Joshua 24

Kikuyu Bible (IBUKU RĨRĨA ITHERU RĨA NGAI)

← Chapter 23 Jump to:

1Nake Joshua agĩcokanĩrĩria mĩhĩrĩga yothe ya Isiraeli o kũu Shekemu, agĩgĩĩta athuri a Isiraeli, o na anene ao, o na aciri ao, o na anyabara ao; nao magĩgĩthiĩ makĩrũgama hau mbere ya Ngai.

2Nake Joshua agĩkĩĩra andũ acio othe atĩrĩ, Jehova, Ngai wa Isiraeli, oiga ũũ: Tene-rĩ, maithe manyu, aa Tera, ithe wa Iburahimu na Nahoru, maatũire mũrĩmo ũrĩa ũngĩ wa rũũĩ rũa Farati; nao maatungatagĩra ngai ingĩ.

3Niĩ na niĩ ngĩruta ithe wanyu Iburahimu mũrĩmo ũcio wa rũũĩ rũu rũa Farati, ngĩmũcangia bũrũri wothe wa Kanaani, na ngĩingĩhia rũciaro rũake, nĩ ũndũ wa kũmũhe Isaaka.

4Nake Isaaka ngĩkĩmũhe Jakubu, na Esau; nake Esau ngĩmũhe kĩrĩma gĩa Seiru, egwatĩre gĩtuĩke gĩake; nao Jakubu hamwe na ciana ciake magĩtherera magĩkinya Misiri.

5Ngĩcoka ngĩrekia Musa na Haruni, ngĩhũra Misiri na mĩrimũ o ta ũrĩa maũndũ mothe maatariĩ marĩa ndekire thĩinĩ wao; na thutha wa ũguo inyuĩ na inyuĩ ngĩmũruta kuo.

6Ngikĩruta maithe manyu kũu Misiri, na inyuĩ mũgĩgĩkinya iria-inĩ, nao Amisiri makĩrũmĩrĩra maithe manyu na ihenya me na ngari cia ita, o na andũ mahaicĩte mbarathi, o nginya Iria Itune.

7Na hĩndĩ ĩrĩa maakaĩire Jehova, agĩgĩĩkĩra nduma gatagatĩ-inĩ kanyu na Amisiri, agĩtũma iria rĩu rĩmakorerere, akĩmathika narĩo; namo maitho manyu makĩĩonera ũrĩa ndekire kũu Misiri; na mũgĩgĩtũũra kũu werũ-inĩ matukũ maingĩ.

8Ngĩkĩmũtwara, ngĩmũkinyia bũrũri wa Aamori, o acio maatũire mũrĩmo ũrĩa ũngĩ wa Jorodani; nao magĩkĩhũrana na inyuĩ; na niĩ ngĩmarekereria ngĩmaneana moko-inĩ manyu, na inyuĩ mũgĩkĩĩgwatĩra bũrũri wao ũgĩtuĩka wanyu na ngĩkĩmanina biũ, nĩguo mamweherere.

9Ningĩ hĩndĩ o ĩo Balaki, mũrũ wa Ziporu, mũthamaki wa Moabi, akĩarahũka akĩhũrana na Isiraeli; na akĩrekania agĩĩta Balaamu, mũrũ wa Beori, oke amũrume inyuĩ;

10no rĩrĩ ndiigana kũigua Balaamu; na tondũ ũcio agĩkĩrĩrĩria kũmũrathima. Ũguo nĩguo ndakĩmũhonokirie ngĩmũruta moko-inĩ make.

11Na inyuĩ mũgĩkĩringa Jorodani, mũgĩkinya Jeriko; nao andũ a Jeriko makĩhũrana na inyuĩ, nao nĩo Aamori, na Aperizi, na Akanaani, na Ahiti, na Agirigashi, na Ahivi, na Ajebusi; na niĩ ngĩkĩmarekereria ngĩmaneana moko-inĩ manyu.

12Ngĩkĩrekia magi me mbora mbere yanyu, magĩkĩingata athamaki acio erĩ a Aamori, makĩmweherera; ti rũhiũ rũaku rũa njora, kana ũta waku, ciekire ũndũ ũcio.

13Ngĩkĩmũhe bũrũri mũtanogeire mũkĩũrutĩra wĩra, o na matũũra mũteakĩire, na nĩkuo mũtũire; o na ningĩ-rĩ, mũtũire mũrĩaga maciaro ma mĩgũnda ya mĩthabibu, o na ya mĩtamaiyũ ĩrĩa mũtaahandire.

14Tondũ ũcio rĩu wĩtigĩrei Jehova, mũmũtungatagĩre mũtarĩ na ũhinga, mũmũiguĩte na ma o ma; na mweherie ngai iria maithe manyu maatungatagĩra mũrĩmo ũcio wa rũũĩ rũa Farati, o na Misiri, mũtigane nacio mũtungatagĩre o Jehova.

15Na rĩu mũngĩkorũo nĩmũkuona arĩ ũũru gũtungatĩra Jehova, thurai ũmũthĩ ũrĩa mũrĩtungatagĩra; mũmenye kana nĩ ngai iria maithe manyu maatungatagĩra mũrĩmo ũcio wa rũũĩ rũa Farati, kana nĩ ngai cia Aamori, arĩa mũtũũranĩtie nao bũrũri wao; no rĩrĩ, ha ũhoro wakwa niĩ mwene, na nyũmba yakwa-rĩ, tũrĩtungatagĩra Jehova.

