1 Corinthians 10

Lahu Bible Edited © Thailand Bible Society and Bible Society of Myanmar, 2010, 2020.

← Chapter 9 Jump to: Chapter 11 →

1Awˬ viˉ awˬ nyi teˇ hpaˍ-oˬ, ngaˬ nawˬ hui hta‸ chi hkʼe shiˍ piˇ gaˇ ve yoˬ. Ngaˬ hui ve awˬ puˍ awˬ pi hkʼa peu-eˬ lehˬ, moˬ awˬ hawˉ lo chehˇ leh, laˇ tsuhˇ gʼuiˬ hta‸ hpanˍ kʼai ve yoˬ.

2Yawˇ hui hkʼa peu-eˬ lehˬ, moˬ leh laˇ tsuhˇ gʼuiˬ awˬ hkʼaw lo Moˉseˍ geh baˆtiˆsaˬ hkanˍ taˍ peuˬ.

3Yawˇ hui hkʼa peu-eˬ co ha ve caˇ tuˬ teˇ ceuˬ tiˉ caˇ leh,

4yawˇ hui hkʼa peu-eˬ co ha ve dawˬ tuˬ teˇ ceuˬ tiˉ dawˬ ve yoˬ. Awˬ lawn kʼo, co ha ve haˉ hpawˇ yawˇ hui awˬ hkʼaˇ suh kʼai leh, haˉ hpawˇ oˇ ve awˬ hkʼaw lo tawˆ la ve iˉ kaˆ hta‸ yawˇ hui gʼa dawˬ ve yoˬ.

5Haˉ hpawˇ oˇ ve lehˬ, Hkri‸ hpeh‸ ve yoˬ. Ya‸ hkʼaˇ, yawˇ hui maˇ-awˍ ve hta‸ Gʼuiˬ sha nyi hkʼaˇ maˇ suh. Yawˇ hui heh puiˉ hkʼaw lo gʼa luˬ gʼa sheˆ ve yoˬ.

6Yawˇ hui haiˬ ve awˬ ceuˬ teˇ hpaˍ hta‸ sheˉ lai ve hkʼe ngaˬ hui maˇ gʼa sheˉ lai tuˬ, chi teˇ hpaˍ lehˬ, ngaˬ hui awˬ pon shaˍ ti‸ gʼa tuˬ ve awˬ ceuˬ hpeh‸ ve yoˬ.

7Yawˇ hui teˇ hpaˍ hpaˍ shaˉ ho‸ hta‸ oˉ kʼoˍ pui ve chaw hpeh‸ ve hkʼe, nawˬ hui taˇ hpeh‸ piˇ. Li‸ hpu hkʼaw bvuh‸ taˍ ve hkʼe, Chaw teˇ hpaˍ lehˬ, caˇ ve dawˬ ve awˬ pon mui leh, leˍ guiˇ tuˬ awˬ pon tu la ve yoˬ teh‸ bvuh‸ taˍ ve yoˬ.

8Yawˇ hui teˇ hpaˍ hpaˍ haˉ chawˇ haˉ paˆ te ve yoˬ. Ngaˬ hui oˇ hkʼe maˇ gʼa te. Yawˇ hui oˇ hkʼe te ve pa taw, teˇ nyi tiˉ awˬ hkʼaw lo chaw nyiˇ meunˍ shehˆ hinˉ gʼaˇ paˍ suh-e ve yoˬ.

9Yawˇ hui teˇ hpaˍ hpaˍ Jawˇmawˇ Gʼuiˬsha hta‸ lawˇ nyi ve yoˬ. Ngaˬ hui oˇ hkʼe maˇ gʼa te. Yawˇ hui oˇ hkʼe te ve pa taw, vuiˬ yawˇ hui hta‸ te luˬ te sheˆ ve yoˬ.

10Yawˇ hui teˇ hpaˍ hpaˍ hkʼanˇ ve awˬ hkʼaw lo beu ve deˇ ve yoˬ. Ngaˬ hui oˇ hkʼe maˇ gʼa te. Yawˇ hui oˇ hkʼe te ve pa taw, te luˬ shehˍ hpaˇ ve la‸ sheh awˬ hkʼaw lo gʼa luˬ gʼa sheˆ ve yoˬ.

11Awˬ ceuˬ oˇ ve teˇ hpaˍ lehˬ, shu shaˍ ti‸ gʼa tuˬ awˬ pon yawˇ hui awˬ hkʼaw hpeh‸ la leh, awˬ leh meuˇ ve awˬ yanˇ awˬ hkʼaw lo chehˇ ve ngaˬ hui hta‸ maˍ laˇ tuˬ awˬ pon Li‸ hpu hkʼaw lo bvuh‸ taˍ ve yoˬ.

