Amos 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Omukama kino ky'agamba: “Olw'emisango esatu egy'e Mowabu, n'olw'emisango ena, kye nateesa sijja kukijjulula, kubanga yayokya amagumba ga kabaka wa Edomu ne gafuuka ennoni.

2Nzija kusindika omuliro mu Mowabu ogunaasenkenyeza ddala embiri za Kiriyoti; Mowabu alifiira mu kagugumuko, eno enduulu nga zirawa n'eŋŋombe ng'evuga.

3Ndisaanyaawo omufuzi waakyo, ne nzitirako n'abakungu be bonna.” Omukama y'agamba.

4Omukama kino ky'agamba: “Olw'emisango esatu egya Yuda, n'olw'emisango ena, kye nateesa sijja kukijjulula, kubanga baasambajja etteeka ly'Omukama n'ebiragiro bye ne batabikwata; kubanga balubaale ab'obulimba baabawubisa, abo bajjajjaabwe be baali bagoberedde.

5Nzija kusindika omuliro mu Yuda ogunaasenkenyeza ddala embiri za Yeruzaalemu.”

6Omukama kino ky'agamba: “Olw'emisango esatu egya Yisirayeli, n'olw'emisango ena, kye nateesa sijja kukijjulula, kubanga omuntu omutuukirivu bamutunzeemu ffeeza, n'omwavu ne bamutundamu omugogo gw'engatto;

7emitwe gy'abaavu bagisambiridde mu ttaka, abanaku ne babasindiikiriza eri; omwana ne kitaawe bagenda ku muwala omu, ne boonoona batyo erinnya lyange ettukuvu.

8Beeyala buli awali omwaliiro mu byambalo ebyaweebwa ng'omusingo; banywera mu nnyumba y'Omukama omwenge ogwasingwa ng'engassi.

9Sso nze nazikiriza Omwamori mu maaso gaabwe, eyali omulangavvu ng'entolookyo, ow'amaanyi ng'omuvule; nazikiriza ebibala bye waggulu n'emirandira gye wansi.

10Nze nabaggya mu Misiri, ne mbakulemberera emyaka ana mu ddungu, musobole okulya ensi y'Abaamori.

11Nasitusa abalanzi mu baana bammwe n'abanazireewo mu bavubuka bammwe. Si bwe gutyo bwe gwali, bantu ba Yisirayeli?” Omukama y'agamba.

12“Naye mmwe mwawaliriza abanazireewo okunywa evviini, ne mulagira abalanzi balekere awo okulanga.

13Kale nno ndibabetenta ng'ekigaali ekyetisse emiganda gy'eŋŋano bwe kibetenta;

14embiro ziribula omuwenyusi, ow'amaanyi talyongeramu ku maanyi, n'omutabaazi talisobola kwewonya.

15Omulasi w'obusaale taligumirawo, ow'emisinde mu bigere talisumattuka, n'omwebagazi w'embalaasi talitaakiriza bulamu bwe.

16Ku olwo n'asinga obuzira mu batabaazi alidduka bukunya.” Omukama y'agamba.

← Chapter 1 Jump to: Chapter 3 →