Matthew 19

Kalenjin Bible (BUKUIT NE TILIL)

← Chapter 18 Jump to: Chapter 20 →

1Ak ye kingo kagoges Jesu ng’alechu, kwo eng’ Galili agoi koit tabanwekab Judea, Jordan komosin;

2ak kiisub inendet tuiyosiek che eechen; ak kiisoob ichek eng’ oloto.

3Ak kibwanji inendet Parisaik, ak kotiem, kole, Tos chamdaat eng’ ng’atutik koon chi osotiondennyi agobo kiy age tugul?

4Ak kiwol kole, Tom osoman, ole, inendet ne kiyai ichek eng’ taunet ko kiyai muren ak tie,

5ak kile, Agobo nito anyun bagaktoi mureno kwanda ak kamet, ak konamgei ak osotiondennyi; ak koek tuwai borto agenge?

6Si ma ko aeng’ ago borto agenge. Noto anyun, che kigotuiyo Jehovah, komat kobesio chi.

7Kilenji anyun bichoto inendet, Kilya anyun si kong’at Musa kole, Kigochin siret ne bo besiet ak koon kwo?

8Kimwachi ichek kolenji, Kichamwok Musa oon osotikwok, amu uuindab mugulelwekwok: ago kima ko u noto koboch taunet.

9Ak amwawok ale, Chi age tugul ne onei osotiondennyi, ama eng’ ng’olyotab sokset, ak kotun age, ko kabaigei: ak inendet ne ituni ne kigeon ko kabaigei.

10Kolenji alamalyennyi inendet, Ngot ko u noto ateptab muren ak osotiondennyi, ko manyolu kitunis.

11Ago kilenji ichek, Temene bik tugul kotaach mwaoni, kobate ichek che kigochin.

12Amu mitei sirorinik che kigisich ko u noto koboch mootinwekab kametwagikwak: ak mitei bik che kigimoch: ak mitei bik che kiimoigei agobo bounatetab kipsengwet. Inendet ne imuchi kotaach ni, kotaach.

13Kigimutyi anyun lagok che mengech, si kobiit kogonoor eunekyik ichek ak kosa: ak kiger kong’ alamalyet ichek.

14Ago kile Jesu, Ochamji lagok che mengech, kobwanja, amoete: amu bo che u chuto bounatetab kipsengwet.

15Ak kiigonoor eunekyik ichek, ak kwo eng’ oloto.

16Ak ogeero, kinyonji chi ak kole, Konetindoni, nee kiy ne mie ne kanyol ayai si anyor sobondab koigeny?

17Ak kolenji, Kalya si iteebena agobo noto mie? Mi agenge ne mie: ago ngimache imong’ji sobondo, inam ng’atutik.

18Kilenji inendet, Che u nee? Ak kile Jesu, Merumisie, Moipge, Mechorse, Mebaorianji lembech.

19Teech kwandang’ung’ ak komet: ak, Cham chitab kokwet ko u ye ichamdoige.

20Kolenji murenonoto, Kiarib tuguchu tugul: ta ko ng’etunot nee eng’ ane?

21Kolenji Jesu inendet, Ngimache iegu ne igesunotgei, iwe, ialde che itinye, ak igochi kibananok, si inyoru magornatet eng’ kipsengwet: ak inyo, isubwa.

22Ago ye kingogas murenonoto mwaonato, kwo eng’ arogenet: amu kitinyei tuguk che chang’.

23Ak kilenji Jesu alamalyennyi, Amwawok, iman, ale, Uui eng’ magoriot komong’ji bounatetab kipsengwet.

24Ak kogeny amwawok ale, Nyamnyum eng’ tambesiet kochut kondab katet, kosiir komong’ji magoriot bounatetab Jehovah.

25Ak ye kingogas alamalyet ng’olyondonoto, kokwong’io mising’, kole, Ng’o anyun ne imuchi konyor sorunet?

26Ak kogeer Jesu ichek ak kolenji, Maimugaksei ni eng’ bik; ago imugaksei tuguk tugul eng’ Jehovah.

27Kiwolji Petero anyun kolenji, Keero, kigebagakte tuguk tugul, ak kigisubun; kinyoru nee anyun achek?

28Ak kilenji Jesu ichek, Amwawok, iman, ale, Okwek che koosubwa, eng’ yaet ne leel ye tun tebe Weritab chi ng’echeretab torornatennyi, otebe ak okwek ng’echerok taman ak aeng’ che bo laitornatet, oruokyini ortinwek taman ak aeng’ che bo Israel.

29Ak age tugul ne kigobagakta gorik, anan ng’etab kametwagik, anan chepkametwagik, anan kwanda, anan kamet, anan lagok, anan mbarenik, agobo kainennyu, kotaachei konyil bogol, ak kobor eng’ sobondab koigeny.

30Ago tun egu che chang’ che bo tai che bo let; ak koegu che bo let che bo tai.

← Chapter 18 Jump to: Chapter 20 →