Romans 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1E’yo ’disi mi econi e’yo omvizaru e’yo lizasi ku, mi’i, mi ’ba e’yo lipiri; ’dini mini e’yo ’ba azinini liria mi e’yo mi ma ngulupini li, mini e’yo nde ’diyi ’yele indirisi.

2Te ama ni ra e’yo liza Munguni ovu e’yo adaru vusi ’ba e’yo ’diyi ’yepi ’diyi vu.

3Te mi’i, mi ’ba e’yo ’yepi ’dini ’diyi ma e’yo lipiri te mi ma ngulupi mi vini ’ye ’dini indi, mi ega mi nga eco apazaru e’yo liza Mungunirisi ra ya?

4Kani mi onyi Munguni ma lonyi, asi e’yere pie, asi teza pie, mi yi ’ba dria toko ya? Mi nini asi ndriza Munguniri eri mi ese asi ojaza vuri ku ya?

5Te asi mbaza minisi mini mi asi ojale kurisi, mi adra ma ta mba okuzu mi ngulupi ma ruaa ewu adrani Munguni ngazu e’yo liza ini kililiruri ecezurisi.

6Te eri nga ’ba dria alu alu ofe ekile azi yinini ovulerile:

7’ba dria andepi azi onyirusi ku, te diza ndrupi inzita pie, e’yo mapi kuri pie ’diyi, Munguni nga yi dri idri ’dani ’daniri fe;

8te ’ba agata gapi, ’ba e’yo adaru gapi si e’yo onziri ma vuti bipi ’diyi, eri nga yi dria adra ’ba aoko be.

9Candi pie, ocoko pie, ’ba dria alu alu azi onzi ’yepi ’diyi vu, okoni ’ba Yahudini vu, te vini ’ba Girikini vu indi,

10te diza, inzita pie, asi anzuru pie nga ovu ’ba dria e’yo onyiru ’yepi ’diyi vu, okoni ’ba Yahudini vu, te vini ’ba Girikini vu indi.

11A’disiku Mungu ma milia ’ba ovuni ndu ndu ku.

12Te ’ba dria e’yo onzi ’yepi azita kokoru ’diyi nga dri ja azita kokoru, te ’ba dria azita be ra ti, e’yo onzi ’yepi ’diyi, azitani nga yi ma e’yo lini.

13Te ’ba azita eripi kiri bilesi ’yepi ku ’diyi ma e’yo ovuni kililiru Mungu ma milia ku, te ’ba azita ’yepi ra ’diyi nga ovu lazaru ’ba baruni.

14’Ba suru jururu ovupi azita kokoru ’diyi ka e’yo azita ndeni, ’ye ceni, ’ba ’diyi yini ovuria azita kokoru ti, yi ovu azita be yi ma ngulupisi.

15A’disiku yi ece azi azitani ovu sizaru asi yinia, nita yini e’yo onziri pi nizu e’yo onyiruri berini e’yo eti nzeria indi, egata yini ndu ndu ’diyini yi toria kani e’yo yi ma driari truria,

16o’du Munguni ngazu e’yo ovupi zizaru asi ’bani ma alia ’diyi lizu Yesu Kristosirisi, ekile e’yo bari mani olulerile.

17Mi’i, mi ka mi omve ’ba Yahudini, mi ka vini ega mi nga mi pa mini azita ma vuti bilerisi, ovuzu asi afu be mini Mungu a’ilerisi,

18mi ka e’yo Munguni leleri ni, azini e’yo onyiru agapi dria ’diyi a’i, azitani mi imbalerisi,

19mi ka ega adaru mi ovu ’ba ’ba mile kokoru ’diyi ma dri cepiri’i, mi ega mi ’ba diza e’dapi ’ba ini alia ’diyi vuri’i,

20mi ega mi ’ba ondua fepi ’ba e’yo nipi ku ’diyi driri’i, mi ega mi ’ba anzi imbapiri, azini mi ovu e’yo niza azini e’yo adari dria ma e’daza be azita alia-

21ka ovu ’dini, mi ’ba ’ba azini imbapiri’i ’di, mi imbani mi ngulupi indi ku ya? Mi ’ba olupi ’ba ma ogu kuri, mi vini ogu indi ya?

22Mi ’ba olupi ’ba ma ’ba ali kuri, mi vini ali ’ba indi ya? Mi ’ba wura toko ’diyi ngupiri, mi vini afa hekalu yini aliari ogu indi ya?

23Mi ’ba ovupi asi afu be mini azita a’ilerisi, mi vini Mungu dri drinza fe mini azita ezalerisi ya?

24Ekile erini ovule sizarurile, Suru ndu ndu yi ovu Mungu ma ru o’dazu e’yo eminisi.

25Te agele liza eri orodriru mi ka azita ’ye raria; te mi ka azita ’ye ku agele liza mini eri ovu ekile agele lile kurile.

26’Ba agele likokoruri ka onyi azitani ma ta mba ra, yi ngani lizaako eriniri la ekile lizarurile ku ya?

27’Dini ’ba agele liza ruasiri lipi kuri ka azita ’ye ceni, eri ngani mi azita siza be agele lile te azita ezapi rari ma e’yo li ku ya?

28’Dini ’ba ovuni ’ba Yahudiniru e’yo amvelerurisi ku, azini agele liza ovuni kiri amveleru ruasi ku.

29Te ’ba yi ovu ’ba Yahudiniru alialeru, azini lita nderi eri asiniri, orindisi, azita sizasi ku. ’Ba ’dinile ’diyi inzita isu Mungu vu, ’ba vu ku.

← Chapter 1 Jump to: Chapter 3 →