Proverbs 31

Khmer Standard Version 1954 = Hammond Version

← Chapter 30 Jump to:

1នេះជាព្រះបន្ទូលរបស់ព្រះបាទលេមយួល ជាសេចក្ដីទូន្មានដែលទ្រង់បានទទួលពីមាតា។

2កូនអើយម្ដាយបានបន់ស្រន់សុំអោយមានកូន ហើយម្ដាយបានបង្កើតកូនមក ហេតុនេះចូរស្ដាប់ពាក្យម្ដាយ!។

3ចូរកុំអោយស្រីៗដណ្ដើមយកកម្លាំងរបស់កូនបានឡើយ ហើយក៏កុំទុកអោយស្រីៗដែលធ្លាប់តែធ្វើអោយស្ដេចវិនាស អាចដឹកមុខកូនបានដែរ។

4ចូរកូនចាំអោយច្បាស់ថា ស្ដេច និងមេដឹកនាំទាំងឡាយ មិនត្រូវសេពសុរា និងគ្រឿងស្រវឹងផ្សេងៗឡើយ។

5កាលណាគេស្រវឹង គេនឹងភ្លេចអនុវត្តច្បាប់ ហើយបំពានលើសិទ្ធិរបស់ប្រជារាស្ត្រក្រីក្រ។

6គួរអោយគ្រឿងស្រវឹងទៅអ្នកជិតស្លាប់ និងអោយស្រាទៅអ្នកដែលកើតទុក្ខកង្វល់វិញ

7ដ្បិតកាលណាគេផឹកគេនឹងភ្លេចភាពក្រីក្រ ហើយលែងនឹកឃើញទុក្ខព្រួយរបស់ខ្លួនទៀត។

8ចូរនិយាយជំនួសអ្នកដែលមិនអាចនិយាយបាន ហើយរកយុត្តិធម៌អោយអស់អ្នកដែលគ្មាននរណាការពារ។

9ចូរនិយាយការពារ និងរកយុត្តិធម៌អោយអ្នកក្រីក្រ និងជនទុគ៌ត។

10ស្ត្រីគ្រប់លក្ខណ៍កម្ររកបានណាស់ នាងមានតម្លៃលើសពេជ្រទៅទៀត។

11ស្វាមីទុកចិត្តលើនាង នាងតែងតែធ្វើអោយស្វាមីចំរុងចំរើន។

12នាងតែងតែផ្ដល់សុភមង្គលអោយស្វាមីអស់មួយជីវិត គឺនាងមិនធ្វើអោយស្វាមីជួបអពមង្គលឡើយ។

13នាងខិតខំរកអំបោះ និងសូត្រមកត្បាញរវៃយ៉ាងស្វាហាប់។

14នាងនាំអាហារមកពីឆ្ងាយ ដូចនាវាដឹកទំនិញ។

15នាងក្រោកពីព្រលឹម រៀបចំបាយទឹកអោយអស់អ្នកដែលរស់នៅក្នុងផ្ទះ ហើយចាត់ចែងការងារអោយស្រីបំរើធ្វើ។

16នាងរិះគិតពិចារណា ហើយទៅទិញចំការមួយ រួចនាងយកប្រាក់ដែលខ្លួនរកបាន ទៅទិញទំពាំងបាយជូរមកដាំ។

17នាងប្រឹងប្រែងធ្វើការយ៉ាងស្វាហាប់ មិនអោយទំនេរដៃឡើយ។

18នាងឃើញកិច្ចការរបស់នាងបានចំរើនឡើង នាងធ្វើការទាំងយប់ ក្រោមពន្លឺចង្កៀង។

19នាងកាន់ខ្នាររវៃអំបោះ រួចនាងបោះត្រល់ត្បាញ។

20នាងចែកទានដល់ជនក្រីក្រ ហើយជួយជនទុគ៌ត។

21នៅរដូវរងា នាងមិនភ័យបារម្ភអ្វីឡើយ ដ្បិតអ្នកនៅក្នុងផ្ទះរបស់នាង សុទ្ធតែមានសំលៀកបំពាក់យ៉ាងកក់ក្ដៅគ្រប់ៗគ្នា។

22នាងត្បាញភួយសំរាប់ខ្លួនឯង នាងមានសំលៀកបំពាក់ល្អៗដែលមានពណ៌ស្រស់។

23ស្វាមីរបស់នាងជាមនុស្សដែលគេគោរពរាប់អាន គាត់ចូលរួមក្នុងក្រុមព្រឹទ្ធាចារ្យរបស់ស្រុក។

24នាងដេរសម្លៀកបំពាក់លក់ ហើយក៏ដេរខ្សែក្រវាត់លក់អោយអ្នកជំនួញដែរ។

25នាងមានកម្លាំង និងមានកិត្តិយសថ្លៃថ្នូរ នាងសម្លឹងមើលទៅអនាគត ដោយឥតបារម្ភអ្វីឡើយ។

26នាងនិយាយស្ដីប្រកបដោយប្រាជ្ញា ហើយទូន្មានគេដោយចិត្តសប្បុរស។

27នាងមើលខុសត្រូវកិច្ចការក្នុងផ្ទះ ឥតទំនេរដៃសោះឡើយ។

28កូនរបស់នាងនាំគ្នាកោតសរសើរនាង រីឯស្វាមីរបស់នាងក៏លើកតម្កើងនាងដោយពោលថា:

29«មានស្ត្រីជាច្រើនគ្រប់លក្ខណ៍ តែនាងគ្រប់លក្ខណ៍លើសគេទាំងអស់»។

30រូបឆោមលោមពណ៌រមែងបញ្ឆោតចិត្ត រីឯសំរស់ល្អស្អាត មិននៅស្ថិតស្ថេររហូតទេ មានតែស្ត្រីគោរពកោតខ្លាច ព្រះអម្ចាស់ ប៉ុណ្ណោះ ដែលគួរកោតសរសើរ។

31នាងត្រូវតែទទួលផលពីកិច្ចការដែលនាងធ្វើ ហើយទទួលការកោតសរសើរពីមនុស្សទាំងអស់ក្នុងទីក្រុង។

← Chapter 30 Jump to: