Amos 1

Luganda (BIBU1) (BIBULIYA ENTUKUVU)

Jump to: Chapter 2 →

1Ebigambo bya Amosi, omu ku basumba b'e Tekowa, bye yalaba ku Yisirayeli mu mirembe gya Wuzziya, kabaka wa Yuda n'egya Yerobowamu, mutabani wa Yowasi, kabaka wa Yisirayeli, nga wasigadde emyaka ebiri musisi okuyita.

2N'agamba nti: “Omukama awuluguma ng'ayima mu Siyoni, abwatuka ng'ayima mu Yeruzaalemu; amalundiro g'abalunzi gakungubaga, n'entikko za Karumeli ziwotose.”

3Omukama kino ky'agamba: “Olw'emisango esatu egya Damasiko, n'olw'emisango ena, kye nateesa sijja kukijjulula, kubanga bawuula Gileyaadi n'empuuzo ez'ebyuma.

4Nzija kusindika omuliro mu nnyumba ya Kazayeli, ogunaasenkenyeza ddala embiri za Beni-Adadi.

5Nzija kumenya emiyingo gya Damasiko, nzikirize abatuuze b'omu Kiwonvu kya Aveni, n'oyo akutte ddamula e Beti-Edeni; abantu ba Aramu bajja kutwalibwa mu busibe e Kiri.” Omukama y'agamba.

6Omukama kino ky'agamba: “Olw'emisango esatu egya Gaza, n'olw'emisango ena, kye nateesa sijja kukijjulula, kubanga baasiba abantu bonna ne babatunda mu Edomu.

7Nzija kusindika omuliro ku bbugwe wa Gaza ogunaasenkenyeza ddala embiri zaayo.

8Nzija kusaanyaawo abatuuze b'omu Asudodi, n'oyo akutte ddamula e Asukeloni. Omukono gwange nzija kugukyusiza ku Ekuroni; N'abasigaddewo mu Bafilisitiini balizikirira.” Omukama y'agamba.

9Omukama kino ky'agamba: “Olw'emisango esatu egya Tiiro, n'olw'emisango ena, kye nateesa sijja kukijjulula, kubanga baddira ebibinja by'abasibe byonna ne babitunda mu Edomu, ne batajjukira mukago gwa bwaluganda.

10Nzija kusindika omuliro ku bbugwe wa Tiiro ogunaasenkenyeza ddala embiri zaakyo.”

11Omukama kino ky'agamba: “Olw'emisango esatu egya Edomu, n'olw'emisango ena, kye nateesa sijja kukijjulula, kubanga yawondera muganda we n'ekitala, ekisa yakissa ebbali, obusungu bwe ne bwongera okutumbuka, obuswandi bwe ne butaamuuka.

12Nzija kusindika omuliro mu Temani, ogunaasenkenyeza ddala embiri za Bozura.”

13Omukama kino ky'agamba: “Olw'emisango esatu egy'Abammoni, n'olw'emisango ena, kye nateesa sijja kukijjulula, kubanga baabaaga abakazi b'e Gileyaadi abaali embuto, basobole bwe batyo okugaziya ensalo zaabwe.

14Nzija kuteekera omuliro bbugwe wa Rabba ogunaasenkenyeza ddala embiri zaakyo, eno enduulu nga zitakira ku lunaku olw'olutalo, ne mu muyaga omungi ku lunaku olwa kikuŋŋunta;

15Kabaka waabwe aligenda mu busibe, ye wamu n'abakungu be.” Omukama y'agamba.

Jump to: Chapter 2 →