Romans 8

Lugbara (E’yo Siza Alatararu Munguniri BIBLIA)

← Chapter 7 Jump to: Chapter 9 →

1’Dini curu’do e’yo liza ovuni ’ba ovupi Kristo Yesu alia ’diyi ma dria ku.

2Te azita Orindi idrini Kristo Yesu ma aliarini tru ma azita e’yo onziniri pi ma alia draniri be.

3Te Mungu ’ye e’yo ndra azitani ecole ’yele ku erini ovule okpo kokoru ruasirisiri, ndra erini i Mvi ma ti epele rua be ekile rua e’yo onzi be ’dorile e’yo onzi edezurisi; ’dini Mungu li ndra e’yo onzi ovupi rua ma aliari ma e’yo, nde eri ra,

4’dini ’yeta onyiru azitaniri ma ’ye i ama ’ba acipi e’yo ruani ma vutia ku, te Orindi ma vutia ’diyi ma alia.

5Te ’ba acipi e’yo ruani ma vutia ’diyi adri asisile dro e’yo ruani ma dria’i, te ’ba acipi Orindi ma vutia ’diyi adri vini asisile dro e’yo Orindini ma dria’i.

6Te asisile e’yo ruani ma driari eri dratani, te asisile e’yo Orindini driari eri idri pi asi anzuru be.

7Te asisile e’yo ruani ma driari eri Mungu be ari’boru; erini azita Munguni inzile kurisi, a’disiku eri econi inzizaru ku;

8’dini ’ba e’yo ruani ma vuti bipi ’diyi econi ayiko fezaru Mungu dri ku.

9Te Orindi Munguni ka ovu emi alia, emi ovuni e’yo ruani ma vuti bizu ku te e’yo Orindini. Te ’ba azini ka ovu Orindi Kristoni be ku, ’ba nde ovuni ’ba erini ku.

10Te Kristo ka ovu emi alia, rua ovu drazaru e’yo onzisi, te orindi ovu idriru e’yo onyinisi.

11Te Mungu Yesuni engapi ’ba draza ma eseliari ma Orindi ka adri emi alia, eri’i Kristo Yesuni engapi ’ba draza ma eseliari nga idri fe rua emini ecopi drazaru ’diyi dri indi, Orindi erini ovupi emi aliarisi.

12’Dini, ma adripi, ama ovuni mari be rua vu ku, adrizu e’yo ruani ma vuti bizu-

13te emi ka adri e’yo ruani ma vuti bizu emi nga dra ra, te emi ka ’yeta ruani fu Orindisi emi nga ovu idriru.

14Te ’ba dria Orindi Mungunini yi dri celeni ’diyi yi anzi Munguni.

15Te emi a’ini ndra orindi emi ’bazu ati’boru uri fezu dika ku, te emi a’i ndra orindi emi ’bazu anziru, amani owuzu ani, Baba! Ata!

16Orindi ma ngulupi eri e’yo eti nze orindi amani be kini ama ovu anzi Munguni.

17Te di ama ka ovu anzini ama ovu vini ’ba ngapi lonyi Munguni nyapi ’diyi, ama nga eri nya tualu Kristo be, ama ka candi ni eri be tualu ka, yi nga diza fe ama dri eri be tualu ndo.

18Te ma ega ama econi candi ewu ’dorini o’bizaru diza ngapi i ecepi ama vu ndori be ku.

19Te afa dria Munguni ’bale ’diyi yi eceta anzi Mungunini ngazu yi ecezuri te avasi;

20te afa dria Munguni ’bale ’diyi, Mungu ’ba yi e’yo toko dri fupi ku ’diyi ma palaa, te afa nde ’diyini lelerisi ku te Mungu yi ’bapi ’dinileri leni.

21Mungu le afa erini ’bale ’diyi ma ovu a’itasi ani luzu drile, kini eri nga yi ma ngulupi tru indi ombeza e’yo mazani ’dirisi ’dini yi ma fi truta dizaru anzi Mungunirini ma alia beni.

22Ama ni ra afa dria Munguni ’baleri yi dria tualu owu, yi ovu nga rua suza be okporu ekile mva azosirile, kpere curu’do;

23kiri yi’i yo, te ama ’ba Orindi Munguni a’ipi ekile oriefi okorile ’diyi indi, ama vini indi, ama ota ama asia, e’yo Munguni ngazu ama ’bazu anzi iniru, erini ngazu ma amani onzezuri tezu.

24Te ama ovu pazaru e’yo teza ’dirisi. Te e’yo ’bani nele rari tezu eri tezani yo. Te ’ba ka e’yo ne ra, eri di vini te e’yo tezasi a’disi ya?

25Te ama ka afa amani nele kuri te, ama te eri asi tezasi.

26Ekile be ’dirile Orindi eri okpoako amani ma aza ko; te ama nini Mungu zizu onyiru ku, te Orindi ngulupi eri zi ama dri otaza be, awu be ’bani ’yole tisi kuri.

27Te Mungu asi ale ndapiri eri ni e’yo Orindini eyikileri, Orindini zile ’ba alatararu dri ekile Munguni lelerilerisi.

28Te ama ni ra Mungu eri eci e’yo dria tualu onyiru ’ba eri lepi ’diyi dri, ’ba ndra erini omvele ekile erini opelerile ’diyi.

29Te eri ope ’ba erini nile ndra okokele ’diyi ra, yi ma si yi ekile i Mvi ma wurale, ’dini eri eco ovuzaru mva okoriru adripi kakau ’diyi ma eselia.

30Te eri omve ’ba erini opele ndra drio ’diyi indi; azini ’ba erini omvele ’diyi eri la ’ba baru indi; azini ’ba erini lale ’ba baru ’diyi eri fe ndra yi dri diza indi.

31Te di ama ’yo ngoni e’yo ’diyisi ya? Mungu ka ovu amaniru, a’di eco a’di ’dizu ama beni ya?

32Eri’i i Mvi ma ngulupi kupi ku, te eri fepi ama dri driari, eri ngani afa dria fe ama dri tualu eri be indi endra kokoru ku ya?

33A’dini nga asu su ’ba Munguni opeleni ’diyi ma ruaani ya? Te Mungu ma ngulupini yi la ’ba baruni;

34a’dini nga e’yo li yi ma dria yi ndezuni ya? Te Kristo Yesu dra ra, agapiri Mungu enga eri ’ba draza eselia ra, eri’i ovupi Mungu ma dri ndiari, eri Mungu zi ama drini.

35A’dini ama esele co ale Kristoniri beni ya? Kani candini ya? Kani ocokoni ya? Kani inzatani ya? Kani likini ya? Kani ovuzu pililiruri ya? Kani ovuzu ogogo dra ma siari ya? Kani omba ’ba olizu seisiri ya?

36Erini ovule sizarurile, Mi ma e’yosi ’ba yi ama fu etuzu; yi ma milia ama ovu ekile be kabilo yini lele olile oli’diyile.

37Yo, te adaru e’yo ’diyi ma aliasi dria ama aga ada eri’i ama lepirisi.

38Te ma ni adadaru kani dra, kani idri, kani malaikani, kani e’yo angu urua ’diyi, kani e’yo andruri, kani e’yo droziri, kani okpo amboru ’diyi,

39kani e’yo ovupi uru ’diyi, kani e’yo va ele ’diyi, kani afa azini dria ovupi indi ’diyi, yi econi ama esele cozaru ale Munguni Kristo Yesu Opi lamani ma aliari be ku.

← Chapter 7 Jump to: Chapter 9 →