Joshua 23

Kikuyu Bible (IBUKU RĨRĨA ITHERU RĨA NGAI)

← Chapter 22 Jump to: Chapter 24 →

1Na gũgĩkinya atĩrĩ, atĩ matukũ maingĩ maathira, o hĩndĩ ĩrĩa Jehova aatũmĩte Aisiraeli maikare mahoreire magatiga mbaara na thũ ciao ciothe iria ciamarigicĩirie na mĩena yothe, nake Joshua agĩkorũo e mũkũrũ mũno, na agatindĩkanga mĩaka ma-rĩ,

2agĩgĩĩta Aisiraeli othe, athuri ao, na anene ao, na aciri ao, o na anyabara ao, agĩkĩmera atĩrĩ, Rĩu ndĩ mũkũrũ na nĩndindĩkangĩte mĩaka ma;

3na inyuĩ nĩmuonete maũndũ mothe marĩa Jehova Ngai wanyu ekĩte ndũrĩrĩ ici ciothe nĩ ũndũ wanyu; nĩ gũkorũo Jehova Ngai wanyu nĩwe wamũhũranĩire.

4Atĩrĩrĩ, rĩu nĩndĩmũgayanĩtie ndũrĩrĩ ici itigarĩte, nĩguo ituĩke igai rĩa mĩhĩrĩga yanyu, hamwe na mabũrũri ma ndũrĩrĩ iria ndaninire o kũnina biũ, kuuma Jorodani o nginya iria-inĩ rĩrĩa inene, mwena ũrĩa ũrorete ithũĩro rĩa riũa.

5Nake Jehova Ngai wanyu nĩwe ũgacithinĩkania imweherere, o na aciingate mũtigacoke gũciona; naguo bũrũri wacio nĩmũkawĩgwatĩra ũtuĩke wanyu, o ta ũrĩa Jehova Ngai wanyu aamwĩrire.

6Tondũ ũcio ũmĩrĩriai mũno, mũrũmie o na mwĩkage maũndũ mothe marĩa maandĩkĩtwo ibuku-inĩ rĩa watho wa Musa, mũtikanagarũrũke na mwena ũngĩ, wa ũrĩo, o na kana wa ũmotho, mũmatige;

7mũtikanatonyane na ndũrĩrĩ ici, o ici itigĩtwo gũkũ thĩinĩ wanyu, o na mũtikanagwete marĩĩtwa ma ngai ciacio, kana mũndũ o na ũrĩkũ ehĩte agĩcigwetaga, kana mũcitungatĩre, o na kana mũciinamĩrĩre;

8no rĩrĩ, wĩgwatanagiei na Jehova Ngai wanyu, o ta ũrĩa mũtũire mwĩkaga nginya o mũthenya ũyũ wa ũmũthĩ.

9Nĩ gũkorũo Jehova nĩamũingatĩire ndũrĩrĩ nene, na irĩ hanya mũno, imweherere; na ha ũhoro wanyu-rĩ, hatirĩ mũndũ o na ũmwe ũrĩ wahota kũmwĩtiiria o na ũmũthĩ.

10Mũndũ ũmwe thĩinĩ wanyu akaingataga andũ ngiri; nĩ ũndũ Jehova Ngai wanyu nĩwe ũkũmũhũranĩra, o ta ũrĩa aamwĩrire.

11Tondũ ũcio wĩmenyererei mũno mwendage Jehova Ngai wanyu.

12Nĩ ũndũ-rĩ, hihi mũngĩcoka na thutha o na atĩa, mwĩgwatanie na andũ aya matigarĩte a ndũrĩrĩ ici, o ici itigarĩte gũkũ thĩinĩ wanyu, mũgũranĩre nacio, o na mũtonyane nacio, o nacio itonyane na inyuĩ,

13menyai o mũno mũno atĩ Jehova Ngai wanyu ndagagĩcoka kũingata ndũrĩrĩ ici mũtikanacoke gũciona; no rĩrĩ, igũtuĩka ta ũndũ wa kũmũhenereria, o na ta mũtego wa kũmũgwatia mwagane, o na ituĩke ta ikayo rĩa kũmũhũra mĩena, o na ta mĩigua ya kũmũtũraga maitho, o nginya hĩndĩ ĩrĩa mũgathirĩrĩkĩra, mwehere bũrũri ũyũ mwega Jehova Ngai wanyu amũheete.

14Na atĩrĩrĩ, rĩu ũmũthĩ niĩ na niĩ nĩ gũthiĩ ngwĩthiĩra na njĩra ĩrĩa ĩgeragwo nĩ andũ othe a thĩ; na inyuĩ inyuothe nĩmũũĩ na ngoro cianyu, o na maroho manyu, atĩ mũtirĩ mwaaga ũndũ o na ũmwe wa maũndũ mothe mega marĩa Jehova Ngai wanyu aaririe ũhoro wamo mamũkoniĩ; maũndũ macio mothe nĩmaahingirio o wega, na hatirĩ ũndũ o na ũmwe wamo wanaaga kũhingio.

15Na nĩgũgakinya atĩrĩ, atĩ o ta ũguo maũndũ macio mothe mega maamũkinyĩire, o marĩa Jehova Ngai wanyu aamwĩrire ũhoro wamo-rĩ, ũguo noguo Jehova akamũrehithĩrie maũndũ mothe moru, o marĩa aaririe ũhoro wamo, o nginya hĩndĩ ĩrĩa akamũnina mwehere bũrũri ũyũ mwega Jehova Ngai wanyu amũheete.

16Hĩndĩ ĩrĩa mũkaagarara kĩrĩkanĩro kĩa Jehova Ngai wanyu, kĩrĩa aamwathire mũrũmagĩrĩre, mũthiĩ mũgatungatĩre ngai ingĩ, mũciinamĩrĩre-rĩ, hĩndĩ ĩo nĩguo Jehova agacinwo nĩ marakara nĩ ũndũ wanyu, na nĩmũgathira narua o gũthira biũ, mwehere bũrũri ũyũ mwega amũheete.

← Chapter 22 Jump to: Chapter 24 →