1 Chronicles 12

Kikuyu Bible (IBUKU RĨRĨA ITHERU RĨA NGAI)

← Chapter 11 Jump to: Chapter 13 →

1Na rĩrĩ, andũ aya nĩo maakinyire he Daudi o kũu Zikilagi, hĩndĩ ĩrĩa aaikarĩte ehithĩte nĩ ũndũ wa Saulu, mũrũ wa Kishu; nao maarĩ a thiritũ ya njamba iria ciamũteithagia ita-inĩ.

2Nao maakuuaga mota; ningĩ nĩmaahotaga gũikia mahiga na kĩgũtha, o na mĩguĩ na ũta, na moko mao ma ũrĩo o na ma ũmotho, nao andũ acio-rĩ, maarĩ Abenjamini, ariũ a ithe na Saulu.

3Nake mũnene wao nĩ Ahiezeri, na thutha wake nĩ Joashu, nao maarĩ ariũ a Shemaa, Mũgibea; na Jezieli, na Peleti, ariũ a Azimavethu, na Beraka, na Jehu, Mũanathothu,

4na Ishimaia, Mũgibeoni, ũrĩa warĩ njamba thĩinĩ wa acio mĩrongo ĩtatũ, nake nĩwe waroraga andũ acio mĩrongo ĩtatũ; na Jeremia, na Jahazieli, na Johanani, na Jozabadu ũrĩa warĩ Mũgederathi,

5na Eluzai, na Jerimothu, na Bealia, na Shemaria, na Shefatia, Mũharufi,

6na Elikana, na Ishia, na Azareli, na Joezeru, na Jashobeamu, Akora;

7na Joela, na Zebadia, ariũ a Jerohamu wa Gedori.

8Na thĩinĩ wa Agadi kwarĩ amwe meamũrire magĩthiĩ kwĩ Daudi kĩhingo-inĩ kĩu gĩaakĩtwo na hinya o kũu werũ-inĩ; nao maarĩ njamba irĩ hinya, na nĩmaarutĩtwo kũrũa mbaara, makahota kũrũmia ngo o na itimũ; namo mothiũ mao maahaanaga o ta mothiũ ma mĩrũthi, nao maarĩ ihenya o ta thwariga irĩ irĩma-inĩ;

9Ezeri nĩwe warĩ mũnene wao, na wa kerĩ nĩ Obadia, na wa gatatũ nĩ Eliabu,

10na wa kana nĩ Mishimana, na wa gatano nĩ Jeremia,

11na wa gatandatũ nĩ Atai, na wa mũgwanja nĩ Elieli,

12na wa anana nĩ Johanani, na wa kenda nĩ Elizabadu,

13na wa ikũmi nĩ Jeremia, na wa ikũmi na ũmwe nĩ Makabanai.

14Andũ acio a ariũ a Gadi maarĩ anene a athigari a mbũtũ ya ita; ũrĩa warĩ mũnyinyi gũkĩra arĩa angĩ thĩinĩ wao-rĩ, mũrũĩre wake no ta wa kũhoota andũ igana rĩmwe mbaara-inĩ, na ũrĩa mũnene mũrũĩre wake no ta wa kũhoota andũ ngiri.

15Acio nĩo maathiire makĩringa Jorodani, mweri wa mbere, hĩndĩ ĩrĩa rũaiyũrĩte rũgathika hũgũrũrũ ciaruo ciothe, nao magĩtũma arĩa othe maarĩ kũu ituamba-inĩ more, o arĩa maarĩ a mwena wa irathĩro o na mwena wa ithũĩro.

16Nakuo kũu gũgĩthiĩ ciana imwe cia Benjamini, o na cia Juda, igĩkinya o kĩhingo-inĩ kĩu he Daudi.

17Nake Daudi akiumagara nĩguo agacitũnge, agĩcokia agĩciĩra atĩrĩ, Mũngĩkorũo mũũkĩte kũrĩ niĩ na thayũ, nĩguo mũndeithie-rĩ, hau nĩho ngoro yakwa ĩngĩiguanĩra na inyuĩ; no rĩrĩ, mũngĩkorũo mũũkĩte kũngunyanĩra ’nyitwo nĩ thũ ciakwa, kuona atĩ hatirĩ ihĩtia ’hĩtĩtie-rĩ, Ngai wa maithe maitũ arorora ũndũ ũcio, na aũkaananie.

18Hĩndĩ ĩo Amasai, mũnene wa andũ acio mĩrongo ĩtatũ, akĩgwatwo nĩ roho, akiuga atĩrĩ, Ithuĩ tũrĩ aku, wee Daudi na tũrĩ a mwena waku, wee mũrũ wa Jesii: ũrogĩa na thayũ, o thayũ ki, o nao arĩa magũteithagia marogĩa na thayũ; nĩ gũkorũo Ngai waku nĩwe ũgũteithagia. Hĩndĩ ĩo Daudi akĩmetĩkĩra matuĩke a thiritũ yake, agĩkĩmatua anene a athigari ake a ita.

19Ningĩ haarĩ andũ amwe a Manase morĩire he Daudi hĩndĩ ĩrĩa aathiire hamwe na Afilisiti kũhũrana na Saulu; no matiamateithirie; nĩ gũkorũo aathani a Afilisiti, tondũ wa gũtaarũo kũrĩa maataarirũo, nĩmaamwĩrire ethiĩre, makiuga atĩrĩ, Ndarĩ hinya agĩkoora acoke he mwathi wake Saulu, nacio ciongo ciitũ igĩe na ũgwati wa gũtinio.

20Na rĩrĩ, rĩrĩa aacokaga Zikilagi nĩguo andũ amwe a Manase metwarire harĩ we, nao nĩ Adina, na Jozabadu, na Jediaeli, na Mikaeli, na Jozabadu, na Elihu, na Zilethai nao maarĩ anene a athigari ngiri a Manase.

21Nao magĩgĩteithia Daudi kũhũrana na gĩtungati kĩrĩa gĩatharĩkanĩire; nĩ ũndũ othe maarĩ njamba irĩ hinya, na maarĩ anene a athigari a mbũtũ ya ita.

22Nĩ ũndũ he Daudi mũthenya o mũthenya nĩhaathiaga andũ makamũteithie, o nginya magĩtuĩka mbũtũ nene, ĩgĩtuĩka o ta mbũtũ ya Ngai.

23Na rĩrĩ, ũyũ nĩguo mũigana wa anene thĩinĩ wa arĩa meohete indo cia mbaara, o acio maakinyire he Daudi kũu Hebironi, nĩguo makagarũre ũthamaki wa Saulu ũtuĩke wa Daudi, o ta ũrĩa uuge wa Jehova watariĩ.

24Thĩinĩ wa ciana cia Juda-rĩ, andũ arĩa meohete indo cia mbaara me na ngo na matimũ maarĩ ngiri ithathatũ na magana manana.

25Ningĩ thĩinĩ wa ciana cia Simeoni, kwarĩ andũ ngiri mũgwanja na igana rĩmwe, njamba irĩ hinya cia kũrũa mbaara.

26Ningĩ thĩinĩ wa ciana cia Lawii kwarĩ ngiri inya na magana matandatũ.

27Nake Jehoiada nĩwe warĩ mũtongoria wa nyũmba ya Haruni, nao andũ arĩa maarĩ hamwe nake maarĩ ngiri ithatũ na magana mũgwanja,

28magĩũka na Zadoku, mwanake, njamba ĩrĩ hinya, o na anene a athigari a ita mĩrongo ĩĩrĩ na erĩ a nyũmba ya ithe.

29Ningĩ thĩinĩ wa ciana cia Benjamini, ariũ a ithe na Saulu maarĩ ngiri ithatũ; no mbere ya hĩndĩ ĩo andũ arĩa maarĩ aingĩ thĩinĩ wao maatũire maathĩkagĩra nyũmba ya Saulu.

