Joshua 7

Kikuyu Bible (IBUKU RĨRĨA ITHERU RĨA NGAI)

← Chapter 6 Jump to: Chapter 8 →

1No rĩrĩ, ciana cia Isiraeli nĩciaagararire watho ũkoniĩ indo icio ciaamũrĩtwo cia kũninwo; nĩ gũkorũo Akani wa Karimi, ũrĩa warĩ mũrũ wa Zabedi wa Zera, wa mũhĩrĩga wa Juda, nĩoire indo imwe o ro icio ciaamũrĩtwo, agĩthiĩ nacio; nake Jehova agĩcinwo nĩ marakara nĩ ũndũ wa ciana cia Isiraeli.

2Ningĩ Joshua akĩrekia andũ moime Jeriko mathiĩ Ai, itũũra rĩakuhanĩrĩirie na Beth-aveni, mwena wa irathĩro wa Beth-eli, agĩkĩmaarĩria, akĩmera atĩrĩ, Thiĩi mũgathigane bũrũri ũcio. Nao andũ acio magĩkĩambata magĩthigana Ai.

3Nao magĩkĩhũndũka he Joshua, makĩmwĩra atĩrĩ, Tiga gũtwarithia andũ othe kũu; no rĩrĩ, reke gũthiĩ ta andũ ngiri igĩrĩ kana ithatũ, makahũre Ai; tiga kũnogia andũ othe ũkĩmatwara kũu, nĩ ũndũ andũ acio nĩ anyinyi.

4Gũgĩkĩambata o ta andũ ngiri ithatũ, nao makĩũrĩra andũ a Ai.

5Nao andũ acio a Ai makĩũraga ta andũ mĩrongo ĩtatũ na atandatũ thĩinĩ wao, magĩkĩmateng’eria mamarutĩte kĩhingo-inĩ gĩa itũũra rĩu, makĩmakinyia Shebarimu, nao magĩkĩmahũra magĩikũrũka kĩgaragaro-inĩ kĩu; nacio ngoro cia andũ acio a Isiraeli ikĩringĩka, makĩiyũrũo nĩ maĩ nda.

6Nake Joshua agĩgĩtembũranga nguo ciake, akĩĩgũithia thĩ, agĩturumithia ũthiũ thĩ mbere ya ithandũkũ rĩa Jehova o nginya hwaĩ-inĩ, we mwene, o na athuri a Isiraeli; magĩkĩĩĩkĩra mũhu mĩtwe.

7Nake Joshua agĩkiuga atĩrĩ, Hĩ, wee Jehova Ngai! Waringirie andũ aya rũũĩ rũa Jorodani ũũke ũtũneane moko-inĩ ma Aamori matũnine nĩkĩ? Na arĩ korũo nĩtwonire tũiganĩtwo nĩ gũtũũra mũrĩmo ũcio ũngĩ wa Jorodani!

8Atĩrĩrĩ, Jehova, ingĩgĩcoka kuuga atĩa rĩu, kuona atĩ Isiraeli nĩmahutatĩire thũ ciao!

9Tondũ-rĩ, Akanaani, o na andũ arĩa angĩ othe matũũraga bũrũri ũyũ, nĩmekũigua ũhoro ũcio, nao moke matũrigicĩrie na mĩena yothe, matũme rĩĩtwa riitũ rĩũre biũ gũkũ thĩ; nawe ũgagĩĩka atĩa nĩ ũndũ wa rĩĩtwa rĩu rĩaku inene mũno?

10Nake Jehova agĩkĩĩra Joshua atĩrĩ, Ũkĩra; ũkwĩgũithia ũguo ũturumithĩtie ũthiũ thĩ nĩkĩ?

11Isiraeli nĩ kwĩhia mehĩtie; ti-itherũ nĩmaagararĩte kĩrĩkanĩro gĩakwa kĩrĩa ndamaathire marũmagĩrĩre; ti-itherũ nĩmoete indo iria ciamũrĩtwo cia kũninwo, na makaiya, o na makahenania, o na magaciĩkĩra indo-inĩ ciao o ene.

12Tondũ ũcio ciana cia Isiraeli itingĩhota gwĩtiiria thũ ciacio, na nĩkĩo ikũhutatĩra thũ ciacio, nĩ gũkorũo nĩigwatĩtwo nĩ kĩrumi; niĩ na niĩ ndigacoka gũikara hamwe na inyuĩ rĩngĩ o na rĩ, tiga o mũninire kĩndũ kĩu kĩamũre gĩa kũninwo, kĩehere thĩinĩ wanyu.

13Ũkĩra wamũre andũ ũmatherie, ũmere atĩrĩ, Wĩamũrei inyuene nĩ ũndũ wa mũthenya wa rũciũ; nĩ gũkorũo Jehova Ngai wa Isiraeli oigĩte ũũ: Nĩharĩ kĩndũ kĩamũre gĩa kũninwo gĩĩ thĩinĩ waku, wee Isiraeli, na ndũngĩhota gwĩtiiria thũ ciaku, tiga o hĩndĩ ĩrĩa mũkaruta kĩndũ kĩu kĩamũre gĩa kũninwo, kĩehere thĩinĩ wanyu.

