Romans 12

Lugbara (E’yo Siza Alatararu Munguniri BIBLIA)

← Chapter 11 Jump to: Chapter 13 →

1Ma vini matu ’ba emi vu, ma adripi, yiki aleru Mungunirisi, emi fe emi rua eri dri ekile afa edetaru idriru, alatararu, ayiko fepi Mungu dririle; ’diri azi emini yekeri’i.

2Te emi ma si emi ’ba ewu ’dosi ’diyile ku, te emi oja emi asisile ’bazu o’diru, emi ma ni ani e’yo Munguni leleri, ovupi onyiru, ayiko fepi, kililiruri.

3Te ma ’yo emi tia alu alu, ’yeta anzutiri fele ma dririsi, emi ma ega e’yo emi vileri afusi aga ku, te emi ma ega e’yo emini ovuzu ani asi e’yere be, ekile Munguni esele a’itani awale ’ba alu alu dririle.

4Te ekile amani ovule rua esele be kakau rua alu ma aliarile, te azi rua esele alu aluni ovuni trotro ku,

5’dini ama ovupi kakau ’diyi ti, ama ovu rua alu Kristo ma alia, te ama dria alu alu ovu rua esele ama agyini indi.

6Te amani ovuria afa feza be ndu ndu ekile fele ama dri ’yeta anzutirisirile, kani e’yo oluzu, ama ma olu ekile esele a’ita amanirini ovulerile;

7kani ’ba aza kozu, ama ma ’ba asi azi ’ba aza kozuri ma dria; te ’ba ’ba imbapiri ma ’ba asi imbata dria;

8’ba ’ba asi omipiri, eri ma ’ba asi asi omiza ma dria’i; ’ba afa fepiri, eri ma fe asi basi; ’ba ’ba dri cepiri, eri ma ’ye asi driasi; ’ba yiki ’bapi ’ba vuri, eri ma ’ba yiki nde ayikosi.

9Emi ku ale ma ovu lokiri kokoru; emi ngu e’yo onziri onzi, emi ebi emi e’yo onyiruri vu;

10ale adripi vuri ma e’yosi emi ma le emi avasi; emi ma inzi emi ma agyi ma e’yo oko.

11Emi ovu ovuouni ku, emi ’ye e’yo asi driasi, azi ngazu Opi dri.

12Emi ovu ayikosi e’yo tezu luzu drile, emi ovu asi tezasi inzata me alia, Mungu zizu ’dani asi okporu be

13Emi ko ’ba alatararu ma aza afa ovupi yi vu yo ’diyisi, emi fe emi asi wa’di a’izu.

14Emi fe asi ndriza ’ba emi inzapi ’diyi vu; emi fe asi ndriza, emi tri yi ku.

15Emi ma ovu ayikosi ’be ayikoru ’diyi be, emi owu ’ba owupi ’diyi be.

16Emi ovu asisile alu be emi eselia; emi ma ovu egata asi afusiri be ku, emi a’i emi ecizu ’be were ’diyi be; emi ma ovu onduaru emi ma ngulupi ma milia ku

17Emi ma omvi onzi e’yo onzi me paria ariotiru ’ba aluni dri ku. Eri dro asisile e’yo emini ’yele ’diyi ma ovu kililiru ’ba dria ma milia.

18Ka eco rarisi, e’yo eminisi emi ma ovu asi anzuru be ’ba dria vu.

19’Ba mani lele ’diyi, emi ma omvi arioti emi’i ku, te emi te adra Munguniri erini ovule sizarurisi, Arioti omvizuri e’yoni mani, ma nga ariotini ofe ma’i, Opi ’yo ra.

20Te ari’bo mini ka ovu abirisi mi fe nyaka eri dri, yi avijo ka eri fu ra mi fe eri ma mvu; te mini ’yele ’dinirisi mi nga aciolu vepi acisiri oku eri ma dria.

21Emi ma a’i e’yo onzini emi ndezu ku, te emi Inde e’vo onzi e’yo onyirusi.

← Chapter 11 Jump to: Chapter 13 →