Joshua 18

Kamba (MBIVILIA ŨVOO MŨSEO)

← Chapter 17 Jump to: Chapter 19 →

1Ĩtina wa andũ onthe ma Ĩsilaeli kũsinda nthĩ ya Kanaani nĩmoombanĩie ndũanĩ ya Silo na mamba Ĩeema ĩtheu ya kũkomanĩa na Mwĩai Ngai vau.

2Nĩvatialĩte mbaĩ mũonza sya andũ ma Ĩsilaeli ila itaĩ inamba kũaĩawa kĩsio kya nthĩ kĩthĩwe ng'ũndũ yoo.

3Kwoou Yosua nĩwakũlilye andũ ma Ĩsilaeli atĩĩ, “Mwĩĩkala ĩvinda yĩana ata mũtanamba kũlika na kwosa nthĩ ĩla Mwĩai Ngai, Ngai wa aaũmae menyu ũmũnengete?

4Nyuvai aũme atatũ kuma kĩla mbaĩ. Nĩngũmatũma mathi makekĩe nthĩ ĩsu mĩvaka na maiandĩka ũelesyo wa ũndũ kĩla mbaĩ ĩkwenda ĩnengwe kĩsio kya nthĩ kĩana kĩthĩwe ng'ũndũ yoo. Nĩvo ĩndĩ meũsyoka moke vala nĩĩ.

5Nthĩ ĩsu ĩaanw'e isio mũonza. Andũ ma mbaĩ ya Yuta nĩmekale kĩsionĩ kyoo kĩla kĩ ngalĩko ya ĩtheo, na andũ ma mũsyĩ wa Yosevu mayĩkala kĩsionĩ kyoo kĩla kĩ ngalĩko ya ĩũlũ.

6Mwamina kũandĩka ũelesyo wa isio isu mũonza sya nthĩ, ũetei vala nĩĩ nakwa nĩngũkũna kula kwondũ wenyu mbee wa Mwĩai Ngai.

7Andũ ma mbaĩ ya Livai mayaĩlĩte kũnengwa kĩsio kya nthĩ tenyu, nũndũ wĩa woo wa kũthũkũma Mwĩai Ngai ta athembi nĩw'o ũtiĩwa woo. Mbaĩ ya Ngandi, ya Lũveni, na nyusu ya mbaĩ ya Manase nĩmaminĩte kũkwata ũtiĩwa woo ngalĩko ya wumĩlonĩ wa syũa ya Ũsĩ wa Yolotani. Manengiwe nthĩ ĩsu nĩ Mwose mũthũkũmi wa Mwĩai Ngai.”

8Aũme asu makilĩlye kwambĩĩa kyalo kya kũthi kwĩkĩa nthĩ ĩsu mĩvaka, Yosua nĩwameaĩie amea atĩĩ, “Endai mũkekĩe nthĩ ĩsu mĩvaka na kũandĩka ũelesyo ĩũlũ wayo. Mwamina ũu syokai mũke vala nĩĩ, nakwa nĩngũkũna kula kwondũ wenyu mbee wa Mwĩai Ngai nĩ vaa Silo.”

9Kwoou aũme asu nĩmaendie kĩla vandũ kĩsionĩ kĩu kya nthĩ na maandĩka masyĩtwa ma ndũa syonthe ila syaĩ kĩsionĩ kĩu. Mamina ũu nĩmasyokie maeemanĩ Silo vala ve Yosua.

10Nĩvo ĩndĩ Yosua e kũu Silo wakũnie kula mbee wa Mwĩai Ngai, na e vau aanĩsya andũ ma Ĩsilaeli kĩsio kĩu kya nthĩ kwĩanana na ũndũ mbaĩ syoo syaanĩtw'e.

11Kĩsio kya nthĩ kĩla kyanengiwe andũ ma mĩsyĩ ya mbaĩ ya Mbengyameni nĩkyo kyaĩ kya mbee kũnenganwe. Kĩsio kĩu kyaĩ katĩ wa isio sya andũ ma mbaĩ ya Yuta na ya Yosevu.

12Ngalĩko ya ĩũlũ mũvaka woo wambĩĩe Ũsĩnĩ wa Yolotani, ũkambatĩla kĩvaũũkonĩ kĩla kĩ ngalĩko ya ĩũlũ ya ndũa ya Yeliko. Mũvaka ũsu nĩwaendee ngalĩko ya ũthũĩlonĩ wa syũa ũkesĩla nthĩ yĩ iĩma na ũkaumaala ũkatheelela weũnĩ wa Mbethi-aveni.

