Joshua 17

Kamba (MBIVILIA ŨVOO MŨSEO)

← Chapter 16 Jump to: Chapter 18 →

1Kĩĩ nĩkyo kĩsio kya nthĩ kĩla kyanengiwe andũ ma mbaĩ ya Manase ũla nĩwe waĩ mwana ũla mũkũũ wa Yosevu. Makili mwana ũla mũkũũ wa Manase na ũmae wa andũ ma Ngileati nĩwanengiwe ndũa ya Ngileati na Mbasani nĩkwĩthĩwa aĩ mũndũ wa kaũ, na aĩ nguma.

2Kĩsio kya nthĩ kĩla kĩ ngalĩko ya ũthũĩlonĩ wa syũa ya Ũsĩ wa Yolotani nĩkyanengiwe andũ ma mĩsyĩ ĩla ĩngĩ ya Manase. Mĩsyĩ ĩsu yaĩ ya Asilieli, Sekemu, Eevieli, na Semita. Isu nĩsyo syaĩ nzyawa sya aũme sya Manase mwana wa Yosevu na nĩmo maĩ atongoi ma mĩsyĩ ĩsu.

3Nzeloveati mwana wa Eevieli, mwana wa Ngileati, mwana wa Makili mwana wa Manase ndaĩ na ana aũme, ĩndĩ aĩ na syana sya eĩtu. Masyĩtwa ma eĩtu asu make maĩ Maala, Noa, Okila, Milika, na Tilisa.

4Eĩtu asu nĩmaendie kũla kwĩ mũthembi Eleasali, Yosua mwana wa Nuni na atongoi na mamea atĩĩ, “Mwĩai Ngai nĩwamwĩaĩie Mwose atũnenge ng'ũndũ o ũndũ wĩnenga aũme ma mũsyĩ witũ.” Kwoou kwĩanana na Mwĩao wa Mwĩai Ngai eĩtu asu nĩmanengiwe kĩsio kya nthĩ kĩthĩwe ng'ũndũ yoo o tondũ aũme ma mĩsyĩ yoo manengetwe.

5Nĩvo ĩndĩ andũ ma mbaĩ ya Manase mongeleeilwe ilungu ingĩ ĩkũmi ĩũlũ wa ndũa ya Ngileati na ya Mbasani ngalĩko ya wumĩlonĩ wa syũa ya Ũsĩ wa Yolotani,

6nũndũ nzyawa sya Manase sya eĩtu nĩsyanengiwe kĩlungu kya nthĩ. Kĩsio kya nthĩ kya Ngileati nĩkyanengiwe nzyawa ila ingĩ sya Manase.

7Kĩsio kya nthĩ kya andũ ma mbaĩ ya Manase kyaĩ kuma ndũanĩ ya Aseli nginya ndũanĩ ya Mikimetha, ngalĩko ya wumĩlonĩ wa syũa ya ndũa ya Sekemu. Mũvaka wa kĩsio kĩu nĩwaendete ngalĩko ya ĩtheo kũvika vala andũ ma Eni-tavũa matwĩe.

8Nthĩ ya Tavua yaĩ ya andũ ma mbaĩ ya Manase, ĩndĩ ndũa ya Tavua ĩla yaĩ mũvakanĩ yaĩ ya nzyawa sya Evalaimu.

9Mũvaka ũsu nĩwatheete ũkavika kalũsĩnĩ ketawa Kana. Ndũa ila syaĩ ngalĩko ya ĩtheo ya kalũsĩ kau syaĩ sya andũ ma mbaĩ ya Evalaimu o na kau syaĩ kĩsionĩ kya nthĩ kya andũ ma mbaĩ ya Manase. Mũvaka wa Manase wavĩtĩle ngalĩko ya ĩũlũ ya kalũsĩ kau, na ũkathi kũtia Ũkanga wa Menditelenia.

10Ngalĩkonĩ ya ĩtheo kĩsio kĩu kyaĩ kya andũ ma mbaĩ ya Evalaimu, na kĩsio kya ngalĩko ya ĩũlũ kyaĩ kya andũ ma mbaĩ ya Manase, na mũvaka wakyo waendete ũkatina Ũkanga wa Menditelenia ngalĩko ya ũthũĩlonĩ wa syũa. Ngalĩkonĩ ya ĩũlũ kĩsio kĩu kyavikĩte ndũanĩ ya Aseli na ngalĩko ya wumĩlonĩ wa syũa kĩkavika ndũanĩ ya Isakali.

11Kĩsionĩ kya nthĩ kĩla kyaĩ katĩkatĩ wa ndũa ya Isakali na ya Aseli, andũ ma mbaĩ ya Manase nĩmanengetwe ndũa ya Mbethi-sani, na ya Ivileamu vamwe na motũi ala maithyũlũlũkĩte. O ta ũu nĩmanengetwe ndũa ya Ndoli ĩla yaĩ ũtee wa ũkanga vamwe na Enindoli, Tanaki, na Mekito vamwe na motũi ala maithyũlũlũkĩte.

12Andũ ma mbaĩ ya Manase mayaĩ matonya kũlũngya andũ ma Kanaani ala matwĩe ndũanĩ isu, na kwoou andũ ma Kanaani maendeea na kwĩkala ndũanĩ isu.

13O na yĩla andũ ma mbaĩ ya Ĩsilaeli meethĩiwe na vinya mayaalũngya andũ ma Kanaani makathi onthe, ĩndĩ nĩmamathũkũmĩthasya na vinya.

14Nzyawa sya Yosevu nĩsyakũlilye Yosua atĩĩ, “Ũtũnengete kĩsio o kĩmwe kya nthĩ kĩthĩwe nokyo ng'ũndũ yaitũ nĩkĩ, na Mwĩai Ngai nũtũathimĩte tũkethĩwa twĩ aingĩ mũno?”

15Yosua amasũngĩa amea, “Ethĩwa mwĩ aingĩ mũno na kĩsio kya nthĩ ĩla yĩ iĩma kya Evalaimu nĩ kĩnini mũno kwenyu, ambatai mũkenge nthĩ yenyu ithekanĩ ila syĩ isionĩ sya Avelisi na Alevai.”

16Nzyawa sya Yosevu nĩsyasũngĩie Yosua syamwĩa atĩĩ, “Tũyĩanĩwa nĩ nthĩ ĩsu yĩ iĩmanĩ, na ũu wĩ o vo, Akanaani onthe matũaa ũiĩnĩ na myandanĩ na onthe me na makasya ma kaũ maseũvĩtw'e na kyũma. Ala matũaa ndũanĩ sya Mbethi-sani na motũi ala mamĩthyũlũlũkĩte na ala matũaa mwandanĩ wa Yesileeli o namo onthe me na makasya ma kaũ.”

17Yosua nĩweeie andũ asu ma mbaĩ ya Evalaimu, na nyusu ya andũ ma mbaĩ ya Manase atĩĩ, “Kwa w'o inyw'ĩ mwĩ aingĩ na mwĩ na vinya. Nĩmũũnengwa mbee wa kĩsio kĩmwe kya nthĩ mũmesye;

18nĩmũũnengwa kĩsio kya nthĩ kĩla kĩ nthĩ yĩ iĩma. O na kau nĩ kĩtheka, mũkakyenga kuma ngalĩko ĩmwe nginya ĩla ĩngĩ na mũikĩtw'ĩkĩthya ng'ũndũ yenyu. Namo andũ ma Kanaani mũkamalũngya o na kau nĩ andũ me vinya na me na makasya ma kaũ maseũvĩtw'e na kyũma.”

← Chapter 16 Jump to: Chapter 18 →