Amos 7

Luganda (BIBU1) (BIBULIYA ENTUKUVU)

← Chapter 6 Jump to: Chapter 8 →

1Kino Omukama kye yandaga: Yali ategeka ebikuukuulu by'enzige birumbe awo ng'eby'amasiga agookubiri bisooka okumera, awo nga n'essubi lya kabaka lyakasalibwa.

2Enzige nga zimaze okusenkenya omuddo ku nsi, ne ŋŋamba nti: “Ayi Mukama Katonda, nkwegayiridde, nsaasira! Yakobo anaasigalawo, oyo omutono bw'atyo?”

3Omukama ne yeddamu; Omukama n'agamba nti: “Tekibeewo!”

4Kino Omukama Katonda kye yandaga: Omukama yali ayita omuliro agweyambise okulamula; gwakaliza eddubi eggwanvu ne gutandika n'okulya olukalu.

5Ne ŋŋamba nti: “Ayi Mukama Katonda, nkwegayiridde, koma awo; Yakobo anaasigalawo, oyo omutene bw'atyo?”

6Omukama ne yeddamu; Omukama Katonda n'agamba nti: “Na kino tekiibeewo.”

7Kino Omukama Katonda kye yandaga: Omukama yali ayimiridde kumpi n'ekisenge ekyazimbirwa ku bbirigi, yali akutte bbirigi mu ngalo.

8Omukama n'ambuuza nti: “Amosi, kiki ky'olaba?” Ne mmwanukula nti: “Bbirigi.” Awo Omukama n'aŋŋamba nti: “Laba, nzija kussa bbirigi mu bantu bange wakati; sijja kwongera nate kubaleka bulesi.

9Ebifo bya Yizaake ebigulumivu bijja kuzikirizibwa; ebifo ebitukuvu ebya Yisirayeli birifuuka matongo; ennyumba ya Yerobowamu nzija kugisitukiramu n'ekitala.”

10Awo Amaziya, kabona w'e Beteli n'atuma ewa Yerobowamu kabaka wa Yisirayeli, n'amugamba nti: “Amosi akujeemedde wano mu nnyumba ya Yisirayeli wakati; ensi tekyasobola kugumiikiriza bigambo bye byonna.

11Anti bino Amosi by'agamba: “ ‘Yerobowamu ajja kufa kitala, ne Yisirayeli ajja kuwaŋŋangusibwa ewala okuva mu nsi yaboobwe.’ ”

12Amaziya n'agamba Amosi nti: “Genda, ggwe omulabi, ddukira mu nsi ya Yuda, eyo gy'oba olya emmere era gy'oba okolera obulanzi;

13naye toddamu kulangira mu Beteli, kubanga kye kitukuvu kya kabaka era kye kiggwa ky'eggwanga.”

14Awo Amosi n'ayanukula n'agamba nti: “Nze siri mulanzi, yadde omu ku baana b'abalanzi, wabula ndi mulunzi, ndabirira miti gya mikunyu.

15Naye Omukama ye yanzigya ku gw'okulunda, n'aŋŋamba nti: ‘Genda olange eri abantu bange Yisirayeli.’

16Kale nno wulira ekigambo ky'Omukama: “Ggwe ogamba nti: ‘Tobaako ky'olanga ku nnyumba ya Yisirayeli, era tobaako ky'osiinya ku nnyumba ya Yizaake.’ ”

17N'olw'ekyo nno Omukama kino ky'agamba: “Mukazi wo ajja kufuuka malaaya mu kibuga, batabani bo ne bawala bo bajja kufa ekitala; ensi yo ejja kukubibwa olukoba olupima egabanyizibwemu, ate naawe olifiira mu nsi eteri nnongoofu, ne Yisirayeli ajja kuwaŋŋangusibwa ewala okuva mu nsi yaaboobwe.”

← Chapter 6 Jump to: Chapter 8 →