthe wa andũ ma Mwĩai wĩmũkũlya atĩĩ, ‘Mũtonya kwananga ũĩkĩĩku wenyu kwa Ngai wa Ĩsilaeli ũu ata? Nĩ kyaũ kĩtumie mũtia Mwĩai Ngai na kwĩyakĩa kĩthembeo nĩ kana mũmũlee?

17Nĩmũũlilikana naĩ ĩla tweekie twĩ Veoli yĩla Mwĩai Ngai wakanisye andũ make mwene kwa kũmaetee ũwau mũthũku? O na ũmũnthĩ notũendee kũthĩna nũndũ wa ũu. Ũkany'o wa naĩ ĩsu nowaaĩthĩwa wĩ mwĩanĩu kwitũ?

18Nĩmũũlea kũmũatĩĩa yu? Mwalea kũmwĩw'a Mwĩai Ngai ũmũnthĩ, ũnĩ akathata nũndũ wa andũ ma Ĩsilaeli onthe.

19Yu ĩndĩ ethĩwa nthĩ yenyu ti nzeo kwa kũthaithĩwa, ingai mũke ngalĩko ĩno ya Mwĩai Ngai vala ve Ĩeema yake ĩtheu. Kũlyai mũnengwe kĩsio kya nthĩ kũũ kwitũ. Ĩndĩ mũikatate kũlea kwĩw'a Mwĩai Ngai, kana mũlee kwĩw'ana naitũ kwa nzĩa yenyu kwĩyakĩa kĩthembeo kĩngĩ kĩla kya Mwĩai Ngai, Ngai waitũ kĩovo.

20Lilikanai ũndũ Akani mwana wa Nzela waleile kwĩanĩsya mwĩao ĩũlũ wa syĩndũ ila syavathĩtwe sya kwanangwa. Andũ onthe ma Ĩsilaeli nĩmakaniwe nũndũ wa ũu. Akani ndaakw'a e weka nũndũ wa naĩ ĩsu.’ ”

21Andũ ma mbaĩ ya Lũveni, Ngandi, na nyusu ya andũ ma mbaĩ ya Manase nĩmasũngĩie atongoi ma mĩsyĩ ya andũ ma Ĩsilaeli mamea atĩĩ,

22“Mwene Ũtonyi nĩ Ngai! Nĩ Mwĩai Ngai! Mwene Ũtonyi nĩ Ngai! Nĩ Mwĩai Ngai! Nĩwĩsĩ twĩkĩte ũu nĩkĩ, naitũ nĩtũkwenda o nenyu mũmanye twĩkĩte ũu nĩkĩ! Ethĩwa nĩtũleete kũmwĩw'a Mwĩai Ngai, na tũkalea kwĩthĩwa twĩ aĩkĩĩku kwake, tũaei!

23Ethĩwa nĩtũleete kũmwĩw'a Mwĩai Ngai, na tũkaka kĩthembeo kitũ ene tumĩasye nthembo sya kũvĩvw'a, sya ngetha ya mbaa mbeke, kana nthembo sya ngwatanĩo, Mwĩai Ngai mwene nĩatũkany'e.

24Aiee! Twĩkĩte ũu twĩ na w'ĩa wa kana ĩvindanĩ yũkĩte nzyawa syenyu nitonya kũkũlya ila sitũ atĩĩ, ‘Mwĩ na ũndũ mwaũ ũmũkwatanĩtye na Mwĩai Ngai, Ngai wa Ĩsilaeli?

25Mwĩai Ngai nũseũvĩtye Ũsĩ wa Yolotani wĩthĩwe mũvaka katĩ witũ nenyu inyw'ĩ andũ ma Lũveni na Ngandi. Inyw'ĩ mũina kĩanda kwa Mwĩai Ngai.’ Kwoou nzyawa syenyu nitonya kũtuma ila sitũ ieka kũthaitha Mwĩai Ngai.

