Amos 6

Luganda (BIBU1) (BIBULIYA ENTUKUVU)

← Chapter 5 Jump to: Chapter 7 →

1Zibasanze mmwe abeegandalidde mu Siyoni! Nammwe abeetuulidde entende ku lusozi lwa Samariya; abeebitiibwa mu ggwanga lino erisooka mu malala, ennyumba ya Yisirayeli gy'ejja.

2Mujje e Kalune mulabe; muveeyo mulage e Kamati ekikulu, mulyoke muserengete e Gati eky'Abafilisitiini Bali bulungi okusinga obwakabaka buno? Yadde ensi yaabwe ngazi okusinga eyammwe?

3Bwe mugenda nga mwongezaayo olunaku olw'akabi, mwanguyaako nnamulondo y'obukambwe.

4Mwebaka ku bitanda eby'amasanga, ne mwegololera ku buliri bwammwe; mulya obuliga bwe mulondobye mu ggana, n'obuyana okuva mu kisibo.

5Muyoogaanira ku ddoboozi ery'entongooli, ne muyiiyayiiya ebivuga nga Dawudi.

6Munywa empaawo n'empaawo z'omwenge, ne mwesiiga omuzigo ogusingira ddala obulungi, naye mmwe tekibaluma Yozefu okuzikirizibwa.

7Olwekyo nno mujja kubeera mu banaasooka okuwaŋŋangusibwa; okucakala kw'abeebaka ne beegolola kujja kukoma.

8Omukama Katonda yeerayiridde; agamba Omukama Katonda w'Amagye nti: “Nkyawa amalala ga Yakobo, neenyinyala embiri ze; ekibuga nzija kukiwaayo na byonna ebikirimu.”

9Abantu ekkumi bwe balisigala mu nnyumba emu, nabo balifa.

10Ow'oluganda alijja okwokya emirambo, aggyewo amagumba mu nnyumba, bw'alibuuza yenna aliba akyali mu nnyumba eyo ebuziizi nti: “Waliyo abalala?” alimuddamu nti: “Teriiyo.” Olwo ono alimugamba nti: “Sirika! Erinnya ly'Omukama tetuteekwa kulyatula.”

11Kubanga Omukama awadde ekiragiro: “Ennyumba ennene egenda kukoonakoonebwa esigale mafunfugu, n'akayumba akatono kalisigala kifulukwa.

12Embalaasi ziddukira mu njazi? Ennyanja bagirimisaamu nte? Naye mmwe lwaki nno obutuufu mubufudde obutwa, n'ekibala ky'obutuukirivu ne mukifuula omususa?

13Mmwe abasanyuka olwa Lo-Dabari, abagamba nti: ‘Tetwawamba Karunayimu n'amaanyi gaffe?’ ”

14Anti Omukama Katonda w'Amagye agamba nti: “Nnyumba ya Yisirayeli, nzija kukusiikulira eggwanga, likunyigirize okuviira ddala e Lebo-Kamati okutuusa ku Kiwonvu Araba.”

← Chapter 5 Jump to: Chapter 7 →