Joshua 6

Kamba (MBIVILIA ŨVOO MŨSEO)

← Chapter 5 Jump to: Chapter 7 →

1Mĩvĩa ya ndũa ya Yeliko yaĩ mĩvinge ĩkalũma ki na kũsungwa nĩ asikalĩ nĩ kana andũ ma Ĩsilaeli maikalike nthĩnĩ. Vai mũndũ waĩ atonya kũlika kana kumaala ndũanĩ ĩsu.

2Mwĩai Ngai nĩweeie Yosua atĩĩ, “Sisya nĩnĩnenganĩte ndũa ya Yeliko, mũsumbĩ wayo, na asikalĩ mayo ngũmbaũ ũtonyinĩ waku.

3Ĩlingĩle ndũa ĩsu ĩmwe kwa mũthenya vandũ va mĩthenya thanthatũ wĩ na asikalĩ maku ma kaũ.

4Athembi mũonza makwete masoo maseũvĩtw'e na mbya sya ndũũme matongoesye ala angĩ makuĩte Ĩsandũkũ ya Ũtianĩo. Mũthenyanĩ wa mũonza mwĩĩlingĩla ndũa ĩsu mavinda mũonza na athembi mayĩthĩwa maivuva masoo moo.

5Mweew'a mavuva masoo asu ĩvuva yĩmwe ĩasa, andũ onthe malonzany'e na wasya mũnene. Ngũta sya ndũa ĩsu niũvalũkanga, na asikalĩ menyu ma kaũ mailika ndũanĩ ĩsu vate kĩndũ kĩmasiĩĩe.”

6Yosua nĩweetie athembi vamwe na amea atĩĩ, “Osai Ĩsandũkũ ya Ũtianĩo ya Mwĩai Ngai na athembi mũonza makwete masoo maitongoesya ala makuĩte Ĩsandũkũ yĩu.”

7Yosua nĩweeie andũ asu atĩĩ, “Ambĩĩai kũthi mwĩlingĩle ndũa mũtongoew'e nĩ asikalĩ me na mĩio ya kaũ, na me mbee wa athembi ala makuĩte Ĩsandũkũ ya Ũtianĩo na ala angĩ makuĩte masoo.”

8Yosua amina kũneena na andũ, ala athembi mũonza kĩla ũmwe akuĩte soo me mbee wa Mwĩai Ngai nĩmaendie mbee matongosya mavuvĩte masoo moo. Athembi ala angĩ makuĩte Ĩsandũkũ ya Ũtianĩo nĩmamaatĩĩie ĩtina.

9Asikalĩ ala maĩ na mĩio ya kaũ nĩmaendie me mbee wa athembi ala maendee na kũvuva masoo, namo athembi ala angĩ makuĩte Ĩsandũkũ ya Ũtianĩo ya Mwĩai Ngai mamaatĩĩa ĩtina. Ĩtina wa asu onthe vaĩ asikalĩ angĩ ma kaũ. Maendee na kwĩlingĩla ndũa ĩsu ala athembi mũonza nĩmeethĩawa mavuvĩte masoo.

10Yosua nĩweeaĩĩte andũ make akamea maikalonzany'e kana kũneena maendete nginya yĩla wĩmea meke ũu.

11Kwoou Yosua nĩweeaĩie andũ asu amea melingĩle ndũa ĩsu ĩvinda yĩmwe kĩla mũthenya makuĩte Ĩsandũkũ ya Ũtianĩo ya Mwĩai Ngai na kwatuka maisyokaa makakoma maeemanĩ.

12Ũnĩ ũsu kwakya tene Yosua nĩwaamũkie na athembi moosa Ĩsandũkũ ya Ũtianĩo.

13Ala athembi mũonza kĩla ũmwe akuĩte soo nĩmaendie mbee wa ala makuĩte Ĩsandũkũ ya Ũtianĩo ya Mwĩai Ngai maendee na kũvuva masoo moo. Asikalĩ ala maĩ na mĩio ya kaũ maĩ mbee wa athembi asu mavuvĩte masoo. Asikalĩ ala maĩ ĩtina woo onthe maendete maatĩĩe athembi ala makuĩte Ĩsandũkũ ya Ũtianĩo ya Mwĩai Ngai. Ĩvindanĩ yĩu yonthe ala athembi mũonza nĩmeethĩawa mavuvĩte masoo.

14Mũthenyanĩ wa kelĩ andũ asu nĩmeelingĩlile ndũa ĩsu ĩvinda yĩmwe na masyoka maeemanĩ. Nĩmeekie ũu vandũ va mĩthenya thanthatũ.

