Joshua 14

Kamba (MBIVILIA ŨVOO MŨSEO)

← Chapter 13 Jump to: Chapter 15 →

1Ũũ nĩw'o ũelesyo wa ũndũ nthĩ ya Kanaani ĩla yĩ ngalĩko ya ũthũĩlonĩ wa syũa ya Ũsĩ wa Yolotani yaaniw'e katĩ wa andũ ma Ĩsilaeli yĩthĩwe ng'ũndũ yoo. Mũthembi Eleasali, Yosua mwana wa Nuni, na atongoi ma mĩsyĩ ya andũ ma Ĩsilaeli nĩmo maanisye nthĩ ĩsu.

2O tondũ Mwĩai Ngai weeaĩĩte Mwose, nthĩ ĩsu nĩyaanĩiw'e mbaĩ kenda na nyusu sya andũ ma Ĩsilaeli kwa kũkũna kula.

3Mwose aĩ ananenga mbaĩ ila ingĩ ilĩ na nyusu sya andũ ma Ĩsilaeli nthĩ yoo mũingo ũla ũngĩ wa Ũsĩ wa Yolotani, ĩndĩ ndaanenga andũ ma mbaĩ ya Livai ng'ũndũ.

4Ana ma Yosevu nĩmatw'ĩkie mbaĩ ilĩ: Manase na Evalaimu. Mbaĩ ya Livai ndyaanengwa kĩsio kya nthĩ o na kĩmwe, ate o ndũa sya kwĩkala na isesi sya kũĩthya indo syoo na kũndũ kwa kwia syĩndũ syoo.

5Kwoou andũ ma Ĩsilaeli nĩmaanie nthĩ ĩsu kwĩanana na ũndũ Mwĩai Ngai weeaĩĩte Mwose.

6Mũthenya ũmwe andũ amwe ma mbaĩ ya Yuta nĩmaendie Ngilikali kũla kwĩ Yosua. Ũmwe wa andũ asu aĩ Kalevu mwana wa Yevune ũla waĩ Mũkenisi. Kalevu nĩweeie Yosua atĩĩ, “Nĩwĩsĩ ũndũ Mwĩai Ngai watavisye Mwose mũndũ wa Ngai ĩũlũ wakwa nĩ naku yĩla twaĩ Katesi-mbalinea.

7Naĩ na ũkũũ wa myaka mĩongo ĩna yĩla Mwose mũthũkũmi wa Mwĩai Ngai wandũmie kwa kĩmbithĩ kuma Katesi-mbalinea nũke kwĩkuũa ũndũ andũ ma nthĩ ĩno matũaa. Nyie nĩnamũeteie ũsũngĩo mwĩanĩu na wa w'o.

8Andũ ala angĩ twaendanisye nĩmatumie andũ ma Ĩsilaeli makwatwa nĩ w'ĩa mwingĩ mũno ĩndĩ nyie nĩneethĩiwe nĩ mũĩkĩĩku na nĩ mwĩwi kwa Mwĩai Ngai, Ngai wakwa.

9Mũthenya ũsu Mwose nĩweevĩtie ayasya atĩĩ, ‘Kwa w'o we nthĩ ĩla wĩkinya na maũũ maku ĩkeethĩwa ng'ũndũ yaku na ya nzyawa syaku kũvika ĩvindanĩ yĩla yũkĩte, nũndũ nĩweethĩiwe wĩ mwĩwi kwa Mwĩai Ngai.’

10Sisya yu Mwĩai Ngai nũmbĩkalĩtye thayũ vandũ va myaka mĩongo ĩna na ĩtano kuma ĩvinda yĩla waneenaa ndeto isu na Mwose, yĩla andũ ma Ĩsilaeli mangangaa weũnĩ. Yu wanzisya, ũmũnthĩ nĩ na ũkũũ wa myaka mĩongo nyanya na ĩtano,

11na nĩ na vinya o ta ũla naĩ naw'o ĩvindanĩ yĩla Mwose wandũmaa. O na yu nĩ na vinya wa kũkita kana wa kũtethya wĩa o na wĩva.

12Yu ĩndĩ nenge nthĩ ĩno yĩ kĩĩmanĩ ĩla Mwĩai Ngai wambathie mũthenya ũla nyie na andũ ala naendanĩtye namo twaetie ũsũngĩo. Nĩtwakũtavisye kana ĩla mbaĩ ya andũ anene metawa Aanaki mekalaa ndũanĩ nene mbiĩĩe. Nĩvatonyeka Mwĩai Ngai akandethya nakwa ngĩmalũngya kwĩanana na ũndũ Mwĩai Ngai waisye.”

13Nĩvo ĩndĩ Yosua waathimie Kalevu mwana ya Yevune na amũnenga ndũa ya Eviloni yĩthĩwe ng'ũndũ yake.

14Kwoou ndũa ya Eviloni nĩyatw'ĩkie ng'ũndũ ya Kalevu mwana wa Yevune ũla waĩ Mũkenisi kũvika o na ũmũnthĩ, nĩkwĩthĩwa Kalevu aĩ mũĩkĩĩku na nĩwamwĩw'aa Mwĩai Ngai, Ngai wa andũ ma Ĩsilaeli.

15Mbee wa maũndũ asu, ndũa ya Eviloni yeetawa ndũa ya Aliva; Aliva nĩwe waĩ nguma mũno mbee katĩ wa ala andũ angĩ anene meetawa Aanaki. Nĩvo ĩndĩ nthĩ ĩsu yeethĩiwe na mũuo.

← Chapter 13 Jump to: Chapter 15 →