Joshua 11

Kikuyu Bible (IBUKU RĨRĨA ITHERU RĨA NGAI)

← Chapter 10 Jump to: Chapter 12 →

1Na gũgĩkinya atĩrĩ, atĩ hĩndĩ ĩrĩa Jabini, mũthamaki wa Hazoru, aaiguire ũhoro wa maũndũ macio, akĩrekania kwĩ Jobabu, mũthamaki wa Madoni, o na kwĩ mũthamaki wa Shimuroni o na kwĩ mũthamaki wa Akishafu,

2o na kũrĩ athamaki arĩa maarĩ mwena wa gathigathini, bũrũri ũrĩa wĩ irĩma nyingĩ, o na arĩa maarĩ Araba, mwena wa gũthini wa Kinerothu, o na ituamba-inĩ, o na bũrũri ũrĩa mũtũũgĩru wa Dori mwena wa ithũĩro,

3o na kũrĩ Akanaani arĩa maatũire mwena wa irathĩro, o na arĩa maatũire mwena wa ithũĩro, o na kũrĩ Aamori, na Ahiti, na Aperizi, na Ajebusi arĩa maarĩ bũrũri ũrĩa wĩ irĩma nyingĩ, o na kũrĩ Ahivi arĩa maarĩ mũhuro wa kĩrĩma kĩa Herimoni, o kũu bũrũri wa Mizipa.

4Nao magĩkiumagara, o ene, o na mbũtũ ciao ciothe me hamwe nacio, nao maarĩ andũ aingĩ mũno, na maaingĩhĩte o ta mũthanga ũrĩa ũrĩ hũgũrũrũ-inĩ cia iria, nao maathiire me na mbarathi, o na ngari cia ita nyingĩ mũno.

5Nao athamaki acio othe magĩcemania o handũ hamwe; magĩthiĩ makĩamba hema ciao o handũ hamwe hakuhĩ na maĩ ma Meromu, nĩ getha mahũrane na Isiraeli.

6Nake Jehova akĩĩra Joshua atĩrĩ, Menya wĩtigĩre nĩ ũndũ wao; nĩ gũkorũo rũciũ ihinda ta rĩrĩ, nĩguo ngamarekereria ndĩmaneane harĩ Isiraeli moragĩtwo othe; mbarathi ciao ũgacitemenga magũrũ ũcithuithie; o nacio ngari ciao cia ita ũcicine na mwaki.

7Tondũ ũcio Joshua agĩthiĩ, me hamwe na andũ othe a ita, agĩitĩka kũmokĩrĩra o na ihenya, o kũu gũkuhĩ na maĩ ma Meromu, akĩmakorerera kuo.

8Nake Jehova akĩmarekereria akĩmaneana moko-inĩ ma Isiraeli, nao makĩmahũra makĩmateng’eria, makĩmakinyia o Zidoni itũũra rĩrĩa inene, o na makĩmakinyia Misirefothu-maimu, o na ningĩ makĩmakinyia gĩtuamba kĩa Mizipe kĩrĩa kĩrĩ mwena wa irathĩro; magĩkĩmahũra, na matimatigarĩrie mũndũ o na ũmwe.

9Nake Joshua agĩkĩmeka o ta ũrĩa Jehova aamwathĩte; agĩtemenga mbarathi ciao magũrũ agĩcithuithia, o na agĩcina ngari ciao cia ita na mwaki.

10Ningĩ Joshua agĩkĩhũndũka o hĩndĩ ĩo, agĩtunyana itũũra rĩa Hazoru, agĩkĩhũra mũthamaki warĩo na rũhiũ rũa njora; nĩ gũkorũo mbere ya hĩndĩ ĩo itũũra rĩu rĩa Hazoru nĩrĩo rĩarĩ rĩa gũtongoria mothamaki macio.

11Nao makĩũraga andũ othe arĩa maarĩ kuo na hiũ cia njora, makĩmanina o kũmanina biũ na gũtirĩ mũndũ o na ũmwe watigirũo muoyo; nake agĩcinithia Hazoru na mwaki.

12O namo matũũra mothe ma athamaki acio, o na athamaki amo othe o ene, Joshua akĩmanyita othe, akĩmahũra na hiũ cia njora, akĩmanina o kũmanina biũ, o ta ũrĩa Musa ndungata ya Jehova yaathanire.

13No rĩrĩ, ha ũhoro wa matũũra marĩa maakĩtwo ihumbu-inĩ igũrũ-rĩ, Aisiraeli matiacinire o na rĩmwe rĩamo, tiga o Hazoru riiki; rĩu norĩo Joshua aacinithirie.

14Nacio indo ciothe iria ciatahirũo matũũra macio, o na ũhiũ wothe, ciana cia Isiraeli nĩciegwatĩire igĩthiĩ nacio; no rĩrĩ, andũ othe, mũndũ o mũndũ, nĩ kũhũra ciamahũrire na hiũ cia njora, o nginya ikĩmanina o kũmanina biũ, na itiigana gũtigia mũndũ o na ũmwe muoyo.

15O ta ũrĩa Jehova aathire Musa ndungata yake, ũguo noguo nake Musa aathire Joshua; nake Joshua agĩĩka o ta ũguo; na ndaigana gũtiga ũndũ o na ũmwe ũtekĩtwo wa maũndũ mothe marĩa Jehova aathire Musa mekwo.

16Ũguo nĩguo Joshua aagĩtunyanire bũrũri ũcio wothe; nĩguo bũrũri ũrĩa wĩ irĩma nyingĩ, o na mwena wa Gũthini wothe, o na bũrũri wothe wa Gosheni, o na ituamba-inĩ, o na Araba, o na bũrũri ũrĩa wĩ irĩma nyingĩ wa Isiraeli, hamwe na ituamba ciaguo,

17kuuma kĩrĩma kĩa Halaku, kĩrĩa kĩrorete Seiru, o nginya Baali-gadi kĩanda-inĩ kĩa Lebanoni, mũhuro wa kĩrĩma kĩa Herimoni; o nao athamaki ao othe akĩmanyita, akĩmahũra, akĩmoraga.

18Nake Joshua akĩhũrana mbaara na athamaki acio othe ihinda iraya.

19Na hatiarĩ itũũra o na rĩmwe rĩaarire ũhoro na ciana cia Isiraeli, tiga o Ahivi arĩa maatũũraga Gibeoni. Ciana cia Isiraeli nĩ gũtunyana ciatunyanire matũũra mao mothe na ũndũ wa kũhũrana mbaara nao.

20Nĩ ũndũ Jehova nĩwe watũmaga momie ngoro, nĩ getha makahũrane mbaara na Isiraeli, nĩguo amanine o kũmaninithia biũ na matikaiguĩrũo tha, no makĩria nĩguo amanine o kũmaninithia, o ta ũrĩa Jehova aathire Musa gwĩkwo.

21Nake Joshua hĩndĩ ĩo agĩthiĩ akĩninithia Aanaki, bũrũri ũcio wĩ irĩma nyingĩ, moime Hebironi, na Debiri, na Anabu, na bũrũri ũrĩa wothe wĩ irĩma nyingĩ wa Juda, o na bũrũri wothe ũrĩa wĩ irĩma nyingĩ wa Isiraeli, mathire biũ; akĩmanina o kũmaninithia biũ hamwe na matũũra macio mao.

22Hatirĩ mũndũ o na ũmwe wa acio metagwo Aanaki watigarire bũrũri wa ciana cia Isiraeli, tiga o matũũra ma Gaza, na Gathu, na Ashidodi moiki; kũu nokuo gwatigarire amwe ao.

23Ũguo nĩguo Joshua aatunyanire bũrũri ũcio wothe, o ta ũrĩa maũndũ mothe marĩa Jehova aaririe na Musa ũhoro wamo maatariĩ; nake akĩũhe Aisiraeli, ũgayũo o ta ũrĩa mĩhĩrĩga yao yaamũkanĩte, ũtuĩke wao. Naguo bũrũri ũcio ũgĩkĩhorera, mbaara ĩgĩthira.

← Chapter 10 Jump to: Chapter 12 →