Matthew 11

Kalenjin Bible (BUKUIT NE TILIL)

← Chapter 10 Jump to: Chapter 12 →

1Ak ye kingo kagong’at Jesu alamalyennyi taman ak aeng’ koges, kwo eng’ oloto konetisiot ak koamdoi eng’ nganasokwak.

2Ak kingogas Johana eng’ korgoret boisiosiek che bo Kristo, koyoktae alamalyennyi aeng’ ng’olyo,

3ak koteebe inendet kole, Tos i inendet ne nyonei, anan kiganye age?

4Ak kiwolji Jesu kolenji, Oba bandang’wong’, ak omwachi Johana tuguk che ogase ak che ogeere:

5keertoi che koriotin, ak kobendoti che solomonik, kitilili che amei mogondosik, ak kastoi che ming’otin, ak king’eeti che kigobek, ak keamjin kibananok logoiywek che miach.

6Ak baibai age tugul ne manyorunena kanagut eng’ ui tugul.

7Ak ye kita kobendi chu bandanywa, kotoi Jesu komwachi tuiyosiek agobo Johana kolenji, Kiomande surkwen ogeer nee? Tegat ne itumdumi usonet?

8Kiomande ogeer nee? Chito ne ilaachi ngoroik che tangusen? Ogeero, ichek che ilaachi ngoroik che tangusen komi gorikab laitorinik.

9Ago kilya si omande? Si kobiit ogeer maotiot? Ee, amwawok ale, siirei inendet maotiot.

10Nito ko inendet, ne kigisir kele, Keero, ayoktoi kiboitiondennyu kondoenen, Ne chobei oreng’ung’ eng’ taing’ung’.

11Amwawok, iman, ale, Tom kobiit ne siirei Johana Kabatisanindet eng’ che kisich kobogorisiek: ago inendet ne ming’in mising’ eng’ bounatetab kipsengwet ko o kosiir inendet.

12Ak koboch betusiek che bo Johana Kabatisanindet agoi nguno koruachin bik bounatetab kipsengwet, ak namei bik che koromen eng’ kimnatet.

13Amu kimaotenso maotik tugul ak Ng’atutik agoi koit betusiekab Johana.

14Ak ngochame otaach ko u noto, ko Elija nito, ne nyonei.

15Inendet ne tinyei itik che kastoe, kogas.

16Ago aroge nee ibini? Kergei ak lagok che tebyei eng’ oldinwekab aldaisiet, che kuurei siritoikwak,

17ak kole, Kigeguutwak ndurerusiek, ak kima oureren; kigiteeye ak kima oririe.

18Amu kinyo Johana ak kima amis anan koeeiso, ak kole bik, Tinyei oindet.

19Kinyo Weritab chi koamis ak koeeiso, ak kole bik, Ogeero, chito ne kipkeiya, ak eeindetab divaik, choruetab taagikab aisurut ak kiptengeginik. Ak naat ng’omnatet kele bo iman eng’ boisionikyik.

20Kitoi anyun koger kong’ nganasok che kigiyae boisionikyik che bo kamuktaet, che chang’ kosiir, amu kima sik.

21Bwa we, Korasin! Bwa we, Betsaida! Amu nda kiga kiyai eng’ Turo ak Sidon boisionik che bo kamuktaet che kigiyai eng’ okwek, ta kiga kosik keny, kolaach kuniok ak koiilegei orek.

22Ago amwawok ale, kaigaitu tun Turo ak Sidon eng’ betutab kiruoget, kosiirok.

23Ak inye, Kapernaum, ko tos kitororin agoi kipsengwet? Ichortoige agoi oldab che kigobek: amu nda kiga kiyai eng’ Sodom boisionik che bo kamuktaet che kigiyai eng’ inye, ko ta mi agoi rani.

24Ago amwawok ale, tun kaigaitu emetab Sodom eng’ betutab kiruoget, kosiirin.

25Eng’ betusiechoto kowol Jesu kole, Amwaun kongoi, we Baba, Kiptaiyatab kipsengwet ak ng’ony, amu kiiung’e tuguchu che ng’omen ak che iguitos, ak kiing’ang’ji manyurunik:

26ee, Baba, amu kiicham inye ko u noto.

27Kigogona tuguk tugul Baba: ama mi ne ingen Werit, kobate Kwanda; ama mi ne ingen Kwanda kobate Werit, ak chi age tugul ne chamei Werit kong’ang’jin.

28Obwanja, okwek tugul che oiimige, ak che olae tuguk che nyigisen, si amuung’wok.

29Otiiny kaat choginnyu ak onetenage; amu a tala ak aming’inige eng’ muguleldo: si osich kamuung’et eng’ sobonwekwok.

30Amu nyamnyum choginnyu, ak wisis milennyu.

← Chapter 10 Jump to: Chapter 12 →