13Kuma vau mũvaka ũsu nĩwaendete ivaũũkonĩ ila syĩ ngalĩko ya ĩtheo ya ndũa ya Lusu, ĩla kwa ĩsyĩtwa yĩngĩ yĩtawa Mbethi-eli, na ũkatheea nginya ndũanĩ ya Ataloni-atali ĩla yĩ kĩĩmanĩ kĩla kĩ ngalĩko ya ĩtheo ya ndũa ya Mbethi-oloni ya ĩtheo.

14Mũvaka ũsu nĩwasyokete ũkelekela ngalĩko ĩngĩ, na ũkavĩndũka ũkathi ngalĩko ya ĩtheo kuma ngalĩko ya ũthũĩlonĩ wa syũa wa kĩĩma kĩu nginya ndũanĩ ya Kĩliathi-mbaali, ĩla kwa ĩsyĩtwa yĩngĩ yĩtawa Kĩliathi-yealimu, ĩla yaĩ ndũa ya andũ ma mbaĩ ya Yuta. Ũsu waĩ mũvaka wa kĩsio kĩu wa ngalĩko ya ũthũĩlonĩ wa syũa.

15Mũvaka wa kĩsio kĩu wa ngalĩko ya ĩtheo wambĩĩe vala ndũa ya Kĩlĩathi-yealimu ĩvikĩte na ũkathi nginya ithimanĩ sya Nevutoa.

16Mũvaka ũsu nĩwatheete ũkesĩla nguumo wa kĩĩma kĩla kyathimanĩte na Mwanda wa Mbeni-inomu, ũla wĩ ngalĩko ya ĩũlũ ya mũthya wa Mwanda wa Levaimu. Mũvaka ũsu nĩwatheete wĩsĩlĩte mwandanĩ ũsu wa Mbeni-inomu ũla wĩ ngalĩko ya ĩtheo ya kĩvaũũko kya ndũa ya Ayevusi, kwelekela ndũanĩ ya Eni-lokeli.

17Mũvaka ũsu nĩwavĩndũkĩte ũkambata ngalĩko ya ĩũlũ kwelekela ndũa ya Eni-semesi, na ũkaendeea kũthi kũvika ndũa ya Ngelilothi ĩla ĩthimanĩte na kyambato kya Atumimu. Mũvaka ũsu nĩwatheete ũkathi kũvika ĩvianĩ ya Mboani mwana wa Lũveni.

18Nĩwesĩlĩte ngalĩko ya ĩũlũ ya kĩvaũũko kĩla kyathimanĩte na Mwanda wa Yolotani, na nĩwatheete nginya ũkalika mwandanĩ ũsu.

19Kuma vau nĩwambatĩte nginya kĩvaũũkonĩ kya ndũa ya Mbethi-okila ũkatheelela mũthyanĩ wa ngalĩko ya ĩũlũ ya Ũkanga Mũkw'ũ, vala Ũsĩ wa Yolotani ũlikĩlye kĩw'ũ kyaw'o. Ũsu nĩw'o waĩ mũvaka wa ngalĩko ya ĩtheo ya kĩsio kĩu.

20Ũsĩ wa Yolotani nĩw'o waĩ mũvaka wa kĩsio kĩu ngalĩko yakyo ya wumĩlonĩ wa syũa. Ĩsu nĩyo mĩvaka ya kĩsio kya nthĩ kĩla kyanengiwe andũ ma mĩsyĩ ya mbaĩ ya Mbengyameni kĩthĩwe ng'ũndũ yoo.

21Ii nĩsyo syaĩ ndũa sya andũ ma mbaĩ ya Mbengyameni: Yeliko, Mbethi-okila, Emeki-kesisi,

22Mbethi-alava, Nzemalaimu, Mbethi-eli,

23Aavi, Vala, Ovala,

24Kevali-amimoni, Oveni, na Ngeva. Syonthe syaĩ ndũa ĩkũmi na ilĩ, vamwe na motũi ala maithyũlũlũkĩte.

25O ta ũu vaĩ ndũa ingĩ nasyo nĩ: Ngiveoni, Lama, Mbeelothi,

26Misiva, Kevila, Mosa,

27Lekemu, Iliveeli, Talala,

28Nzeela, Aelevu, Yevusi, ĩla kwa ĩsyĩtwa yĩngĩ nĩ Yelũsalemu, Ngivea na Kiliathi-yealimu. Syonthe syaĩ ndũa ĩkũmi na inya vamwe na motũi ala maithyũlũlũkĩte. Kĩu kyonthe nĩkyo kĩsio kya nthĩ kĩla kyanengiwe andũ ma mĩsyĩ ya mbaĩ ya Mbengyameni kĩthĩwe ng'ũndũ yoo.

← Chapter 17 Jump to: Chapter 19 →