Leviticus 10

Lugbara (E’yo Siza Alatararu Munguniri BIBLIA)

← Chapter 9 Jump to: Chapter 11 →

1Te Aroni anzipi Nadabu pi Abihu be, yi alu alu nga ajikoa yini aciolu ’bazu ’diyi ’du, nga aci ’ba alenia, nga vini obiese vele veri ’ba drinia, nga aci ndu Yehovani azile kuri fe eri ma drilia.

2Te aci nga di ibi enga Yehova ma driliasi, nga efu yi vezu, yi nga mira ani Yehova ma drilia ra.

3Musa nga di e’yo ’yo Aroni tia kini, E’yo ’diri bani Yehovani ndra ’yoleri kini, Ma nga ma e’da alatararu ’ba esipi ma vu ogogo ’diyi ma alia, azini ma nga inzita isu ’ba dria ’diyi ma milia. Te Aroni adri ini ciri.

4Musa nga di Aroni ati ma adri Uzieli ma anzipi Misaeli pi omve Elizafani be, nga ’yo yi tia kini, Emi esi ogogo, emi ji emi adripi ma avuyi engazu pari alatararu ma driliasi kpere pari ’bani hema asozuri ma tia amve.

5’Dini yi esi ogogo, nga yi ji koti yini be yi ma ruaa ’dani, pari ’bani hema asozuri ma tia amve, ekile Musani ’yolerile.

6Te Musa nga ’yo Aroni pi ma tia anzipi be, yi Eleazari pi tamari be kini, Emi’i emi ku dribi emini guraru ku, emi osi bongo emini ku indi, emi kazu drazu ku, adra erini kazu efuzu ’ba ongulumuru dria ’diyi ma dria ku beni; te emi ku emi adripi, ada suru Israelini ’diyi dria, ma owu aci Yehovani edule vepi ’dirini.

7Te emi ma fu hema ti ecizaniri ma tiliasi amve ku, emi kazu odrazu ku; a’disiku odu osule osu Yehovaniri ovu emi dria. Yi ’ye ekile Musani ’yolerile.

8Yehova nga di ’yo Aroni tia kini,

9Emi ma mvu patiefi su, kani ewa okaru aluni ku emini firia hema ti ecizaniri ma aliaria, kani mi’i, kani mi anzipi, emi kazu odrazu ku; eri ma ovu azita ’dani ’daniriru a’bianzi emini vusi dria.

10Emi ma co ani afa alatararuri pi ma esele afa alatara kokoruri be, ma co vini afa alaruri pi ma esele afa ondiruri be;

11emi ma imba anzi Israelini ’diyini azita dria Yehovani ’yole yi tia geri Musa ma tiasi ’diyi onizu.

12Musa nga ’yo Aroni pi ma tia, anzipi acepi ’diyi be, yi Eleazari pi tamari be, kini, Emi ’du edeta edele anyafurasi acepi jolokoru edeta edele acisi Yehova dri ’diyi ma eseliari, emi ma nya eri akufi kokoru pari edeta edezuri ma ageia, te eri alatararu agapi turi;

13emi ma nya eri pari alatararua, a’disiku eri ovu afa azile miniru mi anzipi beri engazu edeta edele acisi Yehova dri ’diyi ma eselia; a’disiku azi ma tia ’dini.

14Te emi ma nya agati oyale oyari pi o’du ’dule ururi be pari alarua, mi’i, mi anzipi pie, mi ezopi pie tualu; a’disiku yi ovu afa azile eminiru mi anzipi beri, engazu edeta edele asi anzuruni anzi Israelini ’diyini ’diyi ma eselia.

15Yi ma eji o’du ’dule ururi pi agati oyale oyari be, tualu oso fele edetaru evele acisi ’diyi be, ma oya eri edeta oyale oyariru Yehova drilia; te eri ma ovu mini, mi anzipi be, afa azile eminiru ’dani ’daniri’i; ekile Yehovani azilerile.

16Te Musa nga ndri edeta e’yo onzi edezuriniri nda okposi, te mi ne, eve eri ’bo! Eri ngaovu ani aokosi Aroni ma anzipi acepi ’diyi vu, yi Eleazari pi tamari be, kini,

17Emi nyani edeta e’yo onzi edezuri pari alatararu turia ku a’disi ya? A’disiku eri ovu afa alatararu agapi turi, te eri fe eri emi dri e’yo onzi ’ba ongulumuruni ’duzu ani, e’yo onzi yini edezu Yehova ma drilia.

18Emi ne, ejini arini pari alatararu tu alealeruria ku. Onyiruni emini te nyazu ecekokoru pari alatararu turia, ekile mani azilerile.

19Te Aroni nga ’yo Musa tia kini, Mi ne, o’du andru ’dorisi yi ede edeta yini e’yo onzi edezuri pi Yehova drilia edeta yini vezaruri be; te ti, e’yo ’dinile ’diyi ’ye yi ma vu ra! Ma ka te edeta e’yo onzi edezuri nya andru ra, e’yoni te nga ovu onyiru Yehova ma milia ra ya?

20Te Musani e’yo ’diri eriria, eri ovu eri ma milia onyiru.

← Chapter 9 Jump to: Chapter 11 →