1 Chronicles 29

Kikuyu Bible (IBUKU RĨRĨA ITHERU RĨA NGAI)

← Chapter 28 Jump to:

1Ningĩ Daudi, ũcio mũthamaki, agĩkĩĩra kĩrĩndĩ gĩothe kĩũnganĩte atĩrĩ, Suleimani, mũrũ wakwa, o ũyũ ũthurĩtwo nĩ Ngai, akĩrĩ o mũnyinyi, na nĩ mwĩthĩ, naguo wĩra ũrĩa ũkũrutwo nĩ mũnene; nĩ gũkorũo nyũmba ĩo ya ũnene ti mũndũ wa gũkũ thĩ ũgwakĩrũo, tiga o Jehova Ngai.

2Na rĩu niĩ na niĩ, nĩnjigithĩtie indo na hinya wakwa wothe nĩ ũndũ wa nyũmba ĩo ya Ngai wakwa, ngaigithia thahabu ya gũthondekwo indo cia thahabu, o na betha ya gũthondekwo indo cia betha, o na gĩcango gĩa gũthondekwo indo cia gĩcango, o na kĩgera gĩa gũthondekwo indo cia igera, o na mĩtĩ ya gũthondekwo indo cia mĩtĩ; na tũhiga tũrĩa twĩtagwo onigithi, na tũhiga tũrĩa tũthecagĩrĩrũo indo-inĩ, na tũhiga twa kũgemia nyũmba ĩo natuo, o na twa rangi wa mĩthemba mĩingĩ, na mĩthemba mĩingĩ ya tũhiga tũngĩ twa goro, o na mahiga maingĩ mũno ma nyaigĩ ya mũthemba mwega.

3O na ningĩ makĩria, tondũ wa ũrĩa ngoro yakwa ĩkenagĩra mũno nyũmba ya Ngai wakwa-rĩ, kuona atĩ ndĩ na mũthithũ wakwa kĩũmbe wa thahabu o na betha, nĩngũũheana nĩ ũndũ wa nyũmba ya Ngai wakwa, nyongerere indo ciothe iria njigithĩtie nĩ ũndũ wa nyũmba ĩo theru;

4naguo mũthithũ ũcio nĩ wa taranda ngiri ithatũ cia thahabu, o thahabu ĩrĩa ya Ofiru, o na taranda ngiri mũgwanja cia betha ĩrĩa ĩthondeketwo ĩgatherio wega mũno; icio-rĩ, nĩngũciheana cia kũhumba thingo cia nyũmba icio;

5ningĩ thahabu ĩo ĩthondeke indo cia thahabu, o na betha ĩthondeke indo cia betha, nĩ ũndũ wa wĩra wa mĩthemba yothe ũrĩa ũkarutwo na moko ma abundi. Rĩu-rĩ, nũ ũgũkĩĩamũra mũthenya ũyũ wa ũmũthĩ, harĩ Jehova arute indo na ũndũ wa kwĩendera na ngoro yake?

6Hĩndĩ ĩo anene a nyũmba cia maithe, o na anene a mĩhĩrĩga ya Isiraeli, o na anene arĩa maathaga andũ ngiri o ngiri, o na igana o igana, ita-inĩ, hamwe na aathani arĩa maaroraga wĩra ũrĩa warutagĩrũo mũthamaki, makĩruta indo na ũndũ wa kwĩendera na ngoro ciao;

7nao magĩkĩruta thahabu ya taranda ngiri ithano, na mbaũni ngiri ikũmi, nĩ ũndũ wa wĩra wa nyũmba ya Ngai, o na taranda ngiri ikũmi cia betha, na taranda ngiri ikũmi na inyanya cia gĩcango, na taranda cia kĩgera ngiri igana rĩmwe.

8Nao andũ arĩa maakorirũo marĩ na tũhiga twa goro magĩtũiga moko-inĩ ma Jehieli, Mũgerishoni, nĩguo tũigwo kũndũ kũrĩa kwaigagwo mũthithũ wa indo cia bata cia nyũmba ya Jehova.

