Leviticus 16

Lugbara (E’yo Siza Alatararu Munguniri BIBLIA)

← Chapter 15 Jump to: Chapter 17 →

1Yehova ’yo Musa tia, Aroni ma anzipi iri ’diyini odrazu, yini yi esizu ogogo Yehova ma driliari ma vutia;

2te Yehova ’yo Musa ma tia kini, Mi ’yo mi adri Aroni ma tia kini eri ma fi etu dria pari alatararu, bongo jo ale alizuri ma alialeruria, oguna yikini sanduku ma driari ma drilia ku, eri kazu drazu ku; a’disiku ma nga ma e’da iriti ma alia oguna yikiniri ma drilesi.

3Te Aroni ma efi pari alatararu ma alia afa ’diyi be; ma eji tiago aludure edeta e’yo onzi edezuriru, azini kabiloago edeta vezaruriru.

4Eri ma su koti cile bongo mile be nyiriarurisi alatararuri i ruaa, ma su bongo paari i ma ruaa indi, ma a’di i ma opile baka edele bongo mile be nyiriarisirisi, ma ombe vini bongo dri ombezuri i ma dria indi; yi bani bongo suza alatararu ’diyi. Eri ma oji i rua yisi oko raka, ma osu yi i ma ’truaa ndo.

5Eri ma o’du anzi Israelini ongulumuru ’diyi ma driarisi ndriago iri edeta e’yo onzi edezuriru, azini kabiloago alu edeta vezariru.

6Te Aroni ma fe tiago edeta e’yo onzi edezurini, ovupi i ma ngulupi ma e’yosiri, ma ede ani i ma ngulupi ma e’yo onzi ori’ba ini be.

7Eri ma o’du di ndriago iri ’diyi, ma o’ba yi Yehova ma drilia, hema ti ecizaniri ma tilia;

8te Aroni ma ’be odrisi ndriago iri ’diyi ma dria, odrisi ’beza aluri Yehova dri, odrisi ’beza aziniri Azazeli dri.

9Te Aroni ma ofe ndri odrisini ’dezu drinia Yehova driri, ma ede eri edeta e’yo onzi edezuriru;

10te ma ’ba ndri odrisini ’dezu drinia Azazeli driri, kuzu idriru mile be ’dani Yehova ma drilia, e’yo onzi erini edezu, tini pezu muzu asea Azazeli vu.

11Aroni ma ofe tiago edeta e’yo onzi edezurini, ovupi i ma ngulupi ma e’yosiri, ma ede ani i ma ngulupi ma e’yo onzi ori’ba ini be; eri ma so di tiago e’yo onzi edezurini ovupi i ma ngulupi ma e’yosiri ra,

12Eri ma ’du aciolu otekua obiese vezuri ma alia treri, pari edeta edezu Yehova ma driliaria, azini obiese vele veri aji be arikariru cole efifiruri driogoroa tre alu, ma eji bongo jo ale alizuri ma alialeru,

13ma ’ba obiese vele veri aci dria Yehova ma drilia, ’dini obiese nde ma acika ma a’bu oguna yikini ovupi e’yo eti nzeza ma driari ci, eri kazu drazu ku;

14te eri ma ebe tiago nderi ma ari ma azi, ma oya eri drilejusi oguna yikiniri ma ruaa kala etuni efurialeruria, azini eri ma oya ari nderi drilejusi oguna yikiniri ma, drilia pale aziri.

15’Di ma vutia eri ma li ndri edeta e’yo onzi edezurini ovupi ’ba ongulumuru ’diyi ma e’yosiri, ma eji arini bongo jo ale alizuri ma alialeru, ma ’ye ari nderisi ekile erini te ’yele tiago ma arisirile, ma oya eri oguna yikiniri ma ruaa, azini oguna yikiniri ma drilia;

16eri nga di pari alatararuri ma e’yo onzi ede, anzi Israelini ’diyini ovule alatara kokoru ezata berisi, ada e’yo onzi yini ma e’yosi dria; eri ma ’ye ’dini vini hema ti ecizani ovupi yi be ’dani alatara ako yini ma eseliari ma e’yosi indio

17’Ba aluni ma ovu hema ti ecizaniri ma alia erini firia e’yo onzi edezu pari alatararuria, cazu kpere erini furia ku, de nga eri edeni e’yo onzi i ngulupi pini, ori’ba ini pie, ’ba ongulumuru dria Israelini ’diyi pie ku.

18Eri ma fu di mu pari edeta edezu ovupi Yehova ma driliaria, ma ede e’yo onzi pari ndeni, ma ebe tiago pi ma ari ma azi ndrini be, oyazu pari edeta edezuri ma o’yua kalaniasi kuru.

19Eri ma oya ari nde ma azi i drilejusi drinia paleko aziri, eri ’bazu alaru azini alatararu anzi Israelini ma e’yo alatara kokoru ’diyi ma e’yosi.

20Eri ka pari alatararuri pi ma e’yo onzi ede de ’bo, hema ti ecizaniri pie, pari edeta edezuri pie, eri ma fe ndri kule idriru mile beri’i;

21te Aroni ma oti i dri iri tro ndri idriru nderi ma dri olu’bua, ’ba Israelini ’diyi ma onzi dria e’dazu drinia ezata yini pie dria, ada e’yo onzi yini dria; eri ma o’ba yi ndri nderi ma dria, ma pe eri ti muzu roko dria ’ba pele kule ngonderi ma dria.

22Ndri nderi nga e’yo onzi yini ’du i ruaa dria jizu angu ’ba kokorua; eri ma tru ndri nderi ku muzu angu roko driaria.

23Aronini nga di fi hema ti ecizaniri ma alia, nga afa suza cile bongo mile be nyiriasi erini sule fizu pari alatararuria ’diyi otru ra, yi kuzu ’daa;

24eri ma oji i ruaa yisi pari alatararua, ma su afa suza ini, ma efu, ma ede edeta vezaru i ma ngulupiniri edeta vezaru ’ba ongulumuruniri be, ma ede e’yo onzi i ngulupini, azini vini ’ba ongulumuru ’diyini indio

25Eri ma ve edeta e’yo onzi edezuri ma oso pari edeta edezuri ma dria.

26Te ’ba ndri nderi trupi kupi muzu Azazeli vuri ma oji afa suza ini, ma oji vini i rua yisi oko raka, ma efi pari ’bani hema asozuri ma alia ndo.

27Te tiago edeta e’yo onzi edezurini, ndri edeta e’yo onzi edezurini be, te yini yi ma ari ejile pari alatararuria e’yo onzi edezu ’diyi, ma ji yi pari ’bani hema asozuri ma aperitia amve; ma ve enyiriko yini pi acisi, zani pie, yamanakani pie.

28Te ’ba yi, vepiri ma oji bongo ini, ma oji vini i rua yisi oko raka, ma efi pari ’bani hema asozuri ma alia ndo.

29Te eri ma ovu emi dri azitaru ’dani ’dani: mba aziri ma o’du mudririsi emi ma ovu asi otiza be, ma nga azi aluni ku, kani kari’bani kani ani’bo ovupi emi eseliari’i ti;

30a’disiku o’du nderisi yi nga e’yo onzi emini ede emi ’bazu alaru; emi nga ovu alaru e’yo onzi emini ’diyisi dria Yehova ma drilia.

31Eri ovu emi dri sabato ’bani ava lizu inzitasiri’i, emi ma ovu asi otiza be; eri ovu azita ’dani ’daniri.

32Te kuhani yini odu osule drinia, yini pele ndu alaru ovuzu kuhaniru i ati ma pariari, ma ede e’yo onzi ’bani, erini bongo suza alatararu cile bongo mile be nyiriasi ’diyi suria i ruaa;

33eri ma ede pari alatararuri ma e’yo onzi; eri ma ede vini hema ti ecizaniri pi ma e’yo onzi, pari edeta edezuri be; eri ma ede vini kuhani piyi ma e’yo onzi, ’ba ongulumuru ’diyi pie dria.

34’Diri ma ovu emi ’dri azitaru ’dani ’dani, anzi Israelini ’diyi ma e’yo onzi edezu e’yo onzi ’yini ma e’yosi dria pale alu eli vusi eli vusi. Te eri ’ye ekile Yehovani ’azile Musa tiarile.

← Chapter 15 Jump to: Chapter 17 →