16Nao andũ acio magĩcokia makiuga atĩrĩ, Tũroaga gũkanatigana na Jehova atĩ nĩguo tũtungatĩre ngai ingĩ;

17nĩ gũkorũo Jehova Ngai witũ nĩwe watũrutire bũrũri wa Misiri ithuene, o na maithe maitũ, tuume nyũmba ya ũkombo, na akĩringa ciama icio nene tũgĩciĩonagĩra na maitho maitũ, na agĩtũmenyerera njĩra-inĩ ĩrĩa yothe twagerire, o na agĩtũmenyerera twĩ thĩinĩ wa andũ othe arĩa twatuĩkanĩirie kwao;

18na ningĩ Jehova akĩingata andũ acio othe mehere mbere iitũ, nao nĩ Aamori arĩa maatũire bũrũri ũyũ; tondũ ũcio o na ithuĩ tũrĩtungatagĩra Jehova, nĩ ũndũ nĩwe Ngai witũ.

19Nake Joshua agĩkĩĩra andũ acio atĩrĩ, Inyuĩ mũtingĩhota gĩtungatĩra Jehova, nĩ ũndũ nĩwe Ngai ũrĩa mũtheru, na nĩ Ngai wĩ ũiru; na ndagetĩkĩra kũmuohera mahĩtia manyu, o na kana mehia manyu.

20Mũngĩgĩtigana na Jehova, mũtungatĩre ngai cia kũngĩ-rĩ, nĩakagarũrũka amwĩke ũũru, na amũnine biũ, o na harĩa aanamwĩka maũndũ mega.

21Nao andũ acio magĩkĩĩra Joshua atĩrĩ, Aca, no tũrĩtungatagĩra Jehova.

22Ningĩ Joshua agĩkĩĩra andũ acio atĩrĩ, Inyuene nĩ inyuĩ aira a ũhoro ũcio mwoiga, atĩ mwathura Jehova mũmũtungatagĩre arĩ we. Nao magĩkiuga atĩrĩ, Ĩĩ, nĩ ithuĩ aira a ũhoro ũcio.

23Nake agĩkĩmera atĩrĩ, Tondũ ũcio no kĩeheriei ngai cia kũngĩ iria irĩ thĩinĩ wanyu, mwendithie ngoro cianyu harĩ Jehova, Ngai wa Isiraeli.

24Nao andũ acio magĩkĩĩra Joshua atĩrĩ, Jehova Ngai witũ nowe tũrĩtungatagĩra, na no uuge wake tũrĩiguaga.

25Joshua agĩkĩrĩkanĩra na andũ acio mũthenya o ro ũcio, akĩmahe irĩra cia watho wa kũrũmĩrĩrũo, o na mũtugo ũrĩa ũtuĩtwo, marĩ o kũu Shekemu.

26Nake Joshua akĩandĩka ciugo icio ibuku-inĩ rĩa watho wa Ngai; agĩcoka akĩoya ihiga inene, akĩrĩhanda hau gĩtina-inĩ kĩa mũgandi ũrĩa wakuhanĩrĩirie na handũ harĩa haamũre ha Jehova.

27Nake Joshua akĩĩra andũ acio othe ũũ: Atĩrĩrĩ, ihiga rĩrĩ nĩrĩo rĩgũtuĩka mũira witũ wa ũrĩa twoiga; nĩ gũkorũo nĩrĩaigua ciugo ciothe cia Jehova iria atwĩrĩte; na tondũ ũcio nĩrĩo rĩgũtuĩka mũira wanyu, nĩ getha mũtikanakaane Ngai wanyu.

28Nake Joshua agĩkĩĩra andũ methiĩre, o mũndũ ainũke kwao kũrĩa aagwatire gũgĩtuĩka igai rĩake.

29Na gũgĩkinya atĩrĩ, atĩ thutha wa maũndũ macio, Joshua wa Nuni, ndungata ya Jehova, agĩkua aninĩte mĩaka igana na ikũmi.

30Nao makĩmũthika gĩthaka-inĩ gĩake o kũu Timinathu-sera, bũrũri ũrĩa wĩ irĩma nyingĩ wa Efiraimu, mwena wa gathigathini wa kĩrĩma kĩa Gaashu.

31Nao Aisiraeli magĩtungatĩra Jehova matukũ mothe marĩa Joshua aarĩ muoyo, o na matukũ mothe ma athuri arĩa maatigirũo magĩtũũranga muoyo Joshua aarĩkia gũkua, o arĩa maamenyete wĩra wothe ũrĩa Jehova aarutĩte nĩ ũndũ wa Isiraeli.

32Na rĩri, mahĩndĩ ma Jusufu, marĩa ciana cia Isiraeli ciaambatĩtie ikamaruta Misiri, ikĩmathika o kũu Shekemu, gacigo-inĩ ga gĩthaka karĩa Jakubu aagũrĩte harĩ ariũ a Hamoru, ithe wa Shekemu, na mbia igana; nako gagĩtuĩka ga ciana cia Jusufu.

33O nake Eleazaru wa Haruni agĩkua, nao makĩmũthika kĩrĩma-inĩ kĩa Finehasi mũrũwe, o kĩrĩa aaheetwo kũu bũrũri ũcio wĩ irĩma nyingĩ wa Efiraimu.

← Chapter 23 Jump to: