Romans 13

Lugbara (E’yo Siza Alatararu Munguniri BIBLIA)

← Chapter 12 Jump to: Chapter 14 →

1Ba dria alu alu ma inzi ’ba ’ba dri cepi yi ma drilia ’diyi ma e’yo. Te ’ba drileru azini Munguni ’bale kuni yo, te ovupi indi ’diyi Mungu ope yini.

2Ka’dini ’ba ka ’ba drileru ma ti ga eri e’yo Munguni peleri ga, te ’ba gapi ’diyi nga e’yo liza isu yi ma dria ceni.

3Te ’ba ’ba dri cepi ’diyi yi feni uri ’ba azi onyiru ’yepi ’diyi dri ku, te ’ba azi onzi ’yepi ’diyi dri. Mi le ovu opi ma milia uri kokoru ya? Mi ’ye onyiru, ’dini eri nga mi inzi beni,

4te eri azi Munguni nga mi ’yezu onyiru. Te mi ka onzi ’ye, mi ma ovu urisi, te eri ovuni sei be toko ku; te eri azi Munguni nga, adra omvizu ’ba onzi ’yepi ’diyi vu.

5E’yo ’disi emi ma inzi yi e’yo adranisi a’dule ku, te e’yo niza emi aliarisi indi.

6E’yo ’disi emi adri musoro fe indi, te yi ovu ’ba azi Munguni ngapi ’diyi e’yo ’diri ’yezu ’dani.

7’Dini emi ofe ’ba dria dri kililiru ekile dri fupi emini fezu yi dririle, kani musoroni emi ma fe musoro, kani luwaloni, emi fe luwalo, kani rutani emi ma ru yi ra, kani inzitani emi fe inzita.

8Emi ma ovu mari be ’ba aluni vu ku, kiri ’ba lezu a’dule; te ’ba agyi ini lepiri eri ’ye azita dria ’bo.

9Te azita ’diyi kini, Mi ’ba ali ku, Mi ’di ’ba ku, Mi ogu ku, Mi ’ba li afasi ku, te azita azini ka ovu indi, yi dria oku yi tualu e’yo ’di ma alia, kini, Mi ma le mi agyini mini mi lelerile.

10Ale ’yeni onzi i agyi vu ku; ’dini azita ’yezu driari eri aleni.

11Azini indi emi ni ewu ’dori ma e’yo ra, kini etu oruzu o’duari eca curu’do ’bo. A’disiku curu’do pata amani eri ogogo aga etu ndra amani a’izuriari ra;

12inini ’ye i de de, anguni ’ye ati ati. ’Dini ama ma tru,azi inini ra, ama ma su afa suza ombani etuniri’i;

13ama ma aci kililiru ekile etusirile, amani ama okuzu ewa tia atizu ewasi ku, ovuzu mile aci be ali ’bazu ku, ovuzu awatasi ma’yala be ku indi.

14Te emi ma su Opi Yesu Kristo’i, emi ma fe geri li ruani ’yezu ku.

← Chapter 12 Jump to: Chapter 14 →