Romans 10

Lugbara (E’yo Siza Alatararu Munguniri BIBLIA)

← Chapter 9 Jump to: Chapter 11 →

1Ma adripi, ava ma asiari azini ziza mani Mungu vu ’ba Israelinisiri eri ’di’i, yi ma pa yi ra,

2Te ma e’yo ada ’yo yisi, yi ovu ava amboru be Mungu vu, te nita kokoru.

3Te yini onyi Munguni niria ku, te yi ndru geri yi ngulupi ma onyi ’bazu yi’i ceni, yi ga onyi Munguni si.

4Te azita ma kalati asizuri eri Kristo’i, ’dini eri ma la ’ba dria eri a’ipi ’diyi baru ani.

5Te Musa si kini ’ba onyi azita ndeni ’yepiri eri nga ovu idriru erini ’yelerisi.

6Te onyi ’bani isule a’itasiri ’yo ’dini, Mi ’yo mi asia ku, A’dini nga tu ’buani ya? (Kristoni ejizu va ’doa)

7kani, A’dini nga si va ’bile aliru aliani ya? (Kristoni engazu dra ma alia).

8Te eri ’yo ngoni ya? E’yo nde ovu mi vu inyia, azini mi tilia, mi asia indi (’di e’yo a’itani amani oluleri’i);

9kini mi ka Yesuni e’da Opi’i mi tisi, azini mi ka a’i mi asia indi kini Mungu enga eri ’ba draza eselia ’bo, mi nga mi pa ra.

10Te asisi ’ba yi a’i ra e’yo ’ba lazu baruri isuzu, te tisi ’ba yi e’yo e’da pata Isuzu.

11Te e’yo siza ’yo ra, ’Ba dria eri a’ipiri ngani ovu drinzasi ku.

12Te ’ba Yahudini ’ba Giriki be yi ovuni ndu ndu ku; Opi eri alu ’ba driani, eri ovu lonyi be fezu ’ba dria eri omvepi ’diyi dri.

13Te, ’Ba dria alu alu Opi ma ru omvepi ’diyi nga yi pa ra.

14Te yi nga ’ba yini a’ile nga kuri omve ngoni ngoni ya? Te yi nga ’ba yini e’yoni erile nga kuri a’i ngoni ngoni ya? Te yi nga e’yo eri, ’ba e’yo olupiri kokoru ngoni ngoni ya?

15Te yi nga e’yo olu ngoni ngoni ya, ka yi ti pe ku? Ekile erini ovule sizarurile, Adaru ’ba emupi e’yo bari olupi e’vo onyiru ejipi ’diyi ma pa ndri tu ’uoni ya!

16Te yi dria inzini e’yo bari su; te Isaya eri ’yo ra, Opi, a’di a’i e’yo yini erile ama vurini ya?

17’Dini a’ita eca ’bani e’yo erilerisi, te eriza eca ’bani e’yo Kristoni olulerisi.

18Te ma ’yo, yi erini ndra ku ya? Adadaru yi eri ndra ra; ’dini O’duko yini ere yi angu dri dria, e’yo yini olule ’diyi yi ku oro drisi dria.

19Te ma ’yo, Israeli yi vani ndra ku ya? Okorisi Musa ’yo, Ma nga fe a’yani engazu emi asia ’ba ovupi sururu ku ’diyi ma e’yosi; ma nga adra fe aokoni emi nyazu suru ondua kokoruri ma e’yosi.

20Te Isaya ’yo uri kokoru, ’Ba ndra ma ndrupi ku ’diyi, yi’i yi isu ma ra; ma ece ma ’ba ndra ma zipi ku ’diyi dri ra.

21Te Israeli ma e’yosi eri ’yo, O’du dria ma aja ma dri suru e’yo a’ipi ku, e’yo omvipi ambosi ’diyi vu.

← Chapter 9 Jump to: Chapter 11 →