12Hkʼe te leh, chaw teˇ gʼaˇ gʼaˇ, Ngaˬ yeˬ lehˍ huˉ chehˇ ve teh‸ dawˇ ve kʼo, yawˇ maˇ gʼa paiˍ tuˬ shaˍ ti‸ te cawˇ ve yoˬ.

13Chaw yaˇ hui gʼa hpuˇ jaw ve beˬ ve lawˇ ve hta‸ ceh tiˉ nawˬ hui gʼa hpuˇ ve yoˬ. Gʼuiˬsha htawˇ, ka ti‸ yeˬ leh, nawˬ hui hkanˍ maˇ gʼa ve beˬ ve lawˇ ve hta‸ gʼa hpuˇ tuˬ, yawˇ a hkaw-anˬ maˇ piˇ. Ya‸ hkʼaˇ, beˬ ve lawˇ ve hta‸ hpuˇ htaˇ, nawˬ hui hkanˍ hpeh‸ tuˬ, ponˬ ve ya‸ kʼaw hta‸ yawˇ gu taˍ tuˬ yoˬ.

14Hkʼe te leh, ngaˬ ha‸ ve chaw teˇ hpaˍ-oˬ, shaˉ ho‸ hta‸ oˉ kʼoˍ pui ve teˇ ceuˬ hta‸ jaw kʼai loˬ.

15Dawˇ nyi puiˉ ve chaw teˇ hpaˍ hta‸ ngaˬ kʼoˆ piˇ ve yoˬ. Ngaˬ kʼoˆ ve cawˇ maˇ cawˇ ve hta‸ nawˬ hui dawˇ nyi-o.

16Ngaˬ hui chiˇ mvuh ve awˬ bon uiˍ ve kawˆ lehˬ, Hkri‸ ve awˬ suhˍ awˬ hkʼaw lo ngaˬ hui teˇ geh caˉ da‸ ve teˇ ceuˬ hpeh‸ ve maˇ heˆ laˇ. Ngaˬ hui hkʼeh‸ ve hkaoˍmonˇ lehˬ, Hkri‸ ve awˬ to awˬ hkʼaw lo ngaˬ hui teˇ geh caˉ da‸ ve teˇ ceuˬ hpeh‸ ve maˇ heˆ laˇ.

17Hkaoˍmonˇ teˇ diˬ tiˉ cawˬ ve pa taw, ngaˬ hui maˇ ve htawˇ, teˇ to tiˉ hpeh‸ ve yoˬ. Awˬ lawn kʼo, ngaˬ hui hkʼa peu-eˬ hkaoˍmonˇ teˇ diˬ hta‸ tiˉ hpawnˬ caˇ ve yoˬ.

18Iˉsaˍreˍlaˆ chaw hui te ve awˬ liˇ hta‸ dawˇ nyi sheˍ. Tanˇ peuˬ ve hta‸ caˇ ve chaw hui lehˬ, tanˇ kuiˬ hta‸ caˉ da‸ ve chaw hpeh‸ ve maˇ heˆ laˇ.

19Hkʼe te leh, ngaˬ hkʼaˬ hkʼe kʼoˆ gaˇ ve le. Shaˉ ho‸ hta‸ tanˇ peuˬ ve teˇ ceuˬ lehˬ, aˬ hto‸ ma kʼoˆ tuˬ cawˬ le. Shaˉ ho‸ ka‸, aˬ hto‸ ma kʼoˆ tuˬ cawˬ le.

20Kʼoˆ tuˬ te‸ chiˉ maˇ cawˬ. Lawˇ kiˍ yaˇ hui lehˬ, yawˇ hui ve tanˇ tuˬ Gʼuiˬsha hta‸ tanˇ ve maˇ heˆ, neˇ teˇ hpaˍ hta‸ tanˇ ve yoˬ. Nawˬ hui lehˬ, neˇ teˇ hpaˍ hta‸ caˉ da‸ tuˬ ngaˬ maˇ heuˆ gaˇ.

21Jawˇmawˇ Yeˍsuˆ ve kawˆ leh neˇ teˇ hpaˍ ve kawˆ, teˇ maˬ hta‸ dawˬ ve kʼo, teˇ maˬ hta‸ nawˬ hui dawˬ maˇ hpeh‸. Jawˇmawˇ Yeˍsuˆ ve hpui lawˇ leh neˇ teˇ hpaˍ ve hpui lawˇ, teˇ maˬ lo mui caˇ ve kʼo teˇ maˬ lo nawˬ hui mui caˇ maˇ hpeh‸.

22Jawˇmawˇ Yeˍsuˆ nyi ma zuhˆ tuˬ ngaˬ hui te tuˬ laˇ. Ngaˬ hui yawˇ a‸ kehˉ awˬ gʼaˇ uiˍ ve laˇ.

