Matthew 6

Kalenjin Bible (BUKUIT NE TILIL)

← Chapter 5 Jump to: Chapter 7 →

1Oripge si moyai imandang’wong’ eng’ taitab bik, si kogeerok ichek; ngoyai ko u noto ko monyoru melekto eng’ Kwandang’wong’ ne mi kipsengwet.

2Noto anyun, ye igoite kagochinoiguk che bo rirenetab ge, ko mat iguut igondit eng’ taing’ung’, ko u ye yaei chombilik eng’ sunagogisiek ak ortinwek, si kobiit konyor kalosunet eng’ bik. Amwawok, iman, ale, Kagonyor ichek melektanywa.

3Ago ye igoite kagochinoik, ko mat konai eung’ung’ ne bo katam ne yaei eung’ung’ ne bo tai;

4si kobiit kobunji ung’ot kagochinoiguk; ak kogonin melekto Kwandang’ung’ ne keerei eng’ ung’ot.

5Ak ye osae, ko moige chombilik; amu chamei ichek kosaei kotonondos eng’ sunagogisiek ak besiebor si kobiit kogeer bik ichek. Amwawok, iman, ale, Kagonyor ichek melektanywa.

6Ago inye, ye imache isa, iwe gong’ung’ orit, ak ye kaiger kurgeng’ung’, isa Kwandang’ung’ ne mi eng’ ung’ot, ak kogonin melekto Kwandang’ung’ ne keerei eng’ ung’ot.

7Ak ye osae, ko mat kotes ng’alekab buch, ko u ye yaei Bororiosiek; amu len kigasyin ichek amu chang’indab ng’alekwak.

8Noto anyun amoige ichek; amu ingen Kwandang’wong’ tuguk che obononi, kotom osom.

9Noto anyun osa ko u ni: Kwandanyo ne mi kipsengwet, Ingotililit kaineng’ung’.

10Ingonyo bounateng’ung’. Ingoyaak eng’ ng’ony mageng’ung’, ko u ye kiyaei eng’ kipsengwet.

11Konech rani amitwogikyok che bo ra.

12Ak inyoiywech kaat lelutikyok, ko u ye kinyochini kaat che lelwech.

13Amemutech ole mi yomset, ago soruech eng’ ne ya. [Amu neng’ung’ bounatet, ak kamuktaet, ak torornatet, agoi koigeny. Amen.]

14Amu ngonyochini kaat bik kachiliilutikwak, konyoiywok kaat agine Kwandang’wong’ ne bo kipsengwet.

15Ago ngo monyochini kaat bik kachiliilutikwak, ko manyoiywok kaat agine Kwandang’wong’ kachiliilutikwok.

16Kogeny ye orugutge, ko moige chombilik, eng’ togochik che bo arogenet; amu walei togochikwak, si kogeer bik kole, koirugutgei. Amwawok, iman, ale, Kagonyor ichek melektanywa.

17Ago ye irugutge inye, iil meting’ung’ ak iun togeng’ung’:

18si mageer bik kole irugutige, ago keerei Kwandang’ung’ ne mi eng’ ung’ot; ak kogonin melekto Kwandang’ung’ ne keerei eng’ ung’ot.

19Amogonorjige konoraik eng’ ng’ony, ole amei kiptorotinik ak karuotitoet, ak ole butei chorik ak kochor;

20ago ogonorjige konoraik eng’ kipsengwet, ole maamei kiptorotinik anan karuotitoet, ak ole mabutei chorik ak kochor;

21amu ole mi konorueng’ung’, komitei oloto muguleldang’ung’ agine.

22Taitab borto konda; noto anyun, ngo mie kondang’ung’, ko nyiitat bortang’ung’ komugul lapkeiyet.

23Ago ngo ya kondang’ung’, ko nyiitat bortang’ung’ komugul mesundeito. Noto anyun, ngot koek mesundeito lapkeiyet ne mi oring’ung’, ko o mesundeoto ne tia anyun!

24Mami chi ne imuchi koot kiptainik aeng’; amu wechei age, ak kocham age: anan konamgei ak age, ak kosas age. Momuchi oot Jehovah ak magornatosiek.

25Amwawok anyun ale, Mogerer met agobo sobeng’wong’ eng’ che oame, anan che oee: anan agobo borwekwok, che olaachi. Tos masiirei sobondo amitwogik, ak masiirei borto ngoroik?

26Ogeer taritik che bo barak: magolsei, ama kesisiei, ama iyumjin choge: ak kobaei ichek Kwandang’wong’ ne bo kipsengwet. Tos ma o koigoi okwek mising’ osiir ichek?

27Ak imuchi ng’o ne kereri met eng’ okwek kotesyi koindanyi kakwautiet agenge ne bo eut?

28Ak amu nee anyun si ogerer met agobo ngoroik? Obwat taptok che bo kewet, ole bititoi; maboisiei, anan koletis:

29ago amwawok ale, agot Solomon eng’ talbistanyi tugul ko kima kolumegei ko u age eng’ chu.

30Ago ngolaakyin Jehovah ko u noto suswek che bo kewet, che mi rani, ak mutai kewirji ma, ko tos, mayaiywok ko u noto kosiir, okwek che otinye kayanet ne ming’in?

31Noto anyun amogerer met, ole, Kiame nee? Anan, Kiee nee? Anan, Kilaachi nee?

32Amu cheng’ei tuguchu tugul Bororiosiek; amu ingen Kwandang’wong’ ne bo kipsengwet kole, obononi tuguchu tugul.

33Ago ocheng’ korok bounatennyi, ak imandanyi; si keteswok tuguchu tugul.

34Noto anyun amogerer met agobo mutai: amu kerere met mutaut agobo ge. Yamei betut yaitiennyi.

← Chapter 5 Jump to: Chapter 7 →