Romans 14

Lugbara (E’yo Siza Alatararu Munguniri BIBLIA)

← Chapter 13 Jump to: Chapter 15 →

1’Ba ovupi okpo kokoru a’ita erini ma alia, emi ma a’i eri ra, te agata gazu eri be e’yo toko tokosi ku.

2’Ba azini ovu a’ita be afa dria nyazu, te ’ba okpo kokoruri eri tibi iniri mbe’i a’dule.

3Te ’ba nyapiri, ma ngu ’ba nyapi kuri onzi ku, azini ’vini ’ba nyapi kuri ma li ’ba nyapiri ma e’yo onzi ku; a’disiku Mungu a’i eri ra.

4Mi a’di’i ati’bo ’ba azinini ma e’yo lizu ya? E’yo erini ovu opi ini vu, kani pa sozu ci, kani e’dezu va. Te adaru eri nga pa so ra, a’disiku. Opini ovule okpo be fezu erini pa sozu cirisi.

5’Ba azini ma milia o’du alu eri alaru aga o’du azini ra, te aziniri ma milia o’du yi dria tro tro. Te ’ba dria alu alu ma ni egata i ma ngulupiniri ra.

6’Ba o’du ma e’yo egapiri eri eri ega Opi dri. ’Ba nyapiri eri nya Opi dri, a’disiku eri awa’difo fe Mungu dri; te ’ba nyapi kuri, e’yo erini nyazu kuri eri Opi dri, azini eri awa’difo fe Mungu dri indi.

7Te ’ba aluni ama eseliari ovuni idriru i ngulupisi ku, te ’ba aluni drani i ngulupisi ku indi.

8Te ama ka ovu idri be ama ovu idri be Opisi, te ama ka dra ra ama dra Opisi; ’dini ama ka ovu idri be kani ama ka dra ra ti, ama ovu Opini.

9Te e’yo ’disi Kristo eri dra ndra te eri ovu idriru dika, eri ma ovu ani Opiru ’ba drapi ’bo ’diyi pi ma drilia ’ba idriru ’diyi be.

10Te mi’i, mi mi adripi ma e’yo li a’disi ya? Kani mi’i, mi mi adripini ede a’disi ya? A’disiku ama driani nga pa so oguna Munguni e’yo lizuri ma drilia;

11te eri ovu sizaru, Ekile mani ovule idrirurile, Opi ’yo ra, ’ba dria nga kumuti osi ma drilia, andre ’bani dria yi nga inzita fe Mungu drilia.

12’Dini ama dria alu aluni nga e’yo amani e’da Mungu ma drilia.

13Ka’dini ama ma li ’ba azini ama eseliari ma e’yo dika ku, te agapiri emi ma li e’yo ’diri, kini ’ba aluni ma ’ba kumu i adripi ma geria, kani e’yo erini ani abazu rari ku.

14Ma ni ra, ma a’i adaru ma asia Opi Yesu ma alia, afa aluni ovuni ondiru eri ma ngulupisi ku; te kiri ’ba egapi eri ondiruri dri eri ondiru.

15Nyaka mini nyaleri ka candi fe mi adripi dri, de mi acini alesi ku. Mi ma ja ’ba Kristoni drale erisiri ma dri nyaka minisi ku.

16Mi ma ku ’ba dri pari e’yo onzi ’yozu e’yo onyiru minirisi ku.

17Te suru Munguni ovuni afa nyaza nyazu kani afa mvuza mvuzu, ’dini ku, te eri ovu e’yo onyini, asi anzuru pie, ayiko pie, Orindi Alatararu ma alia;

18te ’ba azi ngapi Kristo dri e’yo ’diri ma aliari, eri ayiko fe Mungu dri, ’ba yi vini eri a’i indi.

19’Dini ama ma bi e’yo asi anzuruni ’diyi ma vuti, azini e’yo amani ecozu ani ama edrezu ama eselia ’diyi.

20Emi ma fu lazi Munguni nyaka ma e’yosi ku. Adaru afa dria yi alaru ra ’bo, te ’ba ka afa nya obeta fezu ’ba azini dri eri onzi;

21za nyazu, kani ewa mvuzu, kani e’yo azini aluni mi adripini ani e’dezu vari ’yezu, ovuni onyiru ku.

22Mi ka ovu a’ita be, mi ma ovu eri be mi ngulupisi Mungu ma milia; ’ba i ma e’yo lipi ceni e’yo erini a’ile ’yelerisi kuri, ’ba nderi ovu drilebaru.

23Te eri ma asi ka oti oti, ka nya ra, eri li e’yo ini ’bo, a’disiku eri nyani a’itasi ku; te e’yo dria a’ita kokori eri onzini.

← Chapter 13 Jump to: Chapter 15 →