23Ngaˬ hkʼa peu-eˬ ve hta‸ te tuˬ a hkaw-anˬ cawˬ ve yoˬ. Ya‸ hkʼaˇ, hkʼa peu-eˬ ve hta‸ te tuˬ awˬ bon cawˬ ve maˇ heˆ. Ngaˬ hkʼa peu-eˬ ve hta‸ te tuˬ a hkaw-anˬ cawˬ ve yoˬ. Ya‸ hkʼaˇ, hkʼa peu-eˬ ve uiˍ la yeˬ la piˇ puiˉ ve maˇ heˆ,

24Hkʼaˬ ve teˇ gʼaˇ maˇ kʼoˆ, a shu yawˇ awˬ to awˬ pon awˬ bon gʼa tuˬ taˇ ca. Ya‸ hkʼaˇ, shu awˬ pon awˬ bon gʼa tuˬ ca-o.

25Tcuh hkʼaw hkʼa hawˇ ve teˇ hpaˍ hta‸ caˇ-oˆ. Shiˍ puiˉ ve nyi ma hta‸ pa taw, te‸ chiˉ taˇ na nyi.

26Awˬ lawn kʼo, miˬguiˬ leh miˬguiˬ hkʼoˆ hkʼa cawˬ ve hkʼa peu-eˬ lehˬ, Jawˇmawˇ Gʼuiˬsha ve mawˇ hpeh‸ ve yoˬ.

27Maˇ yonˍ ve chaw teˇ gʼaˇ gʼaˇ nawˬ hui hta‸ kuˬ leh nawˬ hui kʼai gaˇ ve kʼo, nawˬ hui mehˆ gʼuˇ suhˍ hkʼa teh laˇ ve caˇ tuˬ hta‸ caˇ-oˆ. Shiˍ puiˉ ve nyi ma hta‸ pa taw, te‸ chiˉ taˇ na nyi.

28Ya‸ hkʼaˇ chaw teˇ gʼaˇ gʼaˇ, Chi lehˬ shaˉ ho‸ hta‸ tanˇ peuˬ ve caˇ tuˬ yoˬ teh‸ nawˬ hta‸ kʼoˆ laˇ ve kʼo, nawˬ hta‸ hto laˇ ve chaw teˇ gʼaˇ hta‸ pa taw maˇ kʼoˆ, shiˍ puiˉ ve nyi ma hta‸ pa taw maˇ kʼoˆ, taˇ caˇ loˬ.

29Shiˍ puiˉ ve nyi ma teh‸ kʼoˆ ve lehˬ nawˬ ve shiˍ puiˉ ve nyi ma hta‸ kʼoˆ gaˇ ve maˇ heˆ. Shu ve shiˍ puiˉ ve nyi ma hta‸ kʼoˆ gaˇ ve yoˬ. Awˬ lawn kʼo, ngaˬ te hpeh‸ ve teˇ hpaˍ hta‸ aˬ hto‸ ma pa taw shu ve shiˍ puiˉ ve nyi ma tawˍ taˍ laˇ ve le.

30Awˬ bon hta‸ dawˇ nawˇ leh ngaˬ caˇ ve kʼo, bon hta‸ chiˇ mvuh leh caˇ ve awˬ hkʼaw lo, aˬ hto‸ ma pa taw shu ngaˬ hta‸ maˇ shawˍ maˇ caˆ kʼoˆ laˇ ve le.

31Hkʼe te leh, nawˬ hui caˇ ve maˇ kʼoˆ, dawˬ ve maˇ kʼoˆ, aˬ hto‸ ma teˇ ceuˬ te ve maˇ kʼoˆ, hkʼa peu-eˬ awˬ hkʼaw lo Gʼuiˬ sha ve awˬ me‸ awˬ hponˇ tawˆ la tuˬ te-o.

32Chaw maˇ maˇ htaiˍ hkʼaw‸ ve hta‸ gʼa tuˬ, ngaˬ awˬ to awˬ pon awˬ bon hta‸ ngaˬ maˇ ca leh, teˇ ceuˬ le le awˬ hkʼaw lo chaw hkʼa peu-eˬ nyi hkʼaˇ suh tuˬ ngaˬ ca ve yoˬ.

33Chi hkʼa shuˍ shuˍ, nawˬ hui htawˇ, Yuˇda‸ chaw hui hta‸ maˇ kʼoˆ, Heˍlaˍsaˆ chaw hui hta‸ maˇ kʼoˆ, Gʼuiˬsha ve Hkri‸ yaˇ awˬ moˍ hta‸ maˇ kʼoˆ, hkui htiˇ poˬ paiˍ tuˬ taˇ te.

← Chapter 9 Jump to: Chapter 11 →