15Mũthenyanĩ wa mũonza nĩmaamũkie kwakya tene vyũ na meelingĩla ndũa ĩsu mavinda mũonza maatĩanĩe ũndũ meekaa mĩthenyanĩ ĩla ĩngĩ. Mũthenya ũsu now'o meelingĩlile mavinda mũonza.

16Ala athembi makuĩte masoo matanamavuva oou, Yosua nĩweeaĩie andũ amea atĩĩ, “Usyai ngemi, nũndũ Mwĩai Ngai nĩwatũnenga ndũa ya Yeliko!

17Ndũa ya Yeliko na syĩndũ syonthe ila syĩ nthĩnĩ wayo no nginya ivathwe syĩthĩwe nthembo kwa Mwĩai Ngai kwa kwanangwa vyũ. No Laavi, ũla mũndũ mũka ĩlwaya na andũ ma mũsyĩ wake w'onthe ala me nyũmbanĩ kwake mateũawa nũndũ nĩwavithie ala aũme elĩ twatũmie.

18Ĩndĩ inyw'ĩ mũikose kĩndũ o na kĩmwe kĩla kĩvathĩtwe kyanangwe nũndũ mweeka ũu nĩmũũtuma twĩthĩwa na mathĩna na ithyonthe andũ ma Ĩsilaeli tũiminwa.

19Syĩndũ syonthe ila iseũvĩtw'e na silĩva, thaavu, mbulonzi kana kyũma nivathĩtwe syĩthĩwe sya Mwĩai Ngai. No nginya syĩndũ isu itũmĩawe kwondũ wa ũthũkũmi wa Mwĩai Ngai.”

20Ala athembi nĩmavuvie masoo moo. Andũ meew'a wasya wa masoo asu oou, nĩmauisye ngemi na ngũta sya ndũa ya Yeliko syavalũkanga vyũ. Nĩvo ĩndĩ asikalĩ onthe mambatie na malika ndũanĩ ĩsu mateũsiĩĩwa nĩ kĩndũ na mamĩkwata.

21Nĩmatũmĩie mbyũ syoo na mooaa syĩndũ syonthe ila syaĩ thayũ ndũanĩ ĩsu; aũme na aka, syana na andũ akũũ, ng'ombe, mbũi, malondu na mang'oi.

22Yosua nĩwaneenie na ala aũme elĩ watũmĩte mathi kwa kĩmbithĩ makamanye ũndũ andũ ma Yeliko matũaa amea atĩĩ, “Endai nyũmba kwa ũla mũndũ mũka ĩlwaya mũkamumaalye vamwe na andũ ma mũsyĩ wake o tondũ mwamwathie.”

23Kwoou nĩmaendie na maumaalya Laavi e na ĩthe na inyia wake, ana-a-inyia na andũ ala angĩ onthe ma mũsyĩ wake. Nĩmoosie andũ onthe ma mũsyĩ wa Laavi vamwe na ngombo, na mamatwaa ũsũvĩonĩ vakuvĩ na maeema ma andũ ma Ĩsilaeli.

24Nĩmavĩvisye ndũa ĩsu ya Yeliko yonthe na syĩndũ syonthe ila syaĩ nthĩnĩ wayo, ĩndĩ mayaavĩvya syĩndũ ila syaseũvĩtw'e na thaavu, silĩva, mbulonzi kana kyũma. Nĩmoosie syĩndũ isu na masia kwondũ wa ũthũkũmi wa Mwĩai Ngai.

25Yosua ndaaũaa Laavi, ũla mũndũ mũka ĩlwaya na andũ ma mũsyĩ wake nũndũ nĩwavithie ala aũme elĩ wamatũmĩte makekuũe ndũa ya Yeliko kwa kĩmbithĩ. Nzyawa sya Laavi syĩkalanasya na andũ ma Ĩsilaeli kũvika o na ũmũnthĩ.

26Ĩvindanĩ yĩu Yosua nĩwakanisye andũ ma Ĩsilaeli na wĩvĩto ũũ: “Mũndũ o na wĩva ũla wĩtata kwaka ndũa ya Yeliko ĩngĩ, akaumanĩwa nĩ Mwĩai Ngai. Ayaka mũsingi wayo ĩkithathi yake yĩkakw'a, na ayĩkĩa mĩvĩa ya yo ĩlumaita yake ya mũndũ-ũme yĩkakw'a.”

27Mwĩai Ngai nĩweethĩawa e vamwe na Yosua, na kwoou Yosua eethĩwa e mũndũ wĩ nguma nthĩ ĩsu yonthe.

← Chapter 5 Jump to: Chapter 7 →