14Tondũ ũcio rũciũ nĩmũkũroka gũkuhĩhĩria haha o ta ũrĩa mĩhĩrĩga yanyu ĩtariĩ; na nĩgũgatuĩka atĩrĩ, atĩ mũhĩrĩga ũrĩa Jehova agathura-rĩ, ũcio nĩguo ũgokoka hakuhĩ o ta ũrĩa mbarĩ ciaguo itariĩ; nayo mbarĩ ĩrĩa Jehova agathura, nĩyo ĩgokoka hakuhĩ o ta ũrĩa nyũmba ciayo itariĩ; nayo nyũmba ĩrĩa Jehova agathura, nĩyo ĩgokoka hakuhĩ, mũndũ o mũndũ mwanya.

15Na nĩgũgatuĩka atĩrĩ, atĩ mũndũ ũrĩa ũgakorũo na kĩndũ kĩu kĩamũre gĩa kũninwo, nĩ gũcinwo agacinwo na mwaki, we mwene, o na kĩrĩa gĩothe arĩ nakĩo; nĩ gũkorũo nĩaagararĩte kĩrĩkanĩro kĩa Jehova, o na ningĩ nĩ ũndũ nĩekĩte ũndũ wa ũrimũ thĩinĩ wa Isiraeli.

16Tondũ ũcio Joshua akĩroka gũũkĩra rũcinĩ tene, akĩreharehithie Aisiraeli makuhĩhĩrie hau, o ta ũrĩa mĩhĩrĩga yao ĩtariĩ; naguo mũhĩrĩga wa Juda ũkĩoyũo;

17agĩcoka akĩreharehithie mbarĩ cia mũhĩrĩga wa Juda imũkuhĩhĩrie, agĩkĩoya nyũmba ya Azera; agĩcoka akĩĩra nyũmba ya Azera ĩmũkuhĩhĩrie mũndũ o mũndũ ta ũrĩa mĩciĩ yao ĩtariĩ, nake Zabedi akĩoyũo;

18agĩcoka akĩreharehithie andũ ake mamũkuhĩhĩrie o mũndũ mwanya; nake Akani, mũrũ wa Karimi, ũrĩa warĩ mũrũ wa Zabedi wa Zera, wa mũhĩrĩga wa Juda, akĩoyũo.

19Nake Joshua akĩĩra Akani atĩrĩ, Mũrũ wakwa, ndagũthaitha ũkumie Jehova Ngai wa Isiraeli ũmuumbũrĩre ũhoro wothe; njĩra ũrĩa wĩkĩte, na ndũka’hithe.

20Nake Akani agĩcokeria Joshua, akĩmwĩra atĩrĩ, Ti-itherũ nĩnjĩhĩtie Jehova Ngai wa Isiraeli, na njĩkĩte ũna na ũna;

21hĩndĩ ĩrĩa ndonire kabuti karaya kega mũno ga Kĩbabuloni thĩinĩ wa indo iria twatahĩte, o na cekeri magana merĩ cia betha, o na gĩkama gĩa thahabu gĩa cekeri mĩrongo ĩtano gĩgĩthimwo-rĩ, nĩndaciĩrirĩirie ngĩcioya; na atĩrĩrĩ, cienjeirũo thĩ o hema-inĩ yakwa gatagatĩ, nayo betha ĩĩ mũhuro wacio.

22Tondũ ũcio Joshua agĩkĩrekia andũ, nao magĩteng’era hema-inĩ ĩo, na atĩrĩrĩ, magĩkora atĩ indo icio nĩ kũhithwo ihithĩtwo hema-inĩ thĩinĩ, nayo betha ĩkaigwo mũhuro wacio.

23Nao magĩciruta kũu hema-inĩ gatagatĩ, magĩcitwarĩra Joshua, o na ciana cia Isiraeli ciothe, magĩgĩciiga thĩ o hau mbere ya Jehova.

24Nake Joshua, marĩ na Aisiraeli othe, makĩnyita Akani mũrũ wa Zera, o na betha ĩo, na kabuti kau karaya, o na gĩkama kĩu gĩa thahabu, hamwe na ariũ ake, na aarĩ ake, na ng’ombe ciake, na ndigiri ciake, na mbũri ciake, o na hema yake hamwe na indo ciothe iria arĩ nacio; magĩgĩcihira o gĩtuamba gĩa Akori.

25Nake Joshua agĩkĩmũũria atĩrĩ, Nĩ kĩ gĩgũtũma ũtũnyaririthie? Hĩ, wee nawe ũmũthĩ nĩwe ũkũnyarirũo nĩ Jehova. Nao Aisiraeli othe magĩkĩmũhũra na mahiga nyuguto; ningĩ makĩmacina na mwaki, magĩcoka makĩmaikĩria mahiga.

26Magĩkĩmũũmbĩrĩra hĩba nene mũno ya mahiga, nayo ĩrĩ o ho o na ũmũthĩ; namo marakara marĩa Jehova aacinĩtwo nĩmo makĩhora. Tondũ ũcio handũ hau hagĩcoka gwĩtwo Gĩtuamba gĩa Akori o na ũmũthĩ.

← Chapter 6 Jump to: Chapter 8 →