Leviticus 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Te Yehova omve Musani, o’duko erini efu hema ti ecizaniri ma alia, ’yo kini,

2Mi ’yo anzi Israelini ma tia kini, ’Ba alu emi eselia ka afa feza edetaru fe Yehova dri, ma fe eri anyapa ma eselia, kani tini, kani kabiloni.

3Afa edetaru erini feleri ka ovu anyapa ’wara ma eselia, ma ovu tiago onyiru nyebile kokoruri’i; ma fe eri hema ti ecizaniri ma tilea, ’dini Yehova ma a’i agu nde i drilia ani;

4eri ma ti i dri edeta vezaruri ma dria, te eri nga ovu a’izaru eri dri eri ma e’yo onzi edezu.

5Eri ma so tiago nderi Yehova ma drilia; Aroni anzipi kuhaniru ’diyi nga ari nde ji fezu, oyazu pari edeta edezu hema ti ecizaniri ma tileari ma dria ageiniasi kuru.

6Eri ma wu enyiriko edeta vezaru nderini, zani opizu indi;

7kuhani Aroni ma anzipi ma edu aci pari edeta edezuri ma dria, ma oti eja aci nderi ma dria;

8Aroni anzipi kuhaniru ’diyi ma oti za nde ma esele, drini pi osoni pie, eja ovupi aci pari edeta edezuri ma driari ma dria;

9te ma oji aleni pi pa be yisi. Kuhanini nga eri ve dria pari edeta edezuri ma dria, edeta vezaru, edeta edele acisi, aji arikariru Yehova vuriru.

10Afa erini fele edeta vezaruri ka enga anyapa nyiri ma eselia, kani kabiloni kani ndrini, eri ma fe agoni rua be onyiru nyebile kokoruri’i;

11eri ma li eri pari edeta edezuri ma kala andraleruria Yehova drilia, Aroni anzipi kuhaniru ’diyi nga di arini oya pari edeta edezuri ma dria ageiniasi kuru.

12Eri ma opi zani, drini pi osoni pie, te kuhanini nga di yi oti aci pari edeta edezuri ma driari ma dria ra;

13te ma oji aleni pi pa be yisi. Kuhanini nga eri fe dria, vezu pari edeta edezuri ma dria; eri edeta vezaru, edeta edele acisi, aji arikariru Yehova vuriru.

14Afa erini fele Yehova driri ka ovu edeta vezaru ariasiri, eri ma fe di a’balau angarakaru ’diyi, kani a’balau o’buru ma anzi, i ma edetaru’i.

15Kuhani nga eri ji pari edeta edezuria, nga drini vi kpi, nga eri ve pari edeta edezuri ma dria; ari erini ma ra pari edeta edezuri ma kalaa;

16eri nga anyawio pi nze, zeni be, nga yi ’be pari edeta edezuri ma ageia, kala etuni efurialeruria, pari ofuta dazuria;

17eri ma bi opileni eri asizu, te ma ali aleni iri ku. Kuhanini nga di eri ve pari edeta edezuri ma dria, eja aci driari ma dria; eri edeta vezaru, edeta edele acisi, aji arikariru Yehova vuriru.

Jump to: Chapter 2 →