9Hĩndĩ ĩo andũ acio magĩkena nĩ ũndũ nĩmaarutĩte indo ciao na kwĩendera, nĩ gũkorũo maarutĩire Jehova indo icio ciao na ngoro yao yothe nĩ ũndũ wa kwĩendera gwĩka ũguo; o nake Daudi ũcio mũthamaki agĩkena gĩkeno kĩnene mũno.

10Tondũ ũcio Daudi agĩkĩgooca Jehova arĩ mbere ya kĩrĩndĩ kĩu gĩothe; nake Daudi akiuga atĩrĩ, Ũrogoocwo, wee Jehova Ngai wa ithe witũ Isiraeli, tene na tene.

11Atĩrĩrĩ, wee Jehova, ũnene nĩ waku, o na hinya, o naguo riri, o na ũhootani, o na gwĩkĩrĩrũo; nĩ gũkorũo indo ciothe iria irĩ igũrũ o na thĩ nĩ ciaku; o naguo ũthamaki nĩ waku, wee Jehova; na ningĩ wee nĩwe ũnenehetio ũgakĩra indo ciothe.

12Ũtonga na gĩtĩo-rĩ, ciumaga kũrĩ wee, na nĩwe wathaga maũndũ mothe; o naguo hinya na ũhoti ii moko-inĩ maku, o nakuo kũnenehania kũrĩ o guoko-inĩ gwaku, o na kũhe andũ othe hinya.

13Na rĩu tondũ wa maũndũ macio, wee Ngai witũ, nĩtũgũgũcokeria ngatho, o na tũgakumia rĩĩtwa rĩaku rĩrĩa rĩagĩrĩire kũgoocwo mũno.

14No rĩrĩ, niĩ ndĩ ũ, o nao andũ akwa nĩ a, atĩ nĩkĩo tũkũhota kũruta indo na kwĩendera na ngoro ta ũguo twĩkĩte? Nĩ ũndũ-rĩ, indo ciothe ciumaga harĩ wee, nacio indo icio tũkũheete-rĩ, ciuma o ciaku wee mwene.

15Nĩ gũkorũo ithuĩ tũhaana ta andũ a kũngĩ, o na ta tũrĩ ageni tũkĩonwo nĩwe, o ta ũrĩa maithe maitũ mothe maatariĩ; matukũ maitũ gũkũ thĩ matariĩ o ta kĩĩruru, na gũtirĩ mwĩhoko wa gũtũũra.

16Atĩrĩrĩ, wee Jehova Ngai witũ, indo ici ciothe tũhaĩte tũgacihaarĩria cia gũgwakĩra nyũmba ĩĩtanĩtio na rĩĩtwa rĩaku rĩtheru-rĩ, ciumĩte o guoko-inĩ gwaku, na ciothe no ciaku wee mwene.

17O na ningĩ Ngai wakwa-rĩ, nĩnjũĩ atĩ nĩũtuĩragia maũndũ ma ngoro cia andũ, na ũgakenagĩra ũthingu. Naho ha ũhoro wakwa-rĩ, ndutĩte indo icio ciothe na kwĩendera nĩ ũndũ wa werekereru wa ngoro yakwa. Ningĩ rĩu ndĩ mũkenu nĩ ũndũ wa kwĩonera ũhoro ũyũ wa atĩ andũ aya aku me haha marakũrutĩra indo ciao na kwĩendera.

18Atĩrĩrĩ, wee Jehova, Ngai wa maithe maitũ, Iburahimu, na Isaaka, na Isiraeli, tũma atĩ ũndũ ũyũ tũreka ũtũũre ũririkanagwo nĩ andũ aku metarania-inĩ ma meciria ma ngoro ciao tene na tene, o na ũtũme atĩ ngoro ciao itũũre irũmĩte irorete harĩ wee;

19o nake Suleimani, mũrũ wakwa, ũmũhe ngoro nginyanĩru, nĩ getha amenyagĩrĩre maathani maku, na matuĩro maku ma cira, o na irĩra cia watho waku wa kũrũmĩrĩrũo, amarũmagĩrĩre mothe, ningĩ aake nyũmba ĩo ya ũnene, o ĩo njigithĩirie indo.

20Nake Daudi akĩĩra andũ othe arĩa monganĩte atĩrĩ, Rĩu kĩgoocei Jehova Ngai wanyu. Nao andũ acio othe magĩkĩgooca Jehova, Ngai wa maithe mao, makĩinamĩrĩria mĩtwe yao thĩ magĩkumia Jehova o na mũthamaki wao.

21Na rũciũ rũrũ rũngĩ makĩroka gũthĩnjĩra Jehova nyamũ, makĩrutĩra Jehova mahaki ma njino, namo maarĩ ma ndegwa ngiri ĩmwe, na ndũrũme ngiri ĩmwe, o na tũtũrũme ngiri ĩmwe, hamwe na magongona mamo ma indo cia kũnyuwo, o na magongona mangĩ maingĩ mũno nĩ ũndũ wa andũ othe a Isiraeli;

22nao makĩrĩĩra mbere ya Jehova mũthenya ũcio o na makĩnyua, marĩ na gĩkeno kĩnene mũno. Ningi magĩgĩtua Suleimani, mũrũ wa Daudi, mũthamaki ihinda rĩa kerĩ, nao makĩmũitĩrĩria maguta atuĩke mũnene wamũrĩirũo Jehova, nake Zadoku atuĩke mũthĩnjĩri-Ngai.

23Hĩndĩ ĩo Suleimani agĩgĩikarĩra gĩtĩ gĩa ũthamaki kĩa Jehova, agĩtuĩka mũthamaki ithenya rĩa ĩthe Daudi, nake agĩikara e mũgaacĩru; nao Aisiraeli othe makĩmwathĩkira.

24Nao anene othe, o na njamba ciothe, o na ariũ othe a mũthamaki Daudi o nao, magĩgĩĩtwara he Suleimani mũthamaki amaathage.

25Nake Jehova akĩnenehia Suleimani mũno mũno akĩonagwo nĩ Aisiraeli othe, o na agĩtũma ekĩrĩrũo mũno nĩ andũ gũkĩra mũthamaki o na ũrĩkũ wa arĩa maarĩ mbere yake kũu Isiraeli.

26Na rĩrĩ, Daudi, mũrũ wa Jesii, aathamakagĩra Aisiraeli othe.

27Narĩo ihinda rĩrĩa aathamakĩire Isiraeli rĩarĩ mĩaka mĩrongo ĩna no rĩrĩ, mĩaka mũgwanja aathamakire arĩ Hebironi, nayo mĩaka mĩrongo ĩtatũ na ĩtatũ agĩthamaka arĩ Jerusalemu.

28Nake agĩgĩkua e mũkũrũ mũno, aninĩte matukũ maingĩ, na e gĩtonga, o na e mũtĩĩku mũno; nake Suleimani, mũrũwe, agĩthamaka ithenya rĩake.

29Na rĩrĩ, ciĩko cia mũthamaki Daudi, o icio cia mbere o na cia kũrigĩrĩria-rĩ, nĩciandĩkĩtwo mohoro-inĩ ma Samueli ũrĩa muoni maũndũ, o na ma Nathani mũnabii, o na ma Gadi muoni maũndũ,

30hamwe na ũhoro wothe wa ũrĩa aathamakire, o na wa hinya ũrĩa aarĩ naguo, o na wa maũndũ mothe marĩa maamũkorire, we mwene o na Isiraeli, o na marĩa maakorire mothamaki marĩa mangĩ ma mabũrũri ma kũu.

← Chapter 28 Jump to: