Leviticus 21

Lugbara (E’yo Siza Alatararu Munguniri BIBLIA)

← Chapter 20 Jump to: Chapter 22 →

1Yehova ’yo Musa tia kini, Mi ma ’yo Aroni anzipi kuhaniru ’diyi ma tia, ’yozu kini yi ma alu ma eza i ’ba drapi ’bo ’ba ini ma eselia ’diyi ma e’yosi ku;

2ma eza i kiri lu ori’ba ini ogogori ma e’yosi, i andri pisi, ati pie, mvi pie, zi pie, adri pie,

3amvipi aliriaru ovupi eri vu ogogori pie, a’disiku muni nga agupia ku; eri ma e’yosi eri eco i ezazaru.

4Eri ma eza i ku, ka tro eri ambo ori’ba ini ma eselia ti, eri ma eza i alatara kokoru ku.

5Yi ma fa yi ma dribi kuzu tuaru ku, ma fa vini yi ma tibi ma kala ku, ma oli vini yi rua aluni ku.

6Yi ma ovu alatara Mungu yiniri dri, ma eza Mungu yini ma ru ku; a’disiku yi edeta edele acisi ’diyi ede, adani Mungu yiniri ma enya; e’yo ’disi yi ma ovu alatararu.

7Yi ma ’du oku awuoururi, kani alatara kokoruri ku; ma ’du vini oku agupini drole rari ku indi; kuhanini ovule alatararu Mungu ini dririsi.

8E’yo ’disi mi ma pe eri ndu alatararu ani, a’disiku eri enya fe Mungu minirinini; eri ma ovu alatararu mi dri; a’disiku ma Yehova mi ’bapi alatararuri, ma alatararu.

9Te kuhani ma azi ma zamva ka i eza alisi, eri eza i ati alatara kokoruni; ma eve eri acisi.

10Kuhani ambo agapi ra adripi ini ma eselia, ’bani odu efizari osule eri ma dria, yini ’bale ndu alaru bongo suza nde ’diyi suzuri, ma ku dribi ini guraru ku, ma osi bongo ini ku indi;

11eri ma fi avu vu aluni ku, ma eza i ku, ka ovu i ati’i kani andri’i ti;

12eri ma fu vini pari alatararuriasi ku, ma eza vini Mungu erini ma pari alatararuri ku; a’etisiku ’baza ndu alaru Mungu erini ma odu osule osuriniri ovu eri ma dria ci: ma Yehova’i.

13Eri ma je zamva agupi nipi nga kuri okuru.

14Te awuziou pi, oku agupini drole rari pie, oku alatara kokoruri pie, oku awuoururi pie, ’dini ’diyi ma je ku; te eri ma je zamva suru ini ma eselia agupi nipi nga kuri i ma okuru’i,

15eri ma eza i ma ori ori’ba ini ’diyi ma eselia ku; a’disiku ma Yehova eri ’bapi alatararuri’i.

16Yehova ’yo Musa ma tia kini,

17Mi ’yo Aroni ma tia ’dini, Ori i mini ma eselia a’bianzi yini vusi dria, ’ba ovupi nyebileko be i ruaari aluni ma esi ogogo Mungu ini ma enya fezuni ku.

18A’disiku ’ba nyebileko be i ruaari aluni ma esi ogogo ku: ’ba mile kokoruri, kani ’ba acozaruri, kani ’ba omvu be akpafuari, kani ’ba afani efuzu eri ma ruaa ereniruri,

19kani ’ba pa be nyozaruri, kani dri be nyozaruri,

20kani ’ba ngukua ongurua beri, kani ’ba zopi ku atrupi atruri, kani ’ba mile be fularuri, kani ’ba ayiribeni nyaleri, kani ’ba bileofa be ruaari, kani ’ba otufinini drale rari;

21kuhani Aroni ma ori’ba ma eselia ’ba nyebileko be i ruaari aluni ma esi ogogo edeta Yehovani ’bani edele acisi ’diyi edezu ku; eri ovu nyebileko be i ruaa, eri ma esi ogogo Mungu ini ma enya fezuni ku.

22Te nyazaruni eri nga Mungu ini ma enya nya ra, ada afa alatatararu agapi rari pi alatararuri be iri tro,

23te eri ngani fi bongo jo ale alizuri vualeru ku, kani ma esi vini pari edeta edezuri vu ogogo ku, erini ovule nyebileko be i ma ruaarisi, eri ma eza ani pari alatararu mani ’diyi ku; a’disiku ma Yehova yi ’bapi alatararuri’i.

24Musa ’yo ’dini Aroni pi ma tia, anzipi be, anzi Israelini ’diyi pie dria.

← Chapter 20 Jump to: Chapter 22 →