Romans 16

Lugbara (E’yo Siza Alatararu Munguniri BIBLIA)

← Chapter 15 Jump to:

1Ma ’ba Fibi amvipi amani emi milia, ovupi kanisa Kenikireari ma aza kopiri,

2’dini emi ma a’i eri onyiru Opi ma alia, ekile dri fupi ’ba alatararu ’diyi dririle, eri aza kozu e’yo erini ngale lelerisi, ka ovu ngoni ti, a’disiku eri ngulupi ko ’ba kakau ma aza, ko vini ma ngulupi ma aza indi.

3Emi zi Pirisika pi Akula be ci ci, yi ’ba azi ngapi ma be tualu Kristo Yesu ma alia ’diyi,

4adi yi dra dri idri mani ma e’yosi, ma fe awa’difo yi dri, kiri ma’i a’dule ku te ’ba kanisani dria ovupi suru dria ma eselia ’diyi fe awa’difo indi;

5emi zi ’ba kanisani ovupi jo yini ma alia ’diyi ci ci indi. Emi zi Epaineto agyi mani leleri, eri oriefi Kristoni kapi Asiaa okori.

6Emi zi Mariamu ndra azi ngapi emi dri okposiri,

7Emi zi Androniko pi ci ci Yuniasi be, yi ori’ba mani lapi jo arunia tualu ma be ’diyi; yi ’ba endrezani ’ba ti opele ’diyi ma eselia, yi ovu ndra Kristo alia mani oko.

8Emi zi Ampiliato ’ba mani lele Opi ma aliari.

9Emi zi Urubano, ’ba azi ngapi ama be Kristo ma aliari, azini Sitakusi ’ba mani leleri.

10Emi zi Apelesi ’bani a’ile Kristo aliari. Emi zi ’ba ovupi jo Aristobuluni ma alia ’diyi.

11Emi zi Herodionini ori’ba mani. Emi zi ’ba ovupi Narikiso vile akua Opi ma alia ’diyi ci ci.

12Emi zi Turufena pi Turufosa be ci ci, yi ’ba azi ngapi Opi ma alia okposi ’diyi. Emi zi Perisisi amviazi mani leleri, eri ’ye azi tu Opi ma alia.

13Emi zi Rufusi Opini peleri pi ci ci, andri erini ovupi mani indiri be.

14Emi zi Asunikirito, Filegoni, Herime, Patroba, Herima, adripi ovupi yi be ’diyi pie dria ci ci.

15Emi zi Filologo pi Yulia be, Nerea pi amvi be, azini Olumpa pi, ’ba alatararu ovupi yi be ’diyi pie dria ci ci.

16Emi zi emi emi eselia o’deza ava alatararunisi. ’Ba kanisa dria Kristoni yi zi emi ci ci.

17Ma matu ’ba emi vu, ma adripi, emi ne ’ba esele coza pi fepi e’yo abaza be ’diyi. Yi le imbata ’bani emi imbazu ’bori eza ra; emi ona emi yisi onaona.

18A’disiku ’ba ’dinile ’diyi ngani azi Opi amani Kristo dri ku, te abiri yi ma anyajoarisi, azini yi ici ’ba e’yo onzi kokoru ma asi yini e’yo ayikoru ’yoria e’yere ti aluzasi,

19Te erita emini ma e’yo ku ’ba dria vu ’bo, e’yo ’disi ma ovu ayikosi emi ma e’yosi, te ma le emi ma ovu ondua e’yo onyiru ’yezuri be ra, te emi ma ovu ondua e’yo onzi ’yezuri be ku;

20te Mungu asi anzuruniri nga Satani tu va emi pa agelia mbeleru. ’Yeta anzutiri Opi amani Yesu Kristoni ma ovu emi be.

21Timoteo azi ngapi ma beri pi zi emi ci ci, Lukio pie, Yasoni pie, Sosipatero pie, yi ori’ba mani.

22Ma’i Teritio, waraga ’diri sipiri, zi emi Opi ma alia.

23Gayo ma a’ipi wa’diru, kanisa dria be indiri, zi emi ci ci. Erasito ’ba silingi aku ambo ’dorini ma agei tepiri pi zi emi ci ci Koaritoadripi amani be.

24’Yeta anzutiri Opi amani Yesu Kristoni ma ovu emi be dria.

25Curu’do diza ma ovu Mungu vu, te eri ovu okpo be fezu emini pa sozu okporu ekile e’yo bari mani olulerile azini ekile oluza Yesu Kristonirile. Engazu ewu gbu drio i ’diyisi, adrini ndra e’yo zizaru ’diri ece ku,

26te ece i curu’do e’yo siza ’ba nabiru ’diyinisi ’bo, azita Mungu ’danirini azilerile. Eri ece e’yo nde suru dria dri yini e’yo erizu a’itasi ani.

27’Ba ma fe diza Mungu ovupi a’dule onduaruri vu geri Yesu Kristonirisi ewule ewule! Amena.

← Chapter 15 Jump to: