1 Chronicles 22

Kikuyu Bible (IBUKU RĨRĨA ITHERU RĨA NGAI)

← Chapter 21 Jump to: Chapter 23 →

1Hĩndĩ ĩo Daudi agĩkiuga atĩrĩ, Ino nĩyo nyũmba ya Jehova Ngai, nakĩo kĩgongona-inĩ gĩkĩ, nĩho Isiraeli marĩrutagĩra ihaki rĩa njino.

2Nake Daudi agĩathana akiuga atĩ ageni arĩa maarĩ bũrũri wa Isiraeli macokererio hamwe; akĩhe abundi amwe a mahiga wĩra wa gwacũhia mahiga ma gwaka nyũmba ya Ngai.

3Nake Daudi agĩkĩigithia igera nyingĩ mũno cia gũthondekwo mĩcumarĩ ya mĩrango ya gwĩkĩrũo mĩromo, o na ya igera cia kũnyitithania nyũmba; o na igera nyingĩ cia gĩcango itaathimirũo;

4o na mĩtarakwa ĩtangĩtarĩka; nĩ gũkorũo Azidoni o na andũ a Turo nĩmaatwarĩire Daudi mĩtarakwa mĩingĩ mũno.

5Nake Daudi akiuga atĩrĩ, Mũrũ wakwa Suleimani nĩ mũnyinyi na nĩ mwĩthĩ, nayo nyũmba ĩrĩa ĩgwakĩrũo Jehova no mũhaka ĩtuĩke thaka mũno, ĩgĩe ngumo, o na ĩĩkĩrĩrũo mabũrũri-inĩ mothe; na tondũ ũcio nĩngũigithia indo nĩ ũndũ wayo. Tondũ ũcio Daudi akĩigithia indo nyingĩ mũno o mbere ataanakua.

6Hĩndĩ ĩo agĩgĩĩta Suleimani mũrũwe, akĩmũtaara atĩ aakĩre Jehova Ngai wa Isiraeli nyũmba.

7Daudi agĩkĩĩra Suleimani, mũrũwe, atĩrĩ, Ha ũhoro wakwa-rĩ, ngoro yakwa nĩĩrendete atĩ njake nyũmba ĩĩtanĩtio na rĩĩtwa rĩa Jehova Ngai wakwa.

8No rĩrĩ, ũhoro wa Jehova nĩwanginyĩire ngĩĩrũo atĩrĩ, Wee nĩũitĩte thakame nyingĩ mũno, na ũkarũa mbaara nene mũno; wee tiwe ũgwaka nyũmba ĩĩtanĩtio na rĩĩtwa rĩakwa, nĩ ũndũ nĩũitĩte thakame nyingĩ, ngĩonaga.

9Atĩrĩrĩ, nĩũgaciara kahĩĩ, nako nĩgagatuĩka mũndũ wa gũikara ahoreire; na niĩ nĩngamũhe ũhurũko, aikare atiganĩte na thũ ciake ciothe iria ikamũrigicĩria; nĩ gũkorũo rĩĩtwa rĩake agetagwo Suleimani, na nĩngatũma Aisiraeli magĩe na thayũ, o na maikare mahoreire, matukũ make.

10Ũcio nĩwe ũgaaka nyũmba ĩĩtanĩtio na rĩĩtwa rĩakwa; na nĩagatuĩka mũrũ wakwa, na niĩ nduĩke ithe; na nĩngatũma gĩtĩ gĩake gĩa ũthamaki gĩikare kĩrũmĩte wega, thĩinĩ wa Isiraeli tene na tene.

11Tondũ ũcio, rĩu, mũrũ wakwa, Jehova aroikara hamwe nawe, na ũtũũre ũgaacĩire, na wake nyũmba ya Jehova Ngai waku, o ta ũrĩa aarĩtie ndeto igũkoniĩ.

12Tondũ ũcio Jehova arogĩta o gũkũhe ũũgĩ wa kũbarĩrĩra wega maũndũ, o na ũhoro wa kũmenya maũndũ; ningĩ arogũtaara ũhoro-inĩ wa gwatha Isiraeli, nĩ getha ũikarage ũmenyereire watho wa Jehova Ngai waku.

13Ũngĩtũũra ũmenyereire irĩra cia watho wa kũrũmĩrĩrũo, o na matuĩro ma cira marĩa Jehova aataarire Musa makoniĩ Isiraeli-rĩ, hĩndĩ ĩo nĩũgatũũra ũgaacĩire. Gĩa na hinya, na ũũmĩrĩrie; menya wĩtigĩre, o na kana ũmake.

14Na atĩrĩrĩ, o na harĩa ndatũire na mĩtangĩko-rĩ, nĩnjigithĩtie taranda cia thahabu ngiri igana rĩmwe nĩ ũndũ wa nyũmba ya Jehova, o na taranda cia betha ngiri ngiri; o na gĩcango o na igera ngĩiga itathimĩtwo nĩ ũndũ nĩ nyingĩ mũno; o nayo mĩtĩ na mahiga ngĩciiga nĩ ũndũ wa wĩra ũcio; nawe wakĩhota gũkanaciongerera.

15O na ningĩ-rĩ, aruti wĩra wĩ nao aingĩ mũno, enji mahiga o na aicũhia amo, na atemi mĩtĩ, o na andũ othe arĩa mohĩgĩrĩire ũruti wa wĩra wa mĩthemba yothe.

16Atĩrĩrĩ, thahabu, na betha, na gĩcango, o na igera-rĩ, itingĩtarĩka; tondũ ũcio kĩarahũke ũrute wĩra nacio, nake Jehova aroikara hamwe nawe.

17Ningĩ Daudi agĩgĩatha anene othe a Isiraeli mateithagie Suleimani, mũrũwe, akĩmera ũũ:

18Githĩ Jehova Ngai wanyu ndakĩrĩ hamwe na inyuĩ? O na ningĩ-rĩ, githĩ ndakĩmũhete ũhurũko na ndwere cianyu ciothe? Nĩ gũkorũo nĩaarekereirie andũ arĩa matũũraga bũrũri ũyũ, akĩmaneana moko-inĩ makwa, naguo bũrũri ũyũ ũgũikara wĩ mũtorie nĩ Jehova, o na andũ ake.

19Rĩu kĩroriei ngoro cianyu, o na mĩoyo yanyu, ũhoro-inĩ wa gũcaria Jehova Ngai wanyu; na tondũ ũcio kĩarahũkei, mwake handũ harĩa haamũre ha Jehova Ngai, nĩ getha ithandũkũ rĩa Jehova rĩa kĩrĩkanĩro rĩtwarũo nyũmba-inĩ ĩo ĩgwakwo ĩĩtanĩtio na rĩĩtwa rĩake, rĩĩ hamwe na indo iria theru cia Ngai.

← Chapter 21 Jump to: Chapter 23 →