30O na thĩinĩ wa ciana cia Efiraimu maarĩ ngiri mĩrongo ĩĩrĩ na magana manana, njamba irĩ hinya theri, o andũ maarĩ igweta thĩinĩ wa nyũmba cia maithe mao.

31O na thĩinĩ wa nuthu ĩrĩa ya mũhĩrĩga wa Manase maarĩ ngiri ikũmi na inyanya, o arĩa maagwetirũo marĩĩtwa mao, nĩguo mathiĩ magatue Daudi mũthamaki.

32Ningĩ thĩinĩ wa ciana cia Isakaru-rĩ, kwarĩ andũ maarĩ na ũũgĩ wa gũkũũrana ũhoro wa mahinda mao, mamenye ũrĩa Aisiraeli maagĩrĩirũo nĩ gwĩka, nao maarĩ na anene ao magana merĩ; nao ariũ arĩa angĩ othe a ithe wao maathagwo nĩo.

33O na thĩinĩ wa Zebuluni arĩa maahotaga kuumagara mathiĩ na mbũtũ ya ita, o na makahota kwarania ita, marĩ na indo cia mbaara cia mĩthemba yothe, andũ acio-rĩ, maarĩ ngiri mĩrongo ĩtano; nao nĩmaahotaga kũnuna ita wega, na matiarĩ a ngoro igĩrĩ.

34Na thĩinĩ wa Nafitali kwarĩ anene a ita ngiri ĩmwe; nao andũ arĩa maarĩ hamwe nao magwatĩte ngo na matimũ maarĩ ngiri mĩrongo ĩtatũ na mũgwanja.

35Ningĩ thĩinĩ wa ciana cia Dani kwarĩ andũ ngiri mĩrongo ĩĩrĩ na inyanya na magana matandatũ arĩa maahotaga kwarania ita.

36O na thĩinĩ wa Asheri kwarĩ ngiri mĩrongo ĩna arĩa maahotaga kuumagara mathiĩ na mbũtũ ya ita, o na makahota kwarania ita.

37Na rĩrĩ, mũrĩmo ũrĩa ũngĩ wa Jorodani, thĩinĩ wa Areubeni, o na Agadi, o na nuthu ya mũhĩrĩga wa Manase, kwarĩ andũ ngiri igana na mĩrongo ĩĩrĩ arĩa maarĩ na indo cia mbaara cia mĩthemba yothe, nĩguo mathiĩ ita nacio.

38Acio othe-rĩ, maarĩ andũ a ita arĩa maahotaga kwarania ita, na nĩo maakinyire Hebironi marĩ na ngoro o ro ĩmwe kũna ya gũtua Daudi mũthamaki wa andũ othe a Isiraeli; o nao andũ arĩa angĩ othe maatigarĩte a Isiraeli maarĩ na ngoro o ro ĩmwe ũhoro-inĩ ũcio wa gũtua Daudi mũthamaki.

39Nao maaikarire na Daudi mĩthenya ĩtatũ kũu aarĩ, makĩrĩa o na makĩnyua; nĩ gũkorũo ariũ a ithe wao nĩmaamethagathagĩire mamatuge.

40O na ningĩ-rĩ, andũ arĩa maatũire gũkuhĩ nao, o nginya Isakaru, na Zebuluni, na Nafitali, nĩmaatwarithirie irio kuo ikuuĩtwo nĩ ndigiri, na ngamĩra, na nyũmbũ, o na ndegwa, nacio nĩ mũtu ũthondeketwo wa kũrĩo, na ikũmba cia ngũyũ ngime, na imanjika cia thabibu nyũmũ, na ndibei, o na maguta; o na magĩtwarithia ndegwa o na ng’ondu nyingĩ; nĩ gũkorũo kwarĩ gĩkeno kũu Isiraeli.

← Chapter 11 Jump to: Chapter 13 →