Matthew 12

Kalenjin Bible (BUKUIT NE TILIL)

← Chapter 11 Jump to: Chapter 13 →

1Eng’ betusiechoto kobun Jesu mbarenikab bek eng’ betutab sabato; ak kiamei rubet alamalyennyi, ak kitoi kobach mesisekab bek, koam.

2Ago ye kingogeer Parisaik, kolenji inendet, Keero, yaei alamalyeng’ung’ ne ma chamdaat eng’ ng’atutik keyai eng’ sabato.

3Ago kilenji ichek, Tom osoman kit ne kiyai Daudi ye kiamei rubo, ak che kimi ak inendet:

4ye kingwo gotab Jehovah, ak koam makatinikab kabartaet, che kima ko chamdaat eng’ ng’atutik koam inendet, agot che kimi koboto inendet, kobate tisiik ichegei?

5Anan tom osoman eng’ Ng’atutik, kele, ing’waniti tisiik sabato eng’ betutab sabato eng’ hekalut, ama kiityin ichek tengekto?

6Ago amwawok ale, mi eng’ oli ne o kosiir hekalut.

7Ago ngo kionai ole teptoi ni, Amache rirenetab ge, mamache tiseiywo, ta kama ogikyini che matinyei tengek.

8Amu kiptaiyat ne bo sabato Weritab chi.

9Ak kiwa eng’ oloto, agoi sunagoginywa orit:

10ak ogeero, kimi chi ne resot eut. Ak kiteebe ichek inendet, kolenji, Tos chamdaat eng’ ng’atutik kisoob chi eng’ betutab sabato? Si kobiit kong’ach inendet.

11Ak kilenji ichek, Ngoro chi eng’ okwek, ne tinyei kechiriet agenge, ak ngot kororokyi keringet betutab sabato, ko tos masutu komong’?

12Siirtoot anyun ne tia chito eng’ kechiriet! Noto anyun, chamdaat keyai ne mie eng’ betutab sabato.

13Kimwachi anyun chito kolenji, Iite eung’ung’. Ak kiito: ak kosob, koigei eut nin age.

14Ago kimanda anyun Parisaik, ak koruoch agobo inendet, ole bartoi.

15Ak kingonai Jesu, kwo eng’ oloto: ak kiisub inendet che chang’; ak kiisoob ichek tugul,

16ak king’at ichek kole, si maibarta inendet:

17si kosulda ne kiga mwa maotiot Isaia, kole,

18Ogeero, otwogindennyu ne kialewen; Chamanennyu ne baibai sobondanyu eng’ inendet: Andoi inendet Tamirmiriennyu, Si komwachi Bororiosiek kiruoget.

19Matiitos, anan kobol; Ama kasei chi kutinnyi eng’ ortinwekab nganaset.

20Mairiei tegat ne chisot, Ama imisi inendet kitambit ne iyeni, Kot koyokto kiruoget ne iterterisie.

21Ak imang’u Bororiosiek kainennyi.

22Kigimutyi anyun chito ne kitinyei oindet, ne korat ak ko namat kut: ak kiisoob inendet, kot kong’alal ak kogeerto chito ne namat kut.

23Kokwong’io anyun tuiyosiek tugul, ak kole, Tos weritab Daudi nito?

24Ago kingogas Parisaik, kole, Maonei chichi oik, kobate eng’ Beelsebul ne o ne bo oik.

25Ak kingonai inendet kabwatutikwak kolenji, Ng’emaksei bororiet age tugul ne pchegei; ama tononi nganaset anan got age tugul ne pchegei:

26ak ngo on Setani Setani, ko kapcheigei inegei; tonondoi ano anyun bororiennyi?

27Ak ndaone oik eng’ Beelsebul, koonei eng’ ng’o werikwok? Noto anyun egu ichek che iruokwok.

28Ago ngaone oik eng’ Tamirmirietab Jehovah, ko kagoitwak anyun bounatetab Jehovah.

29Anan imuktoi ano kwo chi gotab chito ne kim, si korebe tugukyik ngot ko ma rat korok chito ne kim? Si kouur anyun gonnyi.