26Kĩu nĩkyo kĩnatumie twasya, ‘Twĩyũmbany'ei twake kĩthembeo, ĩndĩ ti kya kũvĩvĩasya kana kumĩasya nthembo.’

27Twakĩte kĩthembeo kĩu nĩ kana kĩthĩwe wonany'o katĩ witũ nenyu, na katĩ wa nzyawa sitũ na syenyu ila syũkĩte, kana ithyĩ kwa w'o tũthaithaa Mwĩai Ngai twĩ mbee wa Ĩeema yake ĩtheu twĩ na nthembo sya kũvĩvw'a na nthembo ingĩ o vamwe na nthembo sya ngwatanĩo. Twĩkĩte ũu nĩ kana nzyawa syenyu iikese kwĩa ila sitũ kana vai ũndũ ũtũkwatanĩtye na Mwĩai Ngai.

28Nĩtũnasũanĩie twasya ethĩwa ithyĩ kana nzyawa sitũ ĩvindanĩ yũkĩte tũkatavw'a ũndũ ta ũsu tũkasya, ‘Sisyai kĩthembeo nĩ kĩĩ kĩilyĩ kĩla kya Mwĩai Ngai, kĩla aaũmae maitũ maakie, ti kwondũ wa nthembo sya kũvĩvw'a kana nthembo ingĩ, ĩndĩ kĩthĩwe wonany'o katĩ witũ nenyu.’

29Kwa w'o ithyĩ tũitonya kũlea kwĩw'a Mwĩai Ngai, kana tũkaeka kũmũatĩĩa ũmũnthĩ kwa kwaka kĩthembeo kya kũvĩvĩsya nthembo kana kumĩsya nthembo sya ngetha ya mbaa mbeke kana nthembo ĩngĩ. Ithyĩ tũitonya kwaka kĩthembeo kĩngĩ eka kĩla kya Mwĩai Ngai kĩla kĩ mbee wa Ĩeema ĩtheu ya kũkomanĩa na Mwĩai Ngai.”

30Yĩla mũthembi Vineasi na ala atongoi ma andũ ma Ĩsilaeli na ma mĩsyĩ yoo ala maĩ vamwe nake meewie ndeto ila andũ ma mbaĩ ya Lũveni, ya Ngandi, na nyusu ya andũ ma mbaĩ ya Manase maneenie, nĩmendeeiw'e.

31Vineasi mwana wa mũthembi Eleasali nĩweeie andũ ma mbaĩ ya Lũveni, ya Ngandi na nyusu ya andũ ma mbaĩ ya Manase atĩĩ, “Yu nĩtwamanya kana Mwĩai Ngai e katĩ witũ, nũndũ mũineka naĩ mũkamũvĩtĩsya Mwĩai Ngai. Kwoou yu nĩmwatuma andũ ma Ĩsilaeli matakanw'a nĩ Mwĩai Ngai.”

32Nĩvo ĩndĩ Vineasi mwana wa mũthembi Eleasali na ala atongoi masyokie kuma kwa andũ ma mbaĩ ya Lũveni na ya Ngandi ala matwĩe nthĩ ya Ngileati na maetee andũ ma Ĩsilaeli ala matwĩe nthĩ ya Kanaani ũsũngĩo.

33Ũsũngĩo ũsu nĩwendeeisye andũ ma Ĩsilaeli na mamũtaĩa Ngai. Mayaasyoka kũneena ĩngĩ ĩũlũ wa kũthi kũkita na kwananga nthĩ ĩla andũ ma mbaĩ ya Lũveni na ya Ngandi matwĩe.

34Andũ ma mbaĩ ya Lũveni na ya Ngandi nĩmeetie kĩthembeo kĩu “Ũkũsĩ” nũndũ nĩmaisye atĩĩ, “Nĩ ũkũsĩ katĩ waitũ kana Mwĩai Ngai nĩ Ngai.”

← Chapter 21 Jump to: Chapter 23 →