Joshua 13

Kikuyu Bible (IBUKU RĨRĨA ITHERU RĨA NGAI)

← Chapter 12 Jump to: Chapter 14 →

1Na rĩrĩ, rĩrĩa Joshua aakorirũo e mũkũrũ, na agatindĩkanga mĩaka ma, Jehova agĩkĩmwĩra atĩrĩ, Wee rĩu wĩ mũkũrũ na nĩũtindĩkangĩte mĩaka ma, na atĩrĩ, o na rĩu no hatigarĩte bũrũri mũnene mũno wa kwĩgwatĩrũo ũtuĩke wanyu.

2Maya nĩmo mabũrũri marĩa matigarĩte; nĩ bũrũri wothe wa Afilisiti, o na wa Ageshuru othe,

3kuuma Shihoru, naruo nĩruo rũũĩ rũrĩa rũĩgiritanĩtie na Misiri, nginya mũhaka-inĩ wa Ekironi mwena wa gathigathini, ũrĩa wonagwo ta ũrĩ wa Akanaani; nao athamaki a Afilisiti nĩ aya atano, nĩ mũthamaki wa Agaza, na wa Aashidodi, na wa Aashikeloni, na wa Agiti, na wa Aekironi; o na wa Aavimu,

4nao nĩo matũũrĩte mwena wa gũthini; na bũrũri wothe wa Akanaani, o na Meara, kũu bũrũri wa Azidoni, nginya o Afeku o na nginya o mũhaka-inĩ wa Aamori;

5na bũrũri wa Agebali, o na Lebarioni guothe, mwena ũrĩa ũrorete irathĩro rĩa riũa, kuuma Baali-gadi, mũhuro wa kĩrĩma kĩa Herimoni, nginya o itonyero-inĩ rĩa Hamathu;

6na bũrũri wa andũ othe arĩa matũũraga bũrũri ũrĩa wĩ irĩma nyingĩ kuuma Lebanoni nginya Misirefothu-maimu, naguo ũguo nĩ ta kuuga Azidoni othe. Acio nĩ niĩ ngamaingata mehere mbere ya ciana cia Isiraeli; no rĩrĩ, wee gayania Aisiraeli mabũrũri macio mothe mamegwatĩre matuĩke mao na ũndũ wa kũmacukĩra mĩtĩ, o ta ũrĩa ndagwathire.

7Tondũ ũcio gayania mĩhĩrĩga ĩo kenda, hamwe na nuthu ya mũhĩrĩga wa Manase mabũrũri maya.

8Tondũ-rĩ, Areubeni, na Agadi, hamwe na nuthu ĩrĩa ĩngĩ ya Manase ũcio, nĩmaarĩkirie kũgwata mabũrũri ma gũtuĩka mao marĩa maaheirũo nĩ Musa mũrĩmo ũrĩa ũngĩ wa Jorodani, mwena ũrĩa ũrorete irathĩro, o ta ũrĩa Musa, ndungata ya Jehova, yamaheire;

9kuuma Aroeru, rĩrĩa rĩrĩ ngiki-inĩ cia kĩanda kĩa Arinoni, o na itũũra rĩrĩa rĩĩ gatagatĩ ga kĩanda kĩu, o na werũ ũrĩa mũtũũgĩru wa Medeba wothe, o nginya Diboni;

10o na matũũra mothe ma Sihoni, mũthamaki wa Aamori, ũrĩa wathamakaga Heshiboni, o nginya mũhaka-inĩ wa ciana cia Amoni,

11o na Gileadi, o na bũrũri wa Ageshuru, na wa Amaakathi, o na kĩrĩma kĩa Herimoni gĩothe, na Bashani guothe o nginya Saleka;

12o na kũu Bashani, nĩmaaheirũo bũrũri wothe wa Ogu, ũrĩa wathamakaga Ashitarothu o na Edirei (ũcio nĩwe watigarire wa matigari ma Arefaimu); nĩ gũkorũo acio Musa nĩaamahũrire agĩkĩmarutũrũra.

13No rĩrĩ, ciana cia Isiraeli itiigana kũrutũrũra Ageshuru na Amaakathi; no rĩrĩ, Ageshuru na Amaakathi matũire thĩinĩ wa Isiraeli o na ũmũthĩ.

14Naguo mũhĩrĩga wa Lawii wiki noguo ataaheire bũrũri o na ũrĩkũ wa gũtuĩka waguo. Tondũ-rĩ, igai rĩa Lawii ũcio nĩ indo iria irutagĩrũo Jehova, Ngai wa Isiraeli, cia gũcinwo na mwaki, o ta ũrĩa aamwĩrĩte.

15Nake Musa aakĩheire mũhĩrĩga wa ciana cia Reubeni igai o ta ũrĩa mbarĩ ciacio ciatariĩ.