30Inendet ne magimi tuwai kogirindaa; ak inendet ne magiyumi tuwai koiyestooti.

31Noto anyun amwawok ale, Kinyochin kaat bik tengekto age tugul ak ng’olyot age tugul ne ya, ago che mwaei ng’olyo ne ya agobo Tamirmiriet, ko maginyochin kaat.

32Ak age tugul ne mwaitoe yaitio Weritab chi, kenyochin kaat; ago age tugul ne mwaitoe yaitio Tamirmiriet, ko maginyochin kaat, agot eng’ ng’onyuni anan eng’ noto nyonei.

33Anan oyai ketit komieit, ak logoekyik; anan oyai ketit koyait, ak logoekyik; amu kinae ketit logoekyik.

34Okwek lagokab erenok che ng’wonen, omuktoi ano okwek, che o yaach, omwa tuguk che miach? Amu ng’alali kutit che nyiitat muguleldo.

35Ibune chi ne mie tuguk che miach konoruennyi ne mie: ak ibune chi ne ya tuguk che yaach konoruennyi ne ya.

36Ak amwawok ale, ng’olyot age tugul ne bo buch ne mwaei bik, ko tun tetu tuguchoto eng’ betutab kiruoget.

37Amu kiityinin imanda eng’ ng’aleguk, ak kigikyinin eng’ ng’aleguk.

38Kiwolji anyun alak che bo sirik ak Parisaik, kolenji, Konetindoni, kimache kegeer kaborunet ne iboruech.

39Ago kiwolji kolenji, Ibinda ne ya ne bo ibetab ge ne cheng’ei kaborunet; ak magigochin kaborunet kobate kaborunetab maotiot Jona:

40amu ko u ye kimi Jona betusiek somok ak kemousiek somok moetab njiriot ne o mising’: ko u noto tun tebe Weritab chi betusiek somok ak kemousiek somok eng’ muguleldo ne bo ng’ony.

41Tun tonondos murenik che bo Ninebe koboto ibini eng’ kiruoget, ak kogikyi: amu kisik eng’ mwaitaet ne bo Jona; ak ogeero, mi yu ne o kosiir Jona.

42Ng’eetei tun laitoriat kobogoriot ne bo murot komostab tai koboto ibini eng’ kiruoget, ak kogikyi: amu kibun tabanwekab ng’ony si kogas ng’omnatetab Solomon; ak ogeero, mi yu ne o kosiir Solomon.

43Ago ye kagomong’une chi tamirmiriet ne muruon, kwo kobunot oldinwek che yaamnyotin, kocheng’oti ole imuung’e, amanyor.

44Yeityo komwa kole, Kaweekyigei gonnyu ole kiamong’une: ak ye kingonyo, konyor ko mami kiy, ak kobugot, ak ko chobot.

45Kwo anyun komut tamirmirik alak tisab che yaach kosiir inendet, ak kochut ak komeny oloto: ak eng’ let koyaitu atebetab chichoto kosiir ne ki bo tai. Egu ko u noto agine eng’ ibini ya.

46Kingota kong’alaljin tuiyosiek, ogeero, kitonondos eng’ sang’ kamet ak che tupcho, kocheng’ei kong’alalji inendet.

47Ak kimwachi anyun chito age kolenji, Keero, tononi eng’ sang’ komet ak che otupche, cheng’ei kong’alalun.

48Ago kiwolji chito ne kimwachin inendet, kolenji, Ng’o kamennyu ak che kitupche?

49Ak koiito eunnyi kotokyi alamalyennyi, ak kole, Ogeero, chu kamennyu ak che kitupche!

50Amu age tugul ne yaei magetab Baba ne mi kipsengwet, noto werit ne kitupche ak chepto ne kitupche, ak kamennyu.

← Chapter 11 Jump to: Chapter 13 →

Recommended Reading

Commentary Matthew Commentaries → Devotional Matthew Devotional Guide → Get This Bible Kalenjin Bible (BUKUIT NE TILIL) Study Bible →