Matthew 9

Kalenjin Bible (BUKUIT NE TILIL)

← Chapter 8 Jump to: Chapter 10 →

1Kilany anyun moingetab beek, ak kolanda, koit nganasennyi.

2Ak ogeero, kigimutyi inendet chito ne miani, ne meat borto, korue itogut: ak ye kigeer Jesu kayanenywa, kolenji ne meat borto, Weri, nyiganitu; kagenyoun kaat tengekwogiguk.

3Ak ogeero, kimwa alak che bo sirik eng’ mugulelwekwak kole, Mwaei chichi ng’alek che yaachen agobo Jehovah.

4Kole Jesu, Kalya si obwat yaitiet eng’ mugulelwekwok? Amu kiingen kabwatutikwak.

5Amu, nee ne nyamnyum, ngemwa kele, Kagenyoun kaat tengekwogiguk; anan ngemwa kele, Ng’eet, ak iwendote?

6Ago si onai ole tinyei kimnatet Weritab chi eng’ ng’ony konyochi kaat bik tengekwogik (kolenji anyun ne meat borto), Ng’eet, ib itogung’ung’ ak iwe gong’ung’.

7King’eet anyun, ak kwo gonnyi.

8Ago ye kingogeer tuiyosiek, koiywei, ak kolos Jehovah, ne igochin chi kimnatet ne u noto.

9Ak kingosiirto Jesu eng’ oloto, kogeer chito, ne kiguure Matayo, kotebe ole kitaage aisurut: ak kilenji, Isubwa. Kong’eet anyun, ak kosub.

10Ye kiamisiei Jesu eng’ go, ogeero, kobwa taagik che chang’ che bo aisurut ak kiptengeginik, ak kotebi koboto Jesu ak alamalyennyi.

11Ak ye kingogeer Parisaik, kolenji alamalyennyi, Amu nee si koamisiei Konetindeng’wong’ ak taagik che bo aisurut ak kiptengeginik?

12Ago kingogas, kolenji, Mamachei che chamegei chepkerichot, ago che miandos.

13Ago oba okwek, si onetge ole teptoi ng’olyondoni, Amache rirenetab ge, mamache tiseiywo: amu kima anyo aguur che bo imanda, ago kiptengeginik.

14Kibwanji anyun alamalyetab Johana ak kolenji, Amu nee si kirugutige achek ak Parisaik konyil che chang’, ago mairugutegei alamalyeng’ung’?

15Ak kilenji Jesu, Imuchi ichek che kogiguurji katunisiet koarogenso, kota komi ak sandet? Ago bwanei betusiek, che tun kiistoe sandet ichek, ak korugutgei anyun.

16Ak maindoi chi akwot ne leel ngoriet ne os; amu kereri akwot ne leel ngoriet ne os, ak koyait kosiir ole kagerer.

17Amaindoi bik divaik che leelach lolotinwek che osen: amu kereri lolotinwek, ak kotumdagei divaik, ak kobek lolotinwek: ago kindoi divaik lolotinwek che leelach, ak kotebi tuwai.

18Kingota komwachin ichek ng’alechu, ogeero, kinyo bounindo, ak kong’urukyi inendet, ak kole, Kagome cheptanyu ngunito: ago nyo igonoor inendet eung’ung’, si kosob.

19Ak king’eet Jesu, kosub inendet, ak kiisub alamalyennyi agichek.

20Ogeero, kobogoriot, ne kimandae korotik eng’ kenyisiek taman ak aeng’, kiisubu Jesu eng’ let, ak kotwa tabandab ngoriennyi:

21amu kimwa eng’ muguleldanyi, kole, Ngot atwa kityo ngoriennyi, asobe.

22Ago kiwelelgei Jesu kogeer inendet, ak kole, Chebi, nyiganitu; kagosoobin kayaneng’ung’. Ak kisob kobogoriot koboch sainato.

23Ak kingoit Jesu gotab bounindet, ak kogeer bik che kuutei ndurerusiek, ak bik che sololendos,

24kolenji, Oistege: amu ma me chepto, ago inuuchi. Ak kirorechi inendet kochot.

25Ago kingo kageon tuiyet koba sang’, kwo go, ak konam eutab cheboto; ak kong’eet inendet.

26Ak kiyesto ng’olyondonoto eng’ emonoto komugul.

27Ak kingosiirto Jesu kwo eng’ oloto, kosub inendet kipkoratinik aeng’, kowaagoti kolen, Rireneige, ee weritab Daudi.

28Ak kingo kakwa go, kobwanji inendet kipkoratinichoto: ak kolenji Jesu, Oyani ole amuchi ayai nito? Kolenji, Wei, Kiptaiyandani.

29Kotwa anyun konyekwak, ak kole, Ingoyaak eng’ okwek ko u kayaneng’wong’.

30Ak kiyatogis konyekwak. Ak king’at Jesu mising’, kolenji, Orib amongonai chi.

31Ago kiba, ak koiyestaat ng’olyot agobo inendet eng’ emonoto komugul.

32Ak ye kita kobendi, ogeero, kigimutyi inendet chi ne namat kut ne kitinyei oindet.

33Ak kingo kageon oindet, kotwek ne namat kut: ak kikwong’io tuiyosiek, kole, Kitom kegeerei ne u ni eng’ Israel.

34Ago kimwa Parisaik, kole, Onei oik eng’ ne o ne bo oik.

35Ak kiwendote Jesu nganasok tugul, che eechen ak che mengechen, konetisioti eng’ sunagogisiekwak, ak koamdaati logoiywek che miach che bo bounatet, ak kosobooti che miandos eng’ koroito age tugul, ak eng’ nyalulnatet age tugul.

36Ago ye kingogeer tuiyosiek, koriregei ichek, amu ki nyerotin ak koiyestootin, ko u kechirek che matinyei mestowot.

37Kilenji anyun alamalyennyi, O kesisiet iman, ago ng’ering’ kiboitinik.

38Noto anyun osa Kiptaiyat ne bo kesisiet, si kobiit koyokyi kiboitinik kesisiennyi.

← Chapter 8 Jump to: Chapter 10 →