1 Chronicles 21

Kikuyu Bible (IBUKU RĨRĨA ITHERU RĨA NGAI)

← Chapter 20 Jump to: Chapter 22 →

1Na rĩrĩ, Shaitani agĩkĩĩhanda nĩguo okĩrĩre Isiraeli, akĩarahũra ngoro ya Daudi nĩguo atare Isiraeli.

2Nake Daudi akĩĩra Joabu, o na anene a andũ atĩrĩ, Thiĩi mũgatare Aisiraeli mũmarutĩtie Biri-shiba o nginya Dani; mũcoke mũndehere ũhoro, nĩ getha ’menye ũrĩa maigana.

3Nake Joabu akiuga atĩrĩ, Jehova arotũma andũ ake maingĩhe maita igana gũkĩra ũrĩa maigana rĩu magĩtarũo; no rĩrĩ, mũthamaki ũyũ, mwathi wakwa, githĩ acio othe ti ndungata ciaku, wee mwathi wakwa? Nĩ kĩ gĩgũtũma, wee mwathi wakwa, wende gwĩkwo ũguo? Egũkĩhĩtithia Isiraeli ũguo nĩ ũndũ kĩ?

4No rĩrĩ, o na Joabu oiga ũguo-rĩ, kiugo kĩa mũthamaki nĩkĩamũhootire. Na tondũ ũcio Joabu agĩkiuma hau, akĩgera bũrũri wothe wa Isiraeli, agĩcoka agĩkinya Jerusalemu.

5Nake Joabu akĩhe Daudi ũhoro wa ũrĩa andũ acio maaiganĩte maatarũo; nao andũ othe a Isiraeli maarĩ arũme ngiri ngiri na ngiri igana, arĩa maacomoraga hiũ cia njora; o nao andũ a Juda maarĩ arũme ngiri magana mana na mĩrongo mũgwanja arĩa maacomoraga hiũ cia njora.

6No rĩrĩ, andũ a Lawii na Benjamini Joabu ndaigana kũmataranĩria na acio angĩ; nĩ ũndũ ũhoro ũcio wa mũthamaki warĩ mũthũũre mũno nĩ Joabu.

7Nake Ngai akĩigua ũũru nĩ ũndũ wa ũhoro ũcio, na akĩhũra Isiraeli.

8Nake Daudi akĩĩra Ngai atĩrĩ, Nĩnjĩhĩtie mũno nĩ ũndũ wa ũndũ ũcio njĩkĩte; no rĩrĩ, rĩu ndagũthaitha ũnjehererie wĩhia ũcio wakwa, niĩ ndungata yaku; nĩ gũkorũo nĩnjĩkĩte ũndũ wa ũkĩgu mũno.

9Nake Jehova akĩarĩria Gadi, ũrĩa wonagĩra Daudi maũndũ, akĩmwĩra atĩrĩ,

10Thiĩ warie na Daudi, ũmwĩre atĩ Jehova oiga ũũ: Atĩrĩrĩ, ngũkũigĩra mbere yaku maũndũ matatũ, nawe wĩthurĩre ũmwe wamo, nĩ getha ngwĩke guo.

11Tondũ ũcio Gadi agĩgĩthiĩ agĩkinya he Daudi, akĩmwĩra atĩrĩ, Jehova oigĩte ũũ: Atĩrĩrĩ, thura ũndũ ũmwe wa maya matatũ, o ũrĩa ũkwenda,

12ũkorũo nĩ mĩaka ĩtatũ ya ng’aragu, o na kana mĩeri ĩtatũ ũninwo nĩ thũ ciaku, rĩrĩa ũgũthingatwo na hiũ cia njora cia thũ ciaku, o na kana hihi mĩthenya ĩtatũ kũgĩe rũhiũ rũa Jehova, naruo nĩ rũa atĩ kũgĩe mũthiro bũrũri ũyũ, nake mũraika wa Jehova aninane kũndũ guothe mĩhaka-inĩ ya Isiraeli. Na tondũ ũcio wĩcirie ũmenye icokia rĩrĩa ngũcokeria ũrĩa ũndekirie.

13Nake Daudi agĩkĩĩra Gadi atĩrĩ, Hĩ! Ndĩ hairũ rĩu! No rĩrĩ, nĩ kaba ngũe moko-inĩ ma Jehova, nĩ ũndũ tha ciake nĩ nyingĩ mũno, ndikagũe moko-inĩ ma andũ a gũkũ thĩ.

14Tondũ ũcio Jehova agĩgĩtwarithĩria Isiraeli mũthiro, naho hagĩkua andũ a Isiraeli ngiri mĩrongo mũgwanja.

15Nake Ngai akĩrekia mũraika Jerusalemu nĩguo arĩnine; no rĩrĩ, hĩndĩ ĩrĩa aagwataga kũrĩnina-rĩ, Jehova akĩbara ũndũ ũcio, nake akĩĩrira nĩ ũndũ wa ũũru ũcio, agĩkĩĩra mũraika ũrĩa waninanaga atĩrĩ, Nĩkũiganĩte; rĩu girĩrĩria guoko gwaku. Nake mũraika ũcio wa Jehova aarũgamĩte kĩhuhĩro-inĩ kĩa ngano kĩa Orinani, Mũjebusi.

16Nake Daudi agĩtiira maitho, akĩona mũraika ũcio wa Jehova arũgamĩte rĩera-inĩ gatagatĩ ga thĩ na igũrũ, anyitĩte rũhiũ rũcomore na guoko gwake rũambararĩirio Jerusalemu. Nake Daudi, o na athuri, makĩĩgũithia maroretie mothiũ mao thĩ, nao mehumbĩte matama ma ikũnia.

17Nake Daudi akĩũria Ngai atĩrĩ, Githĩ ti niĩ ndaathanire ngiuga andũ matarũo? Niĩ nĩ niĩ njĩhĩtie na ngeka waganu mũingĩ; no rĩrĩ, andũ aya matariĩ ta ng’ondu, nĩ atĩa mekĩte? Ndagũthaitha, wee, Jehova Ngai wakwa, ũreke guoko gwaku kũnjũkĩrĩre arĩ niĩ, o na nyũmba ya baba; no rĩrĩ, nĩgũtige gũũkĩrĩra andũ aku, atĩ nĩguo mahũrũo na mũrimũ.

18Hĩndĩ ĩo mũraika wa Jehova agĩatha Gadi akere Daudi aambate, agaakĩre Jehova kĩgongona kĩhuhĩro-inĩ kĩa ngano kĩu kĩa Orinani, Mũjebusi.

19Nake Daudi agĩkĩambata o ta ũguo Gadi oigĩte thĩinĩ wa rĩĩtwa rĩa Jehova.

20Nake Orinani akĩĩhũgũra na thutha akĩona mũraika ũcio, nao ariũ ake ana arĩa maarĩ hamwe nake makĩĩhitha. Na rĩrĩ, Orinani nĩ kũhuha aahuhaga ngano.

21Na rĩrĩ, Daudi aakuhĩhĩria Orinani-rĩ, Orinani agĩcũthĩrĩria akĩona Daudi, agĩkiuma hau kĩhuhĩro-inĩ kĩu kĩa ngano, akĩinamĩrĩra Daudi, aturumithĩtie ũthiũ thĩ.

22Nake Daudi agĩkĩĩra Orinani atĩrĩ, ’He handũ haha kĩhuhĩro-inĩ gĩkĩ kĩa ngano, njakĩre Jehova kĩgongona ho; na nĩ kũgũra ngũgũra harĩ wee o ta ũrĩa thogora waho wothe ũtariĩ; nĩ getha mũthiro ũyũ ũgirĩrĩrio, ũtige kũnina andũ.

23Nake Orinani agĩkĩĩra Daudi atĩrĩ, Kĩoe, mwathi wakwa, mũthamaki ũyũ, wĩke o ta ũrĩa ũkuona kwagĩrĩire; ningĩ o nacio ng’ombe cia mahaki ma njino, o na mĩnyamũ ĩrĩa ĩhũraga ngano ĩtuĩke ngũ, o na ngano ya gũtuĩka igongona rĩa mũtu-rĩ, icio ciothe nĩndakũhe.

24Nake mũthamaki Daudi agĩkĩĩra Orinani atĩrĩ, Aca, ti ũguo; no rĩrĩ, ti-itherũ nĩ kũgũra ngũgũra indo icio o ta ũrĩa thogora wacio wothe ũtariĩ; nĩ ũndũ ndingĩoya kĩndũ gĩaku ndutĩre Jehova gĩtuĩke gĩake, o na kana ndute ihaki rĩa njino itarĩ kĩndũ o na kĩ ndĩrĩrutĩire.

25Tondũ ũcio Daudi akĩhe Orinani thahabu ya cekeri magana matandatũ ĩgĩthimwo, nĩ ũndũ wa handũ hau.

26Nake Daudi agĩgĩakĩra Jehova kĩgongona ho, agĩcoka akĩrutĩra mahaki ma njino ho, o na magongona ma ũiguano, na agĩkaĩra Jehova; nake Jehova akĩmũcokeria ũhoro uumĩte igũrũ na ũndũ wa mwaki gwakana igũrũ rĩa kĩgongona kĩu kĩa ihaki rĩa njino.

27Nake Jehova agĩgĩatha mũraika wake; nake agĩcokia rũhiũ rũake njora.

28Hĩndĩ ĩo-rĩ, Daudi ona atĩ Jehova nĩamũcokeirie ũhoro kĩhuhĩro-inĩ kĩu kĩa Orinani Mũjebusi-rĩ, agĩcoka kũrutagĩra igongona ho.

29Nĩ gũkorũo gĩikaro kĩa Jehova, kĩrĩa Musa aathondekeire werũ-inĩ, o na kĩgongona kĩa ihaki rĩa njino, ciarĩ itĩri-inĩ rĩa kũndũ gũtũũgĩru kũu Gibeoni hĩndĩ ĩo.

30No rĩrĩ, Daudi ndaigana kũhota gũthiĩ mbere yakĩo gũtuĩria ũhoro he Ngai, nĩ gũkorũo nĩetigagĩra rũhiũ rũa njora rũa mũraika wa Jehova.

← Chapter 20 Jump to: Chapter 22 →