Matthew 24

Kalenjin Bible (BUKUIT NE TILIL)

← Chapter 23 Jump to: Chapter 25 →

1Ak kimanda Jesu eng’ hekalut, kwo bandanyi, ak kibwanji alamalyennyi ak koborji inendet teeksosiekab hekalut.

2Ago kiwolji kole, Mogeere tuguchu tugul? Amwawok, iman, ale, Mang’etune koita agenge baragutab age, ne ma kiwirjin ng’ony.

3Ak ye kitebye ng’ony eng’ tulwetab Emitik, kobwanji inendet alamalyet komi inegei, ak kole, Mwawech, egu au tuguchu? Ak tun u nee kaborunetab nyonuneng’ung’, ak kagesunetab ng’ony?

4Ak kiwolji Jesu kolenji, Oripge si maibeetok chi.

5Amu bwanei che chang’ eng’ kainennyu kolen, A Kristo; ak kobeet che chang’.

6Tun ogase agobo lugosiek ak ng’alek agobo baretab ge: oripge si moarogense: amu bwanei tuguchu matiny; ago kotom koit kagesunet.

7Amu setyin bororiet age bororiet age, ak setyin bounatet age bounatet age: ak kobiit rubosiek ak botanetab ng’ony eng’ oldinwek che terotin.

8Ago tuguchu tugul ko taunetab ng’woninwek.

9Ak kondeak anyun ole mi nyalilda, ak kobarak; ak kowechok bororiosiek tugul agobo kainennyu.

10Ak kinach che chang’ anyun, ak kong’wektagei, ak kosurio ichegei eng’ ichegei.

11Ak tun ng’eetos maotik che chang’ che bo lembech, ak kobeet che chang’.

12Ak amu tesoksei yaitiet, kogaitititu chamnyetab che chang’.

13Ago inendet ne muitoi agoi kagesunet, kesoru.

14Ak keamdaati logoiywechu miach bo bounatet eng’ ng’ony komugul koek baornatet eng’ bororiosiek tugul; ak koit anyun kagesunet.

15Ye ogeer anyun kit ne kiwechei ne bo ng’emisiet, ne kimwa maotiot Daniel, kotonone ole tilil (ingoguiyo inendet ne somani),

16ingomwechi tulonok anyun ichek che mi Judea:

17ama chorugei inendet ne mi got barak si konem tuguk che mi gonnyi:

18ama weekyingei let ne mi mbar si koib ngoriennyi.

19Ago bwa eng’ ichek che chio ak che reritos eng’ betusiechoto!

20Osa anyun si mabiit mweeng’wong’ eng’ betusiekab kaititindo, anan eng’ betutab sabato:

21amu egu anyun nyalilda ne o, ne kitom kobiitu koboch taunetab ng’ony agoi nguno, ama koegu kogeny.

22Ak nda ma kiga ketil konwagitu betusiechoto, ta magisoru chi: ago kitilei betusiechoto agobo che lewenotin.

23Ngo mwawok chi age tugul eng’ betunoto kole, Ogeero, mi oli Kristo, anan olo; ko mat oyan.

24Amu ng’eetos Kristoisiek che bo lembech, ak maotik che bo lembech, ak kobortoi kaborunoik ak kwong’utik che eechen; si kobeet, agot che lewenotin, nda imugaksei.

25Ogeero, kaasib amwawok.

26Noto anyun ngo mwawok kole, Ogeero, mitei inendet surkwen; ko mat obe: Ogeero, mitei inendet got ne bo orit; ko mat oyan.

27Amu u ye mong’u kalyelet eng’ kong’asis, ak kegeerot agoi cherongo; egu ko u noto nyonunetab Weritab chi.

28Oldo age tugul ole mi musto, koyumjingei oloto motong’wek.

29Ak ne ma tianit, ko kagogesgei nyalilda ne bo betusiechoto, koimenit asista, ama koluu arawet, ak kororok kecheik eng’ kipsengwet, ak kitumdum kimnatosiek che bo kipsengwet;

30ak kotook anyun eng’ kipsengwet kaborunetab Weritab chi: ak koteiyo anyun bororiosiek tugul che bo ng’ony, ak kogeer konyonei Weritab chi eng’ baragutab bolik che bo kipsengwet ak kimnatet ak lilindo ne o.

31Ak koyokto malaikaisiekyik ak cheet ne o ne bo iriaget, ak koyum lewenikyik kobunu usonaik ang’wan, koboch tabandab kipsengwet agoi tabanda age.

32Onetge anyun kalewenetab mogoiywet: ye kang’arng’aritu temenikyik, ak kong’atyo sogek, onai ole negit kesisiet;

33o u noto ak okwek ye ogeer tuguchu tugul, onai ole kagorik inendet, mi kurgotik.

34Amwawok, iman, ale, Masiirtoi ibini, ama isulda tuguchuto tugul.

35Siirtoi kipsengwet ak ng’ony, ago masiirtoi ng’alekyuk.

36Ago manaei chi age tugul agobo betunoto ak sainato, manaei agot malaikaisiek che bo kipsengwet, anan Werit, ago Kwanda inegei.

37Ko u ole kiteptoi betusiechu ki bo Noa, egu ko u noto nyonunetab Weritab chi.

38Amu u eng’ betusiechoto ye kitom kobiit maranet kiamisiei ak kieeisei, kiitunisiei ak kiigoitoi kitun, agoi betut ne kiwa Noa melit orit,

39ak kima nai ichek agoi koit maranet, ak koges ichek tugul; egu ko u noto nyonunetab Weritab chi.

40Tun boisiei murenik aeng’u eng’ mbar; kimuti age, kebagakta age:

41ng’aisei kobogorisiek aeng’u eng’ koita agenge; kimuti age, kebagakta age.

42Oripse anyun: amu mongen betut ne nyonei Kiptaiyandeng’wong’.

43Ago onai ni, ole, nda kiga nai chitab kobo got kole, sait ngoro ne nyonei chorindet, ta kiripsei, ak ta kima kochamdoi kebut gonnyi.

44Noto anyun ochoboge ak okwek: amu nyonei Weritab chi eng’ sait ne mobwati ole nyonei.

45Ng’o anyun otwogindet ne kiyani ak ko ng’om, ne kiinde kiptaiyandennyi kotononji gonnyi, ak kogochi bik amitwogikwak eng’ betut ne yamei?

46Baibai otwogindonoto, ye weeigei kiptaiyandennyi konyor koyaei ko u noto.

47Amwawok, iman, ale, Indoi inendet koboi tuguk tugul che tinyei.

48Ago ngo mwa otwogindet ne ya eng’ muguleldanyi, kole, Ta kogaegei kiptaiyandennyu:

49ak kotoi kobir che otwogik koboto inendet, ak koamisiei ak koeeisei koboto che bogitos;

50nyonei anyun kiptaiyatab otwogindonoto eng’ betut ne len inendet manyonei, ak eng’ sait ne manaei,

51ak kobir mising’ ak kogochi kebebertanyi koboto chombilik: egu eng’ oloto rirek ak nyeetab kelek.

← Chapter 23 Jump to: Chapter 25 →

Recommended Reading

Commentary Matthew Commentaries → Devotional Matthew Devotional Guide → Get This Bible Kalenjin Bible (BUKUIT NE TILIL) Study Bible →