Matthew 17

Kalenjin Bible (BUKUIT NE TILIL)

← Chapter 16 Jump to: Chapter 18 →

1Ak kingobata betusiek lo komut Jesu Petero, ak Jakobo, ak Johana ng’etab kam, kolany tulwet ne koi koba uwak ichegei:

2ak kiwalak eng’ tainywa: ak kiiluu togennyi ko u asista, ak kileelagitu ngoroikyik ko u lapkeiyet.

3Ak ogeero, kitook eng’ tainywa Musa ak Elija kong’alaljindos koboto inendet.

4Ak kiwolji Petero Jesu, kolenji, Kiptaiyandani, mie eng’ achek amu kimi yu: ngichame, amuchi ateech eng’ oli keriosiek somok, neng’ung’ age, bo Musa age ak bo Elija age.

5Kingota kong’alali, ogeero, kouur ichek boldet ne iluu: ak ogeero, kimong’une kutit boldet, kole, Ni ko Werinnyu, chamanennyu, abaibai mising’ eng’ inendet; ogas okwek inendet.

6Ak ye kingogas alamalyet, kobutyo kot koit togochikwak ng’ony, koiyweis mising’.

7Ak kinyo Jesu ak kotwa ichek kolenji, Ong’eetye, amoiyweisie.

8Ak kingoyot met, ko ma keer chi, kobate Jesu inegei.

9Ak kingota kochorugei eng’ tulwet, kong’at Jesu ichek, kolenji, Amomwachi chi kaborunonito, agoi tun kong’eet Weritab chi eng’ che kibek.

10Ak kiteebe alamaluyennyi inendet, kole, Amu nee anyun si komwaei sirik kole, Nyonei Elija korok kondou?

11Ak kiwol Jesu kole, Iman indou Elija, ak koweech tuguk tugul:

12ago amwawok ale, kigonyo Elija, ak kima nai ichek inendet, ago kiyachi inendet kiy age tugul ne kimach. Agot ko u noto tun nyalili Weritab chi agine eng’ ichek.

13Konai anyun alamalyet kole king’alaljin ichek agobo Johana Kabatisanindet.

14Ak ye kingo kagobwa ole mi tuiyet, konyonji inendet chito, ak kogutung’ji, ak kole,

15Kiptaiyandani, rirege werinnyu: amu amei iywek, ak nyalili mising’: amu ibutyin ma konyil che chang’, ak kobutyin beek konyil che chang’.

16Ak koamutyi alamalyeng’ung’, ak ma imuch kosoob inendet.

17Ak kiwol Jesu kole, Ee ibinda ne matinyei kayanet ak komaasat, atebye ak okwek kot kotianit? Amuitoi kot kotianit agobo okwek? Imutwa inendet.

18Ak kiger kong’ Jesu oindet; ak komanda oindet eng’ inendet: ak kosob weroto koboch sainato.

19Kibwanji anyun alamalyet Jesu eng’ taban, ak kole, Kalya si ma kimuch achek keon komanda?

20Ak kilenji, Amu kayaneng’wong’ ne ming’in: amu amwawok iman ale, Ndotinye kayanet ne te keswotab karadali, ta ngomwachi tulwoni olenji, Inakte ui olin; konaktoi; ta mami kiy ne maimugaksei eng’ okwek.

21Ago mamandoi ne u ni kobate eng’ saet ak karugutetab ge.

22Ak ye kingota kobeniei ichek eng’ Galili, kolenji Jesu ichek, Kindoi Weritab chi eunekab bik;

23ak kobar ichek inendet, ak king’eet kogeny eng’ betutab somok. Kiarogenso anyun mising’.

24Ak ye kingo kagoit Kapernaum kobwanji Petero ichek che kitaachei kebebertab sekel, ak kole, Magonu konetindeng’wong’ kebebertab sekel?

25Ak kole, Ee. Ak ye kingowo go, kosib kong’alalji Jesu inendet kolenji, Ibwati nee, inye, Simon? Laitorinik che bo ng’ony, konyorune ng’o aisurut anan kodi? Eng’ werikwak anan eng’ toek?

26Ak ye kingomwa kole, Eng’ toek, kolenji Jesu inendet, Noto anyun itiogotin werik.

27Ago, si ma kinach ichek, iwe araraita, ak iwirji katet, ak njiriot ne kamong’ eng’ tai, inam; ak ye kaiyat kutinnyi, inyoru sekel: nam noto, ak igoite agobo ane ak inye.

← Chapter 16 Jump to: Chapter 18 →