Matthew 20

Kalenjin Bible (BUKUIT NE TILIL)

← Chapter 19 Jump to: Chapter 21 →

1Amu kergei bounatetab kipsengwet ak chitab kobo got, ne kimusta karon koguur meek kobwa mbarennyi ne bo sabibuk.

2Ak ye kingo kagochamnyechi ak meechoto kogochi denarit agenge eng’ betut agenge, koyokto koba mbarennyi.

3Ak kimanda ko negit sait somok, ak kogeer alak kotonondos eng’ oldab aldaisiet ama tinyei boisiet;

4ak kilenji, Oba ak okwek mbaretab sabibuk si agonok ne nyolu. Ak kiba anyun.

5Kimanda kogeny ko negit sait lo ak eng’ sait sogol, ak kiyai ko u noto.

6Ak kimanda kogeny olo bo sait taman ak agenge, ak konyor alak kotonondos; ak kilenji ichek, Kalya si otonone oli betut komugul amotinye boisio?

7Kolenji anyun bichoto inendet, Amu ma kuurech chi. Kolenji, Oba ak okwek mbaretab sabibuk.

8Ak ye kingoek koskoleny, komwachi chitab kobo mbaretab sabibuk kiboitiondennyi ne o kolenji, Kuur meek, si igochi melekwekwak, itaune ne bo let agoi ne bo tai.

9Ak ye kingobwa ichek che kiga kiguur ko negit sait taman ak agenge, konyor chi tugul denarit agenge.

10Ak ye kingobwa che bo tai, kolen nyoru che siirei; ak kinyor agichek denarit agenge chi tugul.

11Ak ye kingotaach, kong’unyng’ung’ji chitab kobo got,

12kole, Kabois chu bo let sait agenge kityo, ak kairogenech bichoto achek che kagibirtege betut komugul eng’ asista ne ng’wan.

13Ago kiwolji kolenji age eng’ ichek, Choruani, ma ayaun kiy ne ya: kama kichamnyechi tuwai denarit agenge?

14Nam neng’ung’, ak iwe oreng’ung’; magennyu agochi chichito bo let ko u ye kagonin inye.

15Tos manyoljina ayai ne amache eng’ tugukyuk? Anan ya kondang’ung’, amu a mie?

16Egu anyun che bo let che bo tai, ak egu che bo tai che bo let.

17Ak ye kitogostoi Jesu kowendi Jerusalem, komut alamalyet taman ak aeng’ koba taban ichegei, ak kolenji ichek eng’ oret,

18Ogeero, kitogosyini Jerusalem; si kinde Weritab chi eunekab tisiik che eechen ak sirik; ak kiruokyi kome,

19ak kogoito kochurachur Bororiosiek, ak kobire kipcharitit, ak kogartat eng’ kimurtoiyot: ak king’eet inendet eng’ betutab somok.

20Kinyonji anyun inendet kametab werikab Sebedi koboto werikyik, ak kogutung’ji, ak kosom inendet kiy.

21Ak kilenji, Imache nee? Kolenji, Ng’at ile kotebe werichuchuk aeng’u, age eung’ung’ ne bo tai, ak age eung’ung’ ne bo katam, eng’ bounateng’ung’.

22Ago kiwol Jesu kole, Mongen ne osome. Omuchi okwek oee kikombet ne negit aee? Kolenji inendet, Kimuchi.

23Kolenji ichek, Oee iman kikombennyu: ago ma nenyu agochi kotebe eunnyu ne bo tai, ak eunnyu ne bo katam, ago bo ichek che kachopchi Baba.

24Ak ye kingogas chun tamanu, konyit agobo choto aeng’ che tupcho.

25Ago kiguur Jesu kobwanji inendet, ak kole, Ongen ole bou eng’ kimnatet bounikab Bororiosiek, ak bou ichek bikwak che eechen.

26Ma u noto eng’ okwek: ago age tugul ne machei koek ne o eng’ kwenung’wong’ koek kiboitiondeng’wong’;

27ak age tugul ne machei koek ne bo tai eng’ kwenung’wong’ koek otwogindeng’wong’:

28agot ko u noto, kima nyo Weritab chi keboisiechi, ago si kobois inendet, ak kogoito sobondanyi koek kit ne kitiage che chang’.

29Ak kingomandoi ichek eng’ Jeriko, kosubi inendet tuiyet ne o.

30Ogeero, kipkoratinik aeng’ che kitebyei eng’ oret taban, ye kingogas kole siirtoi Jesu, kowaach, kole, Kiptaiyandani, rireneige, ee weritab Daudi.

31Kiger kong’ tuiyet bichoto kole, kosisyo: ago kites kowaach, kole, Kiptaiyandani, rireneige, ee weritab Daudi.

32Kotonon Jesu, ak koguur ichek, ak kolenji, Omache ayaiywok nee?

33Kolenji inendet, Kiptaiyandani, kimache keyatwech konyekyok.

34Ak kirirge Jesu, ak kitwa konyekwak: ak kogeerto eng’ yoto ak kosub inendet.

← Chapter 19 Jump to: Chapter 21 →