16Naguo mũhaka wacio warutĩtio Aroeru, itũũra rĩrĩa rĩrĩ ngiki-inĩ cia kĩanda kĩa Arinoni, o na itũũra rĩrĩa rĩĩ gatagatĩ ga kĩanda kĩu, o na werũ ũrĩa mũtũũgĩru wĩ gũkuhĩ na Medeba;

17o na Heshiboni, na matũũra marĩo mothe marĩa me werũ ũcio, namo nĩmo Diboni, na Bamothu-baali na Bethi-baali-meoni;

18na Jahazu, na Kedemoshu, na Mefaathu;

19na Kiriathaimu, na Sibima, na Zerethu-shaharu rĩrĩa rĩĩ kĩrĩma-inĩ gĩa kĩanda kĩu;

20o na Bethi-peoru, o na iharũrũka cia Pisiga, na Bethi-jeshimothu,

21o na matũũra mothe ma werũ ũcio mũtũũgĩru, o na ũthamaki wothe wa Sihoni, mũthamaki wa Aamori ũrĩa watũire athamakaga Heshiboni, o ũcio Musa aahũranĩirie na anene a Midiani, nao nĩo Evi, na Rekemu, na Zuru, na Huru, na Reba, anene a Sihoni arĩa maatũire bũrũri ũcio.

22O nake Balaamu, mũrũ wa Beoru, ũrĩa warĩ mũragũri, akĩũraganĩrio na andũ arĩa angĩ moragirũo nĩ ciana cia Isiraeli na rũhiũ rũa njora.

23Naguo mũhaka wa ciana cia Reubeni warĩ Jorodani, o na rũgiki-inĩ rũaruo. Nakuo kũndũ kũu, hamwe na matũũra makuo, o na tũtũũra twakuo, nĩkuo ciana cia Reubeni ciegwatĩire gũgĩtuĩka bũrũri wacio, o ta ũrĩa mbarĩ ciacio ciatariĩ.

24Ningĩ Musa akĩhe mũhĩrĩga wa Gadi, naguo nĩguo ciana cia Gadi, igai, o ta ũrĩa mbarĩ ciacio ciatariĩ.

25Naguo mũhaka wacio warĩ Jezeru, o na matũũra mothe ma Gileadi, o na nuthu ya bũrũri wa ciana cia Amoni, o nginya Aroeru, itũũra rĩrĩa rĩng’etheire Raba;

26o na kuuma Heshiboni nginya Ramathu-mizipe, o na Betonimu; o na kuuma Mahanaimu nginya mũhaka-inĩ wa Debiri;

27o na Bethi-haramu, na Bethi-nimira, na Sukothu, na Zafoni, matũũra ma gĩtuamba-inĩ, nakuo nĩ kũrĩa gwatigarĩte gwa ũthamaki-inĩ wa Sihoni, mũthamaki wa Heshiboni; mũhaka wao-rĩ, wambatanĩtie na Jorodani o nginya rũgiki-inĩ rũa iria rĩa Kinerethu, mũrĩmo ũcio ũngĩ wa Jorodani, mwena ũcio wa irathĩro.

28Ũcio nĩguo bũrũri ũrĩa ciana cia Gadi ciegwatĩire ũtuĩke wacio hamwe na matũũra maguo, o na tũtũũra twaguo o ta ũrĩa mbarĩ ciacio ciatariĩ.

29Ningi Musa akĩhe nuthu ya mũhĩrĩga wa Manase igai rĩayo, rĩgĩkĩheo nuthu ĩo ya mũhĩrĩga wa ciana cia Manase o ta ũrĩa mbarĩ ciayo ciatariĩ.

30Naguo mũhaka wacio warutĩtio o kũu Mahanaimu; naguo bũrũri wacio ũgĩgĩtuĩka nĩ kũu Bashani guothe, na kũrĩa guothe gwathamakagwo nĩ Ogu, mũthamaki wa Bashani, o na matũũra mothe ma Jairu, marĩa maarĩ kũu Bashani, namo mothe nĩ matũũra mĩrongo ĩtandatũ;

31na rĩrĩ, nuthu ya Gileadi, na Ashitarothu, na Edirei, namo nĩ matũũra ma kũndũ kũrĩa gwathamakagwo nĩ Ogu kũu Bashani-rĩ, kũu guothe kwarĩ gwa ciana cia Makiru, mũrũ wa Manase, naguo ũguo nĩ ta kuuga kwa nuthu ya ciana cia Makiru, o ta ũrĩa mbarĩ ciacio ciatariĩ.

32Macio nĩmo mabũrũri marĩa Musa aagayanirie kũu werũ-inĩ wa Moabi, mũrĩmo ũcio ũngĩ wa Jorodani, kũng’etheire Jeriko, mwena wa irathĩro, matuĩke igai rĩa kũgayanio.

33No mũhĩrĩga wa Lawii-rĩ, Musa ndaigana kũũhe igai o na rĩrĩkũ; Jehova, Ngai wa Isiraeli, nĩwe igai rĩao, o ta ũrĩa aamerire.

← Chapter 12 Jump to